Havfrúgvin backstage og Tórsbyrgi 40 ár

Nógv hendir á føroyska mentanarpallinum í løtuni, og hetta merkir eisini fyrstu Mentanarcaéina hesa vetrarskránna. Leygarkvøldið verður nýggi leikur eftir Jóanes Nielsen, Havfrúgvin, frumsýndur á Tjóðpalli Føroya. Og talan er um eina fult og heilt føroyska framleiðslu. Vit hitta leikstjóran, Eyðun Johannesen, pallsmiðin, Sámal Blak, og tónleika- og ljóðgandakallin, Jens L. Thomsen, og vit leita aftur á samrøðu, sum Kári Olsen hevði við rithøvundan, Jóanes Nielsen, í síðstu viku. Í vár læt upp stórfingin framsýning í Norðurlandahúsinum, samstundis sum Sprotin læt úr hondum bókina Prent 1980-2016 í spegilsvendari skrift um Marius Olsen og hansara list. Solveig Hanusardóttir Olsen, listfrøðingur, kemur á gátt at ummæla stóru bókina. Fleiri framsýningar lótu upp seinasta vikuskiftið, og vit hava verið á tveimum teirra: Í Gamla Seglhúsinum í Klaksvík var fernisering við verkum eftir Hanna Bjartalíð, og vit hava hitt listarmannin, umframt Kinnu Poulsen, ið setti framsýningina. Vit vóru eisini á Listasavni Føroya, har framsýningin Spor læt upp fríggjadagin. Hetta er ein fjølbroytt installatión hjá listamanninum Jóhan Martin Christiansen, sum vit skiftu orð við millum stóru seglini, ið eru gjørd úr bummullsblæum. Í summar vóru 40 ár liðin, síðan fyrstu húskini fluttu inn í slóðbrótandi býlingin, Tórsbyrgi. Vit hava tosað við arkitektarnar Gunnar Hoydal og Páll Holm Lave og Heina Gaard og Selmu Dahl Erol, sum eru uppvaksin í Tórsbyrgi. Tú kanst hoyra sendingina her.