Horeografs Guntis Tjarvja – juodoncoj ar gondarejumu sirdī i smaidu sejā

Itūreiz iz sarunu asam aicynuojuši vīnu nu nadaudzūs Latgolys horeografu, Rēzeknis deju apriņča viersvadeituoju, Feimaņu pogosta jaunīšu deju kolektiva „Vīmyns” vadeituoju, Rībeņu vydsškolys direktora vītinīku izgleiteibys jūmā i informatikys školuotuoju Gunti Tjarvji. „Golvonais ir doncuot nu sirds. Tehniku vysod var pīlobuot, bet, ka tu redzi doncuotuoja sejā taidu emocionalu gondarejumu, smaidu, tod saprūti, ka nikaids muoksleigais smaids tū navar atsvērt. Dabiskums ir puori vysam.” Naseņ nūtykušajā XXIII Jaunradis deju konkursā, kurā pīsadaleja 56 horeografi nu vysys Latvejis ar 130 jaunom dejom, Guntis pīzeits par vīnu nu lobuokūs deju autoru ar deju „Vot i puiseits”. Ar Gunti runuosim par tū, voi tautyskuos dejis Latgolā palīk modernuokys, cik vīglai voi gryušai ir nūturēt deju kolektivā doncuotuojus, kas jūs motivej doncuot, kaida byus tautyskuo deja iz prīšku, kai ari školuotuoja omotu i tuo izaicynojumim niu i iz prīšku.