Hryðjuverk afhjúpa vanhæfni rússneskra stjórnvalda, ESB rannsakar tæknirisa og offita

Enn einu sinni virðast vanhæfni og veikleikar einkenna rússneska stjórnkerfið, segir Albert Jónsson, fyrrverandi sendiherra Íslands í Rússlandi um hryðjuverkið í Moskvu. Ólíklegt er þó að þessi vanhæfni bíti á Vladímír Pútín forseta landsins. Evrópusambandið boðar ítarlega rannsókn á starfsemi nokkurra stærstu netfyrirtækja heimsins. Reynist þau brotleg getur sektin numið tíu prósentum af árlegri veltu þeirra - milljörðum dollara. Ríflega milljarður Jarðarbúa telst of feitur samkvæmt rannsókn sem unnin var á vegum Alþjóðaheilbrigðismálastofnunarinnar árið 2022, tvöfalt fleiri en í síðustu, sambærilegu könnun, sem gerð var 1992. Íslendingar fitna og þyngjast eins og aðrar þjóðir og reyndar meira en margir aðrir, eins og skýrsla OECD, efnahags- og framfarastofnunarinnar frá 2020 sýndi glöggt. Ævar Örn Jósepsson ræðir við Ölmu Möller landlækni.