將「要」改成「可以」的魔法/靈性父母教室/屬於香港媽媽的療愈

媽：你而家可以沖涼喇喎！仔：我唔沖！媽：嚟啦，我哋沖涼啦，媽媽知道你咩時間可以做咩㗎。😌喺香港大嘅我哋，就算最終真係成為咗一個乖嘅人或者有成就嘅人，有陣時都只係因為人哋叫我哋要咁做，其實我係咪真係想做乖嘅人呢？其實我係咪真係想做所謂有成就嘅人呢？我哋好似從來都冇得揀，老師話考試一定要攞A，老師話一定要讀大學。我哋長大嘅時代，有好多「要」。到最後我哋迷惘到，到底我自己係咪真係想做一個好人，我哋都唔清楚。唔好將呢種文化流傳落去啦，試吓響同小朋友嘅溝通，將個「要」字，改成「可以」。「咦，你玩咗咁耐，可以飲啲水喎。」「而家咁夜，你可以瞓覺喇喎。」當然，咩時間可以做乜嘢，係媽媽最清楚，所以都係媽媽話事嘅。呢個轉變字眼嘅過程，都係一種療癒自己嘅過程，作為香港長大嘅媽媽，我哋需要呢個療癒嘅過程。