Kristīne Zeltiņa: ir saimis, kur uora dzīduošona skaņ ari myusdīnuos

Par uora dzīduošonu dobā i tuos akustiku, par uora dzīduošonys tradiceju puormontuošonu i styprynuošonu stuosta uora dzīduošonys apvuiceibu projekta Rēzeknis nūvodā i dzīšmu kūpys „Prīkam i spākam” vadeituoja Kristīne Zeltiņa. Uora dzīduošona seņuok beja tolku dzīsmis, pavasara rūtuošonuos dzīsmis, gonu dzīsmis, vysys vosorā dzīdamuos dzīsmis, kas uorā tuoli skaņ. Latgolā, Rēzeknis nūvoda Feimaņūs pyrmū reizi nūtyka tradicionaluos uora dzīduošonys meistarklasis, kur dažaidu folklorys kūpu vadeituoji i daleibnīki praktiski vuicejās palaist bolsu puori pļovom i pakolnim. Latvejā uora dzīduošonu pietejuse Iveta Tāle i dobā tū jau vairuokus godus praktizej grupa „Saucējas”, niu Iveta Tāle Krystapilī ar kolektivu „Krāce” dzīd sieļu tautys dzīsmis uora dzīduošonys izpausmē, i niu kūpā ar Feimaņu dzīšmu kūpu byus ari sasadzīduošona Latgolā. Kristīne Zeltiņa Rēzeknis nūvoda Feimaņūs jau divus godus voda dzīšmu kūpu, i dzīžūt roduos leluoka iņterese par uora dzīduošonu. „Ar mani dzīduošona īt vysu dzeivi liedza i mudynoju cytus dzīduot. Kod sasapuļcējem ar Feimaņu dzīduotuojom, ideja beja dzīduot pošim i aicynuot dzīduot cytus leidza.” Rēzeknis nūvodā cylvākim datryuka kulturizgleiteibys, apvuiceibu taišni pīaugušajim, tai ari roduos ideja i projekts par dzīduošonys meistarklasem. „Uora dzīduošona napazuss, jei byus, mož vaira tiks skandynuota nu skotuvis. Tok Feimaņu dzīduotuoja Ērika ar bruoli tolkuos vēļ saīt i sadzīd nu vīna kolna da ūtram kolnam. Tī ir breineigi kolni, lejis, pūri, azari, jī var tī skaneigi pasaukt vīns ūtru i padzīduot, i atsasaukt preteimā. Ir saimis, kur tys vēļ ir.” Taipat Kristīne poša vuicās ari spieļuošonu iz kūklis, kas mudynuoje organizēt ari kūkļuošonys meistarklasi, kur sasatiks kai pīredziejuši kūklātuoji, tai ari pyrmuos reizis spālātuoji.