Latgaliskī teksti Latvejis i pasauļa literaturā - Annele Slišāne i Ligija Purinaša

Itūreiz pi myusu gostūs divejis literatis – Annele Slišāne i Ligija Purinaša. Obejis, vysu pyrma, nominātys Latvejis literaturys goda bolvai (LALIGABA) – Annele ar prozys izdavumu “tuoraga stuosti. pīns”, Ligija ar sovu ūtrū dzejis kruojumu “Pierobežas”. Itei ir vīna nu ratūs reižu, kod LALIGABA ‘garajā’ saroksta ir vasali diveji latgalīšu literatu dorbi latgaliski. Taipat juos obejis atrūnamys ari Latgalīšu kulturys goda bolvys “Boņuks 2022” nominantu treisdesmitnīkā. Runuosim par  bolvom, raksteišonu latgaliski i seve puorlikšonu ci tulkuošonu, par rūbežim, tekstim, ciparim i daudzi kū cytu. Obejis literatis byušonu Latvejis literaturys goda bolvys nominantu vydā viertej kai svareigu sasnāgumu latgalīšu literaturā i latgaliski raksteituo vuorda piļnvierteigu byušonu rādā ar latviski raksteitū. Turpynoj Ligija. “Konceptuali tys ir svareigai. Maņ ruodīs, ka itys ir vīns nu ratūs godu, kod ‘garajā sarokstā’ ir īkļauti diveji latgalīšu autori. LALIGABA nūteik divejuos kuortuos, kur vīns ir ‘garais saroksts’ i ūtrais ir ‘eisais saroksts’, kur tod ari ir tī nominanti, kuri sajims bolvys. Es naasu symtprocenteigi drūsa, bet varbyut pat, ka itei ir pyrmuo reize, kod ir diveji latgaliski rokstūši autori.” Annele izsver, ka mes vysi varim vysu kū viņ gribim, ari kliut par literatim. Jei poša atkluoj, ka sovu pasauli radz tekstūs. “Es pasauli saskotu tekstūs. Sevkurai lītai, vītai voi skotam maņ nav vīns vuords, bet gon vasals stuosts. Suocūt ar dečim, gon smarža, gon pats process radeja tū, ka es jūs panamu i sovys dūmys izlīku iz papeira. Par kotru lītu var pastuosteit. Nu dažaidu pušu i skotu punktu. Vizualizēt jū naviņ dorbūs, gleznojūt i aužūt, bet ari stuostūt par jū.”