Latgalīšu kulturys goda bolvai „Boņuks 2021” vēļ var dasaceit pretendentus

Vēļ leidz 10. janvaram var dasaceit pretendentus Latgalīšu kulturys goda bolvai „Boņuks” par padareitū 2021. godā. „Boņuks” ir  vīneiguo bolva, kura eipaši izceļ i gūdynoj sasnāgumus i padareitū latgaliskuos kulturys dzeivē. Par tū, cik aktivi ļauds šūbreid īsnādz dasacejumus, stuosta bolvys reikuotuoju puorstuove, Latgolys viestnīceibys GORS vadeituoja Diāna Zirniņa. „Juosoka, kai ir – tradicejis turpynojās i kai jau kotru godu leluokuo aktivitate ir pādejuos dīnuos. Tys zeimoj, ka 8. janvars, 9. i 10. ir tuos dīnys. Mes vysi gudri, vysi zynim, bet vāga ari izdareit, vāga dasaceit cylvākus. Vēļ, izmontojūt īspieju, gribīs pakužynuot i saceit: „Meilī latgalīši, draugi, veritēs, pīminit, kū jius asat skaitejuši, kaidūs pasuokumūs bejuši.” Koč ari ‘Covid’ gods, bet vys tik pasuocīni ir bejuši i ari latgaliskuos izpausmis Tī cylvāki, dareituoji ir peļnejuši myusu paļdis. Taipat ari padūmuosim, kas ir peļnejs bolvu par myuža īguļdejumu.” Bolvys pretendenta dasacejuma anketu vaicojit škārsteiklā: http://bonuks.lv i http://latgalesgors.lv. Latgalīšu kulturys ziņu portala lakuga.lv vadeituoja, aktivuo latgaliskūs projektu vierzeituoja Edeite Husare pīzeist, ka pārnejais gods latgaliskajā kulturā varātum īsazeimēt kai literaturys gods. „Goda suokumā mes vēļ dabovom drupeit 2020. goda ražu ar Annelis Slišānis „Tuoraga stuostim”, ar Sandrys Ūdris stuostim, ar Valentina Lukaševiča dzejūlim. Goda golā otkon vasala streipe ar taidom lobom, breineigom gruomotom latgaliski. Par kū maņ pošai ir leluoka prīca, jo es kai fanats tom latgaliskom lītom, kas ir praktiskuos lītys, cīši turu eikšus i ceru, ka vīns nu pretendentu iz „Boņuku” varātu byut arī Waze latgaliski, kuru aktivi lītoj na vin poši latgalīši, bet ari cīši daudzi puornūvodnīki. Tys ir tys, kū maņ grybātūs, kab latgaliskais vierzejās iz tom lītom, kurys mes kasdīnā, tai eipaši napīdūmojūt, vīnkuorši izmontojam. Es vēļ saceitu, ka uzplaiksnej sovu reizi interesanti projekti, kaidi nav bejuši: beja pyrmī radejis lasejumi, ir pyrmais plānuotuojs latgaliski pārnejā godā izdūts. Ka tai pasaver, Bolvu nūvoda latgaliskuo zeime ir viesturiska nūtikšona – tys latgaliskais pārneja godā ir bejs vysaids.” Īsnāgtūs dasacejumus jau janvarī suoks izviertēt latgaliskū kulturvidi voi attīceigū bolvys nūzari puorzynojūša žureja vysmoz 30 cylvāku sastuovā. Vīna nu ilggadejūs žurejis lūcekļu ir ari literate, publiciste Anna Rancāne, kura pīzeist, ka dorbs žurejā vysod ir sarežgeits, jo juoizavielej lobuokī nu lobuokūs. „Pārnejais gods beja pīpiļdeits ar taidu individualū dorbu, jo ir izguojušs daudzys vierteigys gruomotys, i es eipaši grybātu pasveitruot ari viesturiskūs pietejumus, maņ tī ir tai vaira tyvuoki pi sirds. Ruodīs, ka Latgolys viesturē mes niu daudzi kū jaunu īsavuicom i redzim. Ir jauni viesturnīki, kas ar tū struodoj i, prūtams, ari literati. Tys, kas ir cīši īprīcynūši, ka mes eimom na iz kvantitati, bet iz kvalitati. Vairs nasaprīcoj „vīnolga kas, ka tik latgaliski”.” Bolvys padūšonys ceremoneja byus 5. martā Latgolys viestnīceibā GORS ar tīšraidi LTV1. Sovpus vēļ itamuos breivdīnuos ari mes aicynojam jius byut aktivim, atsavērt iz pārnejuo goda latgaliskajom nūtikšonom i dasaceit tūs, kuri ir bejušs dareituoji.