Latgolys Televizejis sabīdreibai 30. godadīna

Juļa suokumā pyrma 30 godu Latgolā darbu aizsuoce „Latgales Televīzijas Sabiedrība" (LTS), kas Latvejā beja pyrmuo navaļstiskuo televizeja uorpus Reigys. Ambiciozi i puordrūši  jaunī censūni dreiži viņ tyka arviņ pamonamuoki televizoru ekranūs, nu kurim suoce skanēt ari latgalīšu volūda. Vyspopularuokuos beja LTS zinis, kulturys programa „Olūti”, kai ari Latgolys TV muzykys festivali Rēzeknē. Aktivuos desmit godu darbeibys laikā itei organizaceja deve naatsveramu gryudīni Latgolys kulturys atteisteibā, kai arī vītejūs īdzeivuotuoju pošapzinis ceļšonā. Tuos direktors beja reidzinīks Uldis Dvinskis, taišni jis beja tys cylvāks, kas 1990. goda golā izsaceja prīšklykumu veiduot Latgolā regionalu televizeju.  Pyrma nedelis, Rēzeknē, festivala parka teritorejā, kur sovulaik arī nūtyka LTS muzykys festivali, „Latgales Televīzijas sabiedrības” bīdri beja sasapuļciejuši, kaba īstateitu ūzulu, satyktu cyts cytu i daleitūs atmiņuos. Ite iz sarumu mes satykom tuolaika „Latgolys Televizejis sabīdreibys” direktoru Uldi Dvinski, ziņu dīnesta vadeituoju Silviju Joksti, kulturys raideijumu, tūs vydā ari raidejuma „Olūti” vīnu nu veiduotuoju Māri Justu, Modūnis videooperatoru Imantu Pulksteni, žurnalisti, producenti i arī tulkuotuoju Diānu Selecku, Daugovpiļs pusis korespondenti Santu Kaijaku i Ilonu Rupaini, kura sovulaik struoduoja pi LTS myzykys festivalu, žurnalistu i ziņu veiduotuoju Juri Saukānu. Te gon juopīzeimej, ka vysi itī cylvāki, taipat kai puorejī ituos televizejis darbinīki, beja entuziasma pylni i pošaizlīdzeigi beja gotovi dareit vysu, kū viņ vajadzēja kūpeigūs mierku sasnēgšonai i  izaugsmei.  Ar jim runojam gon par LTS pyrmsuokumim, tuo laika izaicynuojumim, nūzeimeigumumu i davumu iz prīšku.