Latvejis Radejai 100! I latgaliski ite skaņ jau 36 godus

Latvejis Radejai 100. Latgalīšu volūda radio ēterā ir jau trešdaļu godu symta. Pylnvierteigi tū radejis ēterā īnese kaids aizrauteigs latgalīts, radejis žurnalists i programu vadeituojs Bronislavs Spridzāns (1941–2014). Taišni jis veiduoja latgaliskū raidejumu „Latgolys Vuords”, kas da šam ir vysilguok skaniejs Latvejis Radejā, kur nu 1989. goda 2. apreļa da 2012. goda 11. oktobra dažaidūs kanalūs skanēje juo veiduotuos reportažys nu Latgolys i sarunys ar latgalīšim. Par ilggadejū Latvejis radejis žurnālistu, raidejumu vadeiduoju i redaktoru  Bronislavu Spridzānu, juo gataveitajim raidejumim latgalīšu volūdā i latgalīšu volūdys kaisleibu raidejumā stuosta juo dzeivisbīdre Biruta Eglīte i meita Aija Spridzāne. Latgaliskais raidejums „Kolnasāta” ēterā skaņ jau 13 godus – nu 2012. goda 20. oktobra. Par ituo raidejuma pyrmsuokumim stuosta profesore Lideja Leikuma i raidejuma pyrmuo produceņte Daira Zīle.   Latvejis Radejis pyrmuo regionaluo studeja Latgolā dorbojās jau dasmytū godu. Ar tuos izveidi Rēzeknē na viņ raidejums „Kolnasāta” puorsacēle nu Duoma laukuma Reigā iz Latgolu, kur niu tū gatavej jau cyta veiduotuoju grupa, bet Latvejis Radejis ēterā ir suokuši skanēt ari cyti raidejumi latgaliski, ari ziņuos ci kulturys programuos latgalīšu volūda skaņ aizviņ bīžuok, ite kotru godu teik raksteits ari diktats latgalīšu rokstu volūdā, i kūpā ar bīdreibu „Volūda” izveiduoti vairuoki radejis teatra lasejumi latgalīšu volūdā. Par tū, kai mainejīs latgalīšu volūdys svors ar Latgolys studejis īīšonu Latvejis Radejā, raidejumā stuosta studejis vadeituoja Renāte Lazdiņa.