Latvejis Radejis golvonuo redaktore, vuorkavīte Anita Brauna

Itūreiz iz sarunu asam aicynuojuši Latvejis Radejis golvonū redaktori, latgalīti Anitu Braunu. Sovulaik jei ir struoduojuse laikrokstā „Diena”, LTV ziņu raidejumā  „Panorāma”, žurnalā „Ir”, bejuse TV3 ziņu producente, kai ari Latvejis Radejā vadejuse pietnīcyskuos žurnalistikys daļu. Anita poša īt nu Vuorkovys, ite pabeigta ari vydsškola, niu jau lelu laiku dzeivoj i struodoj Reigā. Runuosim par tū, kai jai rodusēs interese par žurnalistiku, kai pasamej medeju lūma myusdīnuos i kara apstuokļūs, kaidi ir juos golvonī izaicynuojumi jaunajā omotā, kai ari daudzom cytom interesantom i svareigom lītom. „Golvonuo redaktora omotā es asu nu 1. marta, tai ka tei muna pīredze cikom nav lela. Es vēļ pyrmuos divejis nedelis siedieju iz diveju krāslu i paraleli turpynuoju vadeit ari pietnīceibys daļu. Leidz ar tū es vēļ tai eisti iz sovys uodys naasu izjutuse itū omotu… Izaicynuojumu pīteik, kai es beju īsadūmuojuse, ka tod, ka es suokšu struoduot, es tai mīreigai i pamateigai izdūmuošu, kas ir tī dorbi, mierki, kurus es grybu sasnēgt. Dzeivē vyss ir nūtics piļneigi cytaižuok. Ir sakrits tai, ka es suoku struoduot kara laikā, kara apstuokļūs i tei medejim ir piļneigi cyta situaceja. Leidz ar tū, vajag tagad paleidzēt žurnalistim nūsaorientēt, kai mums niu struoduot. Jo, ka pyrma tam tys standarts žurnalistika beja taids, ka tu uzklausi vīnu pusi, uzklausi ūtru pusi i tod tys tovs raidejums voi roksts tūp. Niu mes zynim, ka kara vīna puse faktiski tikai maloj i izplota propagandu. Tu navari tū vysu atskaņuot i izalikt, ka vyss ir kuorteibā. Ir juospiej koč kai pasceit, ka tei ir propaganda i tī ir mali. Parosti žurnalisti itai nadora. Tys vaicuojums ir taids, kai itūšaļt atrast balansu. Tys ir vīns nu vaicuojumu, ar kuru es itūšaļt nūsajamu, kai arī kiberdrūseiba.” Anita pīzeist, ka juos ilgtermeņa vīzeja ir taida, ka piec īspiejis vaira cylvāku Latvejis Radejis veiduotajā saturā var atrast koč kū deļ seve. „Kaba tys, kū mes dorim radeitu sajiutu, ka tys jim ir svareigs i interesants i jī grybātu klauseitīs. Vīnolga, voi tys ir radejis viļņūs, voi škārsteiklā.”