Laurys Putānis latvyskuos identitatis i pīdereibys vaicuojumi Vuocejā, Štutgartē

Pyrma kaida laika Ēriks Zeps gastēja Vuocejis dīnavydu pusē, Štutgartē, kur jau padsmit godu dzeivoj i aktivi dorbojās latgalīte, latvīšū tautys deju kolektiva „Trejdeksnītis” veiduotuoja i vadeituoja, bīdreibys „Saime” vadeituoja, sovulaik ari vīna nu „Latgolys radejis” etera personeibu – Laura Putāne.  Par Laurys latvyskuos identitatis i pīdereibys vaicuojumim i atrasšonu Vuocejā, Štutgartē. „Laikam jau taisneiba, ka mums vysim, latvīšim, kuri nūbrauc dzeivuot iz uorzemem, ir tai, ka tu jau naesi aktivs izreiz. Kaidam paīt gods, kaidam diveji, kaidam vairuok ci mozuok. Es poša tikai piec kaidu treju godu suoku saprast, ka koč kuo maņ datryukst. Voi maņ tryukst doncuošonys, voi latvīšu, voi maizis, voi kaida cyta gorduma voi lītys. I tod es vīnā dīnā īsadūmuoju, ka juopasaver, voi ite ir vēļ kaids latvīts. Tai ir, ka dŗūsai viņ kotram atīt cyts laiks, kod gribīs otkon tūs latvīšus i latvyskuos aktivitatis.” Vaicuota par tū, kai īsadzeivuot i byut sovejam cytā zemē, Laura pīzeist ka tys nav vīglai. Juoizīt cauri zynomim pūsim i juopījem lītu byuteiba. „Mes vysi izīmam ari taidam breižam cauri, kod tu nikur vaira naesi sovejais. Tu vēļ naesi sovejais tymā cytā zemē i tu vaira naesi sovejais Latvejā. Tys ir gryuts. Es nazynu, tys varbyut ir cyts stuosts, bet ari par tū, kod tu atsagrīz Latvejā, voi tev ir kur atsagrīzt. Voi tev ir tei sova sāta, sova vīta. Daudzi stuosta, ka jī ir kai iz koferu, nu vīna drauga pi ūtra, vēļ mama i tāta pa vydam. Beigu golā tev pat nav sovys personeiguos gultys, kur palikt i skapeiša, kurā maiceņu īlikt. Suopeigi saceit, tys ir varbyut taids napateikams puordūmu laiks, i ta tu vaicoj, kur tod tu vari pīderēt. Voi tu vari meklēt tū pīdereibu otkon Latvejā.  Varbyut bīžuok braucūt, bīžuok uzturūt sakarus, voi ari tev juvaicoj tei pīdereiba ite. Voi, varbyut, tys rysynuojums ir tei pīdereiba latvyskajā vidē ite, svešā zemē. Jo mes vysi tī asam taidā situacejā, kaidā asam. Taida sova mozuo saleņa, tai saceit.” Pi Laurys latvyskom saleņom ite, Vuocejā, nūteikti var pīskaiteit kai latvīšu tautys deju kolektivu „Trejdeksnītis” Štutgartē, tai vēļ vīnu deju kolektivu Frankfurtē, kai ari dorbuošonūs brīdreibā „Saime”. „Bīžai ir tai, ka tu tū latvyskū vaicoj vysur. Tu ej pa īlu, i ka tu izdzierdi veikalā latvīšu volūdu i napazeisti tū cylvāku, tev gribīs jū uzrunuot, vaicuot, kas tu taids, voi tu ite dzeivoj, varbyut īsi doncuot. Tev izreiz gribīs jū iviļkt sova bareņā.” {module widgetid="4" id="media" action="galleryitem" galleryid="1105" layoutid="49" layout="singlegallery" static=""}