Lazdānu saimē zemiņu audziešona ir kai hobejs ar pīvīnuotū vierteibu

Zemiņu audzātuojim sezona ir nūsaslāguse. Kaida tei ir bejuse Preiļu nūvoda Lazdānu sātys ūgu saiminīkim i gols golā, voi pošlaseituoji ir gūdeigi ļauds, dazynuoja Laura Sondore. “Lazdānu mājas ogas” saimineica Sanita Anspoka izsver, ka nav taidys vīnys, lobuokuos škirnis, kuru audzēt. “Maņ bīži aizdūd vaicuojumu, kura ir tei soldonuokuo, voi kura ir tei gorduokuo, eistineibā kotram sova. Nav taidys favoritis.” Pyrma pīcu godu Sanita i Juoņs Anspoki puormaineja piļsātu pret lauku saimisteibu Preiļu nūvoda Saunys pogostā i suoce saimnīkuot Juoņa vacvacuoku sātā. Turpynoj Sanita. “Mes gribējom, lai myusu bārni aug laukūs. Veiram beja vacvacuoku sāta juo eipašumā, i saprotom, ka mums ir resurss, zeme. Dūmuojom, kū varātum īsuokt, i pasagrīze taida īspieja, kai izraksteit projektu, kas ir mozajim lauksaimnīkim, i niu mes veiksmeigai jū realizejam. Dūmuojom pyrms projekta raksteišonys, kū mes poši gribim dareit, i daguojom pi sacynuojuma, ka tuos ir zeminis, bet mes audzejam drupeit ari arbuzus, kazenis, avīškys.” Sanita i Juoņs zeminis audzej treis godus. Pyrmais zemiņu hektars kod jau palaists atsapyust, sūpluok sastateits jau jaunais. I lai ari itymā godā vyssmoguokūs puorbaudejumus atnese laikapstuokli i ari zemiņu kaitiekli, Sanita i Juoņs Anspoki cīši nasažāloj, zemiņu sezonys nūslāgumā sareikoj Latgolā pyrmū zemiņu festivalu i ar tuolejūšim plānim, kurūs vys nagribēja eistyn atkluot, verās iz prīšku. Turpynoj Juoņs. “Maņ ruodīs, ka mes asam truopejuši desmitnīkā, jo mums pošim pateik tū dareit i ir gandarejums, jo cylvāki brauc i atbolsta ar lobim vieliejumim i lobim vuordim, i tys mums dūd energeju dorbuotīs tuoluok.” Lazdānu sātys teirumūs zemeņu sezona nūsaslāguse, bet tys nanūzeimoj, ka dorbs beidzās – Anspoku saime jau verās kaida avīšku i kazeņu raža i kai paauguši arbuzi i kirbi. {module widgetid="4" id="media" action="galleryitem" galleryid="1370" layoutid="49" layout="singlegallery" static=""}