le agasala e faalumaina 2 (Sin is a reproach 2)

OPEN HEAVENSMATALA LE LAGI MO LE ASO LULU 4 MATI 2026(tusia e Pastor EA Adeboye) Manatu Autu:  O le agasala e faalumaina 2 (Sin is a reproach 2)Tauloto Tusi Paia: Esoto 20:5 “aua ‘e te ifo i ai, ‘aua fo‘i ‘e te ‘au‘auna i ai; auā o a‘u o le ALI‘I lou Atua, o le Atua fuā, o lē taui atu i fānau o le amioletonu a o latou mātua, e o‘o i le tupulaga e tolu ma le fa o ē ‘ino‘ino mai ‘iā te a‘u.”Faitauga - Tusi Paia: 2 Tupu 5:20-27O ananafi, na ou talanoa atu o le agasala a se tagata, e faalumaina ma o’o ai o ia i le pogisa. O le asō, o le a ou talanoa atu i agasala a matua, e mafai ona taofia latou fanau ma augatupulaga e tupuga mai ai, e maua ma fiafia i faamanuiaga a le Atua. O agasala a tagata e tutupu mai ai faafitauli e tuufaasolo i augatupulaga. O lona uiga o nisi tagata e matua pagatia o latou tulaga i le taimi nei, ona o agasala na faia e o latou matua. I le faitauga mai le Tusi Paia o le asō, na faataga e Kiasi le matapeapea e faia ai le agasala, ae na folafola e le tagata o le Atua le fetuu ia te ia ma ona suli, ua faapea atu, ‘O le a pipi‘i atu ai ‘iā te oe ma au fānau le lepela o Naamanu i āu tupulaga’. I aso anamua, aemaise i Aferika, e masani ona suesue lelei aiga o tagata e fuafua e faaipoipo i ai latou fanau ae lei faaipoipo. Mo se faataitaiga, e latou te suesue pei iai se talaaga o le ma’i maliu, lepela poo le ulu leaga i aiga o lea tagata, aua latou te iloa afai e iai ni tulaga faapea, e mautinoa e toe aliae mai i le isi augatupulaga. E iai taimi, o le agasala a le tagata e aafia ai lana fanau ao soifua pea o ia. O se faataitaiga o Akana i le Iosua 7:1-26. O lona matapeapea na lē usitai ai i le Atua, peitai na tauai ai lona aiga i maa ma faaumatia, na aafia ma maua e lana fanau le taui o se agasala latou te lei faia. O Eli o seisi tagata na faatamala ma tuulafoai lana fanau e lē aoaoina, na matua aafia ai ona suli (1 Samuelu 2:27-36). I le tele o tausaga na mavae talu ona fetuu le aiga o Eli, na taunuu ia Aviata, ua tulia ese mai le avea ma ositaulaga sili, e lē faapea o se mea na ia faia, ae ona o le upu a  le Atua e faasagatau ia Eli, o se tasi o ona tuaā (1 Tupu 2:27). E ese mai i fetuu e mafai ona maua mai matua o se tagata, o soo se tagata a na te lei talia Iesu Keriso e avea ma ona Alii ma Faaola o loo i lalo o se fetuu e afua mai ia Atamu ma Eva, o uluai matua o le uluai tagata. Le au pele e, ou te manao ia e iloa, na afio mai Iesu e faasaoloto iai latou o saisaitia, ma e aofia ai ma le soloia o tala o fetuu tuufaasolo i lou aiga. Afai o loo e tau ma fetuu tuufaasolo i augatupulaga po’o ni faaletonu o loo tutupu pea i lou aiga, e mafai ona faasaolotoina oe i le asō i le suafa o Iesu. Ole ma alaga atu i le Atua, e faaumatia e lona malamalama soo se faafitauli na tutupu mai i agasala a ou matua ma tuaā. A e liliu ia Iesu ma lou loto atoa, e na te faaulufale atu oe i lona aiga e faamamāina ma faasaolotoina mai fetuu, i le suafa o Iesu, Amene.