Līgys Romančukys sapyna pīpiļdejums caur „Vuškeņu iz pļovys”

Jau pyrma nedelis raidejumā stuostejom par pārnejuo goda golā izguojušū dzejūļu gruomotu bārnim „Vuškeņa iz pļovys”. Sovpus itūreiz pīduovojam sasatikt ar gruomotys muokslineicu Līgu Romančuku, kurei kasdīnā ir pamatā nūdarbynuota ar vidis atteisteibys planavuošonu Rēzeknis nūvodā, kai ari diveju bārnu audzynuošonu.   „Kasdīnā es struodoju vaļsts puorvaļdē i vēļ vīnā firmā, kas pīduovoj miernīceibys i zemis īreiceibys pakolpuojumus. Pamatā tys ir dorbs ar atteisteibys planavuošonys dokumentiem, lykumim, cytim normativajim aktim i dokumentim i cytom nūpītnom lītom. Paraleli tam, kaba pabaruotu sovu rodūšū goru, kas manī īškā vysu laiku kustīs i deiduos i navar nūsēdēt mīrā, tod pa reizei es vaicoju īspiejis ci dzeive poša pīduovoj īspiejis koč kū padareit ari rodūšajā jūmā: koč kū pazeimēt, pakruosuot i pasadauzeit ar ūtom.” Dorbs pi gruomotys „Vuškeņa iz pļovys” Līgai ir bejs sova veida sapyna pīpiļdejums. „Tys ir bejs sapyns jau pādejūs desmit godu, kod es pi seve kluseibā dūmuoju i beju izfantaziejuse, cik labi byutu, ka es koč kod varātum ilustrēt gruomotu bārnim. Puosoku ci dzejis gruomotu. I eistyn – sapyni pīsapylda!”