Marcos Fernández: "N'Andecha Astur tamos percontentos cola esperiencia nos Alcuentros Internacionales en Bilbo"

Güei'l nuesu convidáu nos micrófonos d'InfoAsturies Radio ye Marcos Fernández de la organización política asturiana Andecha Astur. Una dellegación d'Andecha Astur participó nos Alcuentros Internacionales: "Frente a la Troika la nuesa vía. Cambiu y Soberanía Nacional" Entamaos por EH Bildu, tuvieron llugar el pasáu dos de marzu, y nellos participaron organizaciones polítiques que comu Andecha Astur comparten una visión radicalmente crítica con respeutu al modelu d’integración europea. Ente otros participaron representantes del Sinn Féin (Irlanda), Syriza (Grecia), UDB (Bretaña), Bloco de Esquerda (Portugal), Sinistra Ecologia Libertà (Italia), Die Linke (Alemaña) y representantes d’otros pueblos y naciones. Estos Alcuentros permitieron conocer de primer man les lluches ya iniciatives desendolcaos n'estremaos países escontra la Troika y les polítiques d'austeridá.