Muzeju naktī Preiļūs atkluos muokslinīka Juoņa Gleizda pīminis ustobu

Jau itamā nedelis nūgalē vysā Latvejā gaidomi Muzeju nakts pasuocīni. Piec diveju godu puortraukuma gondreiž 200 muzeji, teatri, bibliotekys i citys kulturys dzeivis īstuodis organizēs vysaiduokys aktivitatis sevkuram apmaklātuojam. Par muzeju nakts nūtikšonom Latgolā mums pastuosteis Ausma Sprukte. Latgolā vīna nu golvonūs nūtikšonu byus Preiļūs, kur Igors Pličs sovā sātā i tūpūšajā fotomuzejā atkluos legendarajam Latgolys fotografam Juoņam Gleizdam veļteitu pīminis ustobu. Medalis i diplomi nu pīsadaleišonys vaira nakai ostoni symti fotoizstuodēs vysā pasaulī, viesturiskys līceibys, dokumenti, kai ari originali pīroksti i zeimiejumi – tū vysu i daudzi kū cytu niu varēs apsavērt i izzynuot foto muokslinīku legendys Juoņa Gleizda pīminis ustobā Preiļūs. Tuos autors ir Latgolys fotografu bīdreibys vadeituojs i foto viesturis pietnīks Igors Pličs, kurs niu sovā sātā taisa ari Latgolā pyrmū fotomuzeju. Par apkūpuotū dorbu unikalitati i īskotu Juoņa Gleizda daiļradī turpynoj Igors Pličs. “Juoņs, prūtams, ir pasaļa mārūga slaveneiba, fotomuokslinīks. Jis pyrmais Latvejā suoka nūsadorbuot ar tū žanru, kū sauc par aktu, kas Padūmu laikūs beja tabu, taids kai aizlīgums, jo tū uzskateja par pornografeju. Bet jis, cylvāks, atroda modelis, tymā skaitā sovu sīvu. Fotografēja, syuteja iz uorzemem, tur sajēme medalis, apbolvuojumus. Unikals cylvāks, legendars cylvāks!” Juoņs Gleizds beja ari pyrmais fotografs Latvejā, kas dorbuojās ar izohelija metodem. Pi tuo da 24 godu vacuma pyrma kliva par invalidu i palyka bez plaukstu, jis beja ari muokslinīks. I ari piečuok pyrma fotografēt bīži viņ sovys idejis izzeimuoja – izsver Igors Pličs. “Maņ tagad ir pīruodejumi! Es atrodu būrtneicys, kur ir teišom zeimiejums ar lūdeišu pyldspolvu, bet jis sovys dūmys, sovys idejis, kas dūmuots izohelijai, kas kaida gaismai, kas kurymā vītā.  Juo pīroksti tod kod jis vēļ nabeja invalids, leidz 24 godu vacumam, kai jis gleznuoja, juo gleznenis atrostys, unikali dorbi. Kod pyrmuos juo dzeivūklī īraudzeju storp papeirim, es dūmuoju, ka kaut kaidys poligrafiski nūdrukuotys biļdis. Izaruoda – nā, apakšā ir J. G., Juoņs Gleizds, tai ka tys ari unikums, kū vajadzātu redzēt Juoņam, ka jis beja muokslinīks.“ Foto viesturis līceibu saglobuošonu Igors Pličs uzskota par sovu miseju. Ari līceibys par Juoni Gleizdu i juo dailradi jis sovā ziņā ir izgluobs nu aizīšonys pūstā. Juoņam Gleizdam veļteituos pīminis ustobys atkluošona ir vīns nu centralūs nūtykumu Latgolā Muzeju nakts pasuocīņu gaitā. Pavysam vysā Latvejā durovys itūnakt vaļā atdareis 190 kulturvītys. Jūs vydā ari Bolvu nūvoda muzejs ar varūnim i mūzom veļteitom aktivitatem. Vaira stuosta – muzeja vadeituoja Iveta Supe. “Varūņu tema byus apsaverama kai caur Latgolys parizanu pulkam veļteitū ekspocizeju, taipat ir taida unikala līta, kuru mes asam deponējuši nu Vaļsts kara muzeja –Latgolys partizanu pulka kryušu nūzeimeite. Zemissardzis 31. kuojinīku bataļjons demonstrēs sovu militarū ekpipejumu, byus tehnikys izstuode, byus vysaidys aktivitatis.” Sovpus leluokuo viereiba muzejūs, bibliotekuos i cytuos kulturvītuos byus pīvārsta muokslys i tielnīceibys dorbu izstuožu atkluošonai, kai ari muzykalim puorsteigumim. Muzeju nakts Latvejā šudiņ nūteik kluotīnē piec diveju godu puortraukuma. Itamā reizē kotra kulturvīta izalaseja sovu tematiku, viņ apmaklātuoji aicynuoti publicēt īrokstus socialajūs teiklūs ar devizis temturi #TiksimiesTagad. Vysu pasuocīņu programa i karte atrūnama škārsteikla lopā www.muzeju-nakts.lv. {module widgetid="4" id="media" action="galleryitem" galleryid="1240" layoutid="49" layout="singlegallery" static=""}