O le ofu tau o le malamalama 2 (The amour of Light 2)

OPEN HEAVENSMATALA LE LAGI MO LE ASO LULU 7 IANUARI 2026(tusia e Pastor EA Adeboye) Manatu Autu:  O le ofu tau o le malamalama 2 (The amour of Light 2)Tauloto Tusi Paia: 1 Peteru 3:9 “Aua le taui atu le leaga i le leaga, po’o le agatele mai i le agatele atu; a ‘ia ‘outou fa‘amanuia atu, ‘ina ‘ua iloa o le mea lenei na vala‘auina ai ‘outou, ‘ina ‘ia maua e ‘outou le manuia.”‭‭Faitauga - Tusi Paia:  Roma 13:12-14O ananafi na ou talanoa atu e tatau ona tatala lou loto i le malamalama o le Atua ae aua le faatagaina le loto tigā e siomia oe. A e ita ma loto tigā i soo se taimi e faatigā ai seisi ia te oe, o loo e tatalaina lou tagata i osofaiga i le agaga. Afai e te iloa ma vaai atu i mea o loo faatigā pe olegia ai oe, o le a e malamalama, o le vaega autu o loo taulai iai ia faiga, o lou loto. E manao le tiapolo e te faatagaina le loto tigā i lou loto, aua a ia fana atu ana ū fanafana ia te oe, e iai le vaega e tu ai. O le tele o taimi, a taumafai atu au tau a le tiapolo e osofaia se kerisiano ae lē manuia, o le a latou faia mea uma ina ia ita ai lea kerisiano. A mafai ona latou faaoso lona ita ma sosoo ai ma le loto tigā, o le a taunuu loa a latou osofaiga. O le mafuaaga lea e tatau ai lava ona e ofuina le ofu tau o le malamalama ma aua nei faatagaina le ita ma le loto tigā e totolo atu i lou loto, e mo lou lava puipuiga. O soo se taimi e iloa ai e le tiapolo se tagata e le mafai ona ia faaita pe faatigā i lona loto, o loo ia vaai atu i se tagata ua manumalo ia te ia. I le 1 Samuelu 18:14, fai mai le Tusi Paia, na faautauta Tavita i ana amio uma. O lona uiga na ia alo ese mai so’o se mea e faaleaga ai lona loto. E oo i le taimi na taumafai ai Saulo e fasioti ia te ia, e lei ita pe tetee atu ia Saulo. I le 1 Samuelu 24:2-7, sa ia maua le avanoa e fasiotia ai Saulo, peitai sa ia ooti na o se pito o lona ofu. Ina ua ia faia lea mea, fai mai le Tusi Paia na matua ootia lona loto. O loo faaalia ai o ia o se tagata, o lona ofu tau o le malamalama o loo atoatoa. O le iuga, na iu ina faauuina o le tupu, e pei ona fuafuaina e le Atua. Ou te talitonu ana ia fasioti ia Saulo, semanu e lē avea ma tupu e ui o le uluai fuafuaga lea a le Atua mo ia. Afai e te manao e taunuu fuafuaga a le Atua mo oe, aua e te faatagaina le loto tigā i lou loto, ‘aua e te tuu avanoa i le tiapolo e fasiotia lou taunuuga manuia. A le taui ma sui atu se kerisiano iai latou o faatigā mai, ae liliu atu ma faamanuia iai latou, e taua e le lalolagi o se vale, peitai o loo ia malamalama lelei lava i lana mea o faia. O ia kerisiano o le a faaeteete ina ia aua lava nei latou faatagaina sina taimi e ita ma loto tigā ai e lavelavea lo latou lumanai manuia i le Atua. Le au pele e, aua e te tuu avanoa i le tiapolo i lou olaga, ia faatumauina lou ofu tau o le malamalama ina ia e ausia le taunuuga manuia mai le Atua. Puipui lou loto mai le ita ma le tigā ina ia aua lava nei e misia lou lumanai manuia o loo i ou luma, i le suafa o Iesu, Amene.