Pietnīks Aigars Lielbārdis – nūmalēs ir lobuoka tradicionaluos kulturys augsne

Ar Latvejis Universitatis Literaturys, folklorys i muokslys instituta pietnīku Aigaru Lielbārdi sasarunoj raidejuma vadeituojs Ilmārs Dreļs. Runojam par folklorys tradicejom Latgolā, kai ari drupeit par būršonūs.  Latgolā kai šudiņ, tai ari viesturiski ir vysvaira folklorys i etnografiskūs ansambļu. Ar kū tys skaidrojams i kai nūris tradicionaluos kulturys puormontuošona Latgolā? Aigars izsver, ka ite ir svareigi runuot par kulturys pīredzi i puormontojameibu konkretajā vītā, kai ari tū veicynūšim faktorim. „Dzeivisveida puormontuošonu. Tradicionaluos kulturys zynuošonu puormontuošonu. Voi tei nūteik. Prūtams, ka Latgola ir sovpateiga, ostoņdesmitajūs godūs ite beja vysvaira etnografiskūs ansamblu i folklorys kūpu, bet ari Kūrzeme itamā ziņā ir boguota. Vīns nu īmesļu, deļkuo tys tai ir, ari pīminūt Timofejevkys cīmu Sibirī, tradicionaluo kultura i volūda lobuok sasagloboj vītuos, kurys nav tyuli centram, lelom magistralem. Nav tyuli taidom uorpus ītekmu magistralem. Timofejevka beja 70 kilometru nu tyvuokuo centra, pa naizbraucamu ceļu rudinī i zīmā. Latvejis nūstyuri, tī ir Kūrzemis dīnvydi, Alsunga i tei puse, sovpus ūtra puse tei ir Latgola, Zīmeļlatgola, kur mozuok jiutama uorpus ītekme i ir lobuoka tradiocionaluos kulturys augsne.”