Puipuia e lona afi (Shielded by His Fire)

OPEN HEAVENS MATALA LE LAGI MO LE ASO TOONAI 17 OKETOPA 2026 (tusia e Pastor EA Adeboye) Manatu Autu: Puipuia e lona afi (Shielded by His Fire) Tauloto Tusi Paia: Teuteronome 9:3 “Ia e iloa fo‘i i le aso nei, o le ALI‘I lou Atua, o ia na te sopomua atu ‘iā te oe, o le afi ma‘ama‘ai o ia, na te fa‘aumatia i latou, na te fa‘ato‘ilaloina fo‘i i latou i ou luma; ‘e te tulia fo‘i i latou, ma vave fa‘aumatia i latou, fa‘apei ‘ona fetalai mai o le ALI‘I ‘iā te oe.” Faitauga - Tusi Paia: Esoto 14:19-24 Auā o lo tatou Atua o le afi ma’ama’ai ia(Eperu 12:29). E i ai se tulaga e mana’omia ona e malamalama ai fa’atatau I le afi; soose taimi e pa’i ai i se mea, na te liua ai lea mea ia te ia lava. Afai e pa’i I se fasi ieie ma amata ona mu, ona faapea lea o le fa’aupuga ua pu’e e lea ieie le afi. E faapena fo’i pe a pa’i le afi i le laupapa, o le a mumū le laupapa ona tā’ua lea o lea laupapa o le fafie. Faapena fo’i so’ose tasi o se atalii poo se afafine o le Atua le afi ma’ama’ai, e mautinoa le puipuia e lona afi. I le Sakaria 2:5; fai mai le Tusi Paia, “O a’u fo’i, ua fetalai mai le Alii, e fai a’u ma pa afi e si’osi’o ai e fai fo’i a’u ma pupula i totonu ia te ia.” I le Faamasino 15:14-15; o Samasoni sa fusifusia i maea fou e lua ma sa tuuina atu o ia i lima o ona fili. Na manatu ona fili ua o latou faaumatia ia te ia peita’i na o’o ifo le afi a le Atua i ona luga ma le malosi ma mu ai maea. Ua tau mai e le Tusi Paia ia i tatou na fasiotia e Samasoni se to’a afe o i latou mulimuliane. Le au pele e, ou te folafola atu i le asō, o le afi ma’ama’ai, o le a tau ma so’ose tasi e ono taumafai e faapologa oe i so’ose ala I le suafa o Iesu. I le Tanielu 3:1-30; o se tala lauiloa faatatau ia Sataraka, Mesako ma Apeteniko na lafoina i totonu o le afi aasa ona na mumusu e ifo e tapua’i i le tupua auro a le tupu. Na mata’utia le vevela o le afi na maliliu i latou na lafoa taulelea e toatolu i totonu. Peita’i ona sa auai le Atua faatasi ma I latou, na o maea na saisai ai I latou na mu. O le afi ma’ama’ai na fai ma o latou talitā mai le afi aasa ma na omai I fafo mai le afi e aunoa ma se afaina. Ou te manatua le ta’utinoga a se tasi o o’u atalii na ia talia le faamanatuga Paia I se tasi o a matou sauniga o le Agaga Paia, muamua na fiu fomai e tau saili le faapogai na tigā ai totonu o lona fa’aī (tulou). Peita’i ina ua uma ona ia talia le Faamanatuga Paia, na faaumatia e le afi ma’ama’ai le faapogai o lona tigā, ma na faamaloloina atoatoa o ia. Ou te folafola atu, o so’o se mea e lei tuua e lou tamā i lou tino o le a liaina ma faaumatia e le afi i le suafa o Iesu. I le tusi faitau mai le Tusi Paia o le asō ua tatou iloa ai o le afi ma’ama’ai o se malamalama ma o se talipupuni i le fanauga a Isaraelu, a’o se fa’afanoga i tagata Aikupito. Le au pele e, afai e te mana’o e avea le afi ma’ama’ai ma ou malu ae lē o sē e faaumatia e ia, e ao ona e auai i lana au tolauapi. E te auai I le togalauapiga a le Alii? Tatalo Tamā faamolemole avea oe o se pa o le afi faataamilo ia te a’u ma lo’u aiga I le suafa o Iesu, Amene.