Rēzeknis tautys teatra sasnāgumu recepte vaicojama komandys dorbā

Ar pyrmuo Latgolys latvīšu amateru teatra – Rēzeknis tautys teatra niulinejū režisori Māru Zaļaiskalns, scenografi, kostimu muokslineicu i aktrisi Ināru Apeli, kai ari akteri Aldi Leidumu runuosim par dzeivi i dzeivi teatrī. Raudzeisim dazynuot, kaida ir lobys izruodis recepte i kai Rēzeknis tautys teatram arviņ īsadūd sajimt vysaidus gūdolguotus apbolvojumus i atzineibys. Septembrī Latvejis Nacionaluo kulturys centra reikuotuo Latvejis Amaterteatru īstudejumu skate “Gada izrāde 2021” atnese streipi gūdolgu Rēzeknis Tautys teatram. Jūs izruode “Sibīrijas haiku” tyka par ūtrū lobuokū amaterteatra īstudejumu 2021. godā. Režisore Māra Zaļaiskals pīzeita par “Goda režisori”, aktrise i scenografe Ināra Apele par “Goda scenografi”, taipat Rēzeknis tautys teatra akteri sajēme apbolvuojumu par lobuokū ansambļa spieli izruodē “Sibīrijas haiku”. Ilggadejuo tetra režisore Māra Zaļaiskalns izsver, ka taišni niu, jaunuos sezonys suokumā, kod teik vaicuots jauns repertuars, interesentim ir eistais laiks, kod raudzeit pīsavīnuot Rēzeknis tautys teatra akteru puļcenam, ka ir rodusēs taida gribiešona. Vystik itam lāmumam juopīīt ar atbiļdeibu, pībiļst režisore. „Vajag vīnkuoršai atīt pi mane, taipat kai sovulaik atguoja Aldis. Bez šaubu, taidā apzynuotā vacumā, kod cylvāks ir atbiļdeigs. Īīt teatrī nimoz nav tik vīglai, vyspuor, īīt varbyut ari ir vīglai, bet palikt, byut gon nā. Teatra muokslā tys process ir ilguoks, bet cylvākm gribīs uzastuot i jis varbyut vaira nagryb īsadzilinuot procesā… Es veidoju repertuaru atkareiba nu tūs cylvāku, kas ir īguojuši. Aiz tuo kotru rudini sasazynojam i saprūtam, kurs ir gotovs godu atdūt teatram. Deļtuo niu ir vysā gryuši atrast jaunus cylvākus… Kod atīt kaids cylvāks, kurais gryb dorbuotīs teatrī, es jam savaicoju vītu kaidā izruodē  i mes suocam struoduot.” Rēzeknis tautys teatrī nu dorba breivajā laikā dorbojās vysaidu profeseju puorstuovi, kas īstudej latvīšu, latgalīšu, kai ari uorzemu autoru dorbus.  Taipat jau nu 2000. goda kotru ūtrū godu itys teatris Rēzeknē reikoj Storptautyskū teatra festivalu „Soli pa solim”.