Riða, hvalveiðar, kynstaðfesting, sjúkrarými, blóðmerar og bókmenntir

Spegillinn 10. maí 2023 Umsjón: Ævar Örn Jósepsson Tæknimaður: Magnús Þorsteinn Magnússon Stjórn fréttaútsendingar: Annalísa Hermannsdóttir Matvælastofnun hefur krafist þess að bændur sem eiga fé frá Syðri-Urriðaá afhendi það til sýnatöku í næstu viku. Bóndi segir þetta koma sér á óvart, þar sem tilkynnt hefði verið að ekki yrði skorið meira fyrr en síðar í sumar. Utanríkisráðherra segir siðferðislega réttlætanlegt að stunda sjálfbærar hvalveiðar eins og aðrar veiðar. Hvalveiðimenn verði hins vegar að tryggja að dýravelferðar sé gætt. Íslensk heilbrigðisyfirvöld hafa samið við sænskt sjúkrahús um að gera kynstaðfestingaraðgerðir. Löng bið er eftir þjónustu og transmiðstöð er í bígerð. Á Sjúkrahúsinu á Akureyri hefur verið gripið til þess ráðs að senda aldrað fólk á önnur hjúkrunarheimili og deildir í nágrenni Akureyrar. Eftirlitsstofnun EFTA segir Ísland brjóta reglur með því að skerða atvinnuleysisbætur á meðan dvalið er tímabundið í öðru landi Evrópska efnahagssvæðisins. ---- ESA, eftirlitsstofnun EFTA telur að með reglum um blóðtöku úr fylfullum merum séu íslensk stjórnvöld að brjóta gegn tilskipun Evrópska efnahagssvæðisins um vernd dýra sem notuð eru í vísindaskyni. Björn Malmquist ræddi við Árna Pál Árnason i yfirstjórn ESA um þess áminningu. Stuðningsfólk Imrans Khans, fyrrverandi forsætisráðherra Pakistans, hefur mótmælt því með ofsafengnum hætti víðs vegar um landið í gær og í dag að hann var handtekinn í gær og hnepptur í varðhald. Ákæruvaldið krafðist þess að hann yrði hafður í gæsluvarðhaldi í að minnsta kosti tíu daga vegna rannsóknar á spillingarmáli sem hann er sagður tengjast. Dómstóll í höfuðborginni Islamabad féllst í dag á að hann yrði bak við lás og slá í átta daga. Hann á að koma fyrir rétt ekki síðar en sautjánda maí. Íslendingar stæra sig gjarnan af því að vera mikil bókaþjóð, og almenn samstaða virðist vera um mikilvægi þess að viðhalda íslenskri tungu og að íslenskar bókmenntir - ekki síst barnabókmenntir - gegni lykilhlutverki í þeirri baráttu, að minnsta kosti í orði. Á sama tíma er það vinsælt sport að agnúast út í starfslaun listamanna og látið í veðri vaka að þau séu annaðhvort óþarfa bruðl eða aumingjastyrkur, nema hvorttveggja sé. Í gær var efnt til málþings undir yfirskriftinni Bókmenntir á tímamótum. Margrét Tryggvadóttir rithöfundur og formaður Rithöfundasambandsins flutti þar erindi og titill þess var stutt og laggóð spurning: Ná höfundar endum saman?