Romana “Bruoli” radejis īstudiejuma režisors K.Rasims: jū lyku kūpā kai mandalu

Itamā nedeļā Latvejis Radejis viļņūs pyrmskaniešonu pīdzeivuoja pyrmuo kriminalromana latgaliski “Bruoli” radejis īstudiejums, kurā 25 akteri i sabīdreibā pazeistamys personeibys izskaņ kotrys ar sovom latgalīšu volūdys niaņsem. Pīcys dalis, kotra pa 50 minutom i, ka suokumā byus gryušuok saprast, golā jau dūmuosi latgaliski. Ar jaunuo īstudiejuma muokslinīcyskū vadeituoju, režisoru i muziki Kristapu Rasimu, dramaturgi Rūtu Dišleri, kai ari pošu kriminalromana autoru Aldi Bukšu runuosim par īstudiejuma radeišonys procesu i byušonys svoru, par latgalīšu literaturu radejā i latgaliskuo vierzeibu iz prīšku, par stypru Latgolu i Latveju. Nu autora Alda Bukša prīškvuorda: „Stypra Latgola nav īspiejama bez styprys latgalīšu volūdys. Bez stypras Latgolas nav īspiejama stypra Latveja.” Kriminalromana “Bruoli” radejis īstudiejumu eistynuoja Latvejis Radejis Latgolys studeja i latgalīšu kulturys kusteiba “Volūda”. Obeju sadarbeibā 2021. godā topa ari pyrmī radejis skaitejumi latgaliski – Ilzis Spergys stuostu kruojuma “Dzeiveiba” īroksts. Kriminalromana “Bruoli” radejis īstudiejumu klausīs ite: https://ej.uz/npex