រដ្ឋមន្រ្តីការពារជាតិអាម៉េរិក ប្រកាសបន្តពង្រឹង​កិច្ច​សហប្រតិបត្តិការជាមួយកម្ពុជា

លោក ឡយ អូស្ទីន ( Lloyd James Austin III ) រដ្ឋមន្ត្រីការពារជាតិសហរដ្ឋអាមេរិក បានមកបំពេញទស្សនកិច្ចផ្លូវការ នៅកម្ពុជា កាលពីថ្ងៃទី៤ ខែមិថុនា ឆ្នាំ២០២៤។ ក្នុងដំណើរទស្សនកិច្ច នៅកម្ពុជា រយៈពេល ៥ម៉ោងកន្លះ គិតចាប់ពីម៉ោង ៩ព្រឹក លោករដ្ឋមន្ត្រីការពារជាតិអាមេរិក ឡយ អូស្ទីន បានជួបពិភាក្សាការងារដាច់ដោយឡែកពីគ្នា ជាមួយលោក ហ៊ុន សែន ប្រធានគណបក្សប្រជាជនកម្ពុជា ដែលកំពុងកាន់អំណាច និងជាប្រធានព្រឹទ្ធសភា ជួបដាច់ដោយឡែកជាមួយលោកនាយករដ្ឋមន្ត្រី ហ៊ុន ម៉ាណែត និងជួបប្រជុំផ្សេងគ្នា ជាមួយរដ្ឋមន្ត្រីការពារជាតិកម្ពុជា លោកនាយឧត្តមសេនីយ៍ ទៀ សីហា នៅក្រសួងការពារជាតិកម្ពុជា ដោយមានពិធីទទួលដោយកម្រាលព្រំក្រហម និងពិធីត្រួតពលផងដែរ។