Saolotoga o tapuaiga 1 (Freedom of Worship 1)

OPEN HEAVENSMATALA LE LAGI MO LE ASO FARAILE 9 IANUARI 2026(tusia e Pastor EA Adeboye) Manatu Autu:Saolotoga o tapuaiga 1 (Freedom of Worship 1)Tauloto Tusi Paia: Kalatia 5:1 “O lenei, ‘ia ‘outou tumau i le sa‘olotoga ‘ua fa‘asa‘oloto mai ai Keriso ‘iā te i tatou ‘ae ‘aua ne‘i toe tāofia ‘outou i le amo o le pologa.”‭‭Faitauga - Tusi Paia:  Mataio 6:21-24E iai le aiā tatau a tagata uma e tapuai ai i soo se mea e mananao ai. E oo i atunuu e faasā ona tapuai i nofoaga faitele, e leai seisi e mafai ona taofia se tagata e tapuai i lona atua na o ia. O lenei saolotoga e tapuai ai na foai mai e le Atua, peitai, e tatau ona e filiga i taimi uma e te iloa poo ai ae poo le a foi le mea o loo e tapuai ai aua o lē e te tapuai iai e fua iai le ituaiga tagata o le a e iai. (2 Korinito 3:18). E taua lou iloiloina lelei poo a mea o le a ave iai lau faamuamua aua o loo faailoa ai tagata poo mea o loo e tapuai iai. O isi tagata e latou te lē iloa ua avea le telefoni ma atua latou te tapuai iai. E o ma ave le telefoni i soo se mea e ō iai, e oo i le falelētaua. E le mafai ona aveesea o latou mata mai le telefoni ao faaaluina le taimi e matamata ai i soo se mea. A leai se telefoni, ua fememeai ma ua lē lelei se mea latou te faia. O le faanoanoaga, e oo atu ai iai latou i le atuatuvale, fememeai ma isi luitai o le soifua maloloina. O le mea e ave iai lau faamuamua ma tupe e faufau ai mea e te faatauaina, o ou mafaufauga ma lau amio. Afai e te faamuamua mea i le tino, o lou tulaga poo manatu o isi, e faigofie ona avea ma tupua i lou olaga. E tatau ona fai ma suesue lou tagata ia e iloa mea ma tagata e tele ona e mafaufau iai ma mea o loo taulai iai lou malosi. A le ō gatusa nei mea poo nei tagata i lou faamoemoega ia Keriso, e tatau ona e faaeteete ina nei e paū (1 Korinito 10:12). O le isi auala e tau leiloa peitai ua masani ona avea ma tulaga e tapuai iai isi tagata, o le galuega. E tele kerisiano ua faataga o latou tagata e taotaomia e galuega, ua latou faatalalē ai i o latou soifua maloloina, o aiga ma le savaliga ma le Atua. Ou te iloa le taua o le galue malosi ma ou te galue malosi e faamalosiau i tagata e faataitai mai. Peitai a avea le galuega ma punaoa o lou tagata ma lona faasinomaga, ua latou faoa le tulaga o le Atua. E tatau ona e faaeteete ia aua nei e tapuai i lou olaga mafana ma le faigofie ua maua. O nei aso, e toatele talavou o loo talanoa i le olaga nei, peitai, o lo latou saili i le ituaiga olaga faigofie ua avea ma atua latou te tapuai ai. Le au pele e, o le saolotoga o le tapuaiga, o se meaaalofa lea ua foai atu e le Atua ia te oe, peitai e tatau ona e faaaogaina e tapuai ai na o ia lava. E tatau foi ona e manatunatu ma pulea lelei lou tagata ina ia aua lava nei e tapuai i se atua ese i soo se taimi. Taulai lau vaai i le Atua i taimi uma, ona ia tauia lea o oe i lona alofa tunoa ma le alofa mutimutivale, i le suafa o Iesu, Amene.