詩歌節
from 台文用喙讀 Hosted by 楊振陽
阮讀冊會𤆬頭的桃園高中退休老師阿得，伊去接著一個活動，有朋友邀請伊佇詩歌節內底的一個時段，發表伊遮濟年來推捒讀冊會的經驗。滿腹攏是才華的阿得，若有上台頂的機會，一定毋甘願干焦孤孤徛佇台頂演講爾，若無予伊過一下子街頭藝人的癮，伊是絕對袂放伊家己煞矣！ 阿得老師有揣幾個阮讀冊會的同學，陪伊鬥陣上台，嘛有揣我跟伊的蕯克斯風合唱美麗島這首歌曲。我少年時陣毋捌參加過社會運動，雖然愛唱歌，民歌當咧時行的時陣，差不多逐條歌攏會曉唱，但記持內底就是毋捌學唱過美麗島這條佇彼時陣會使講是社會運動界的國歌。為著欲陪阿得老師佇詩歌節內底跟伊的蕯克斯風對唱，我家己愛先來學唱練習一下。 佇學唱背歌詞的過程中，我發覺若是共幾年前我送予讀冊會二十冬紀念的彼首台語詩，配合美麗島的旋律略仔調整一下，就會使用唱的，按呢就跟「文字在旋律上跳躍成音符」的詩歌節，有去墨著淡薄仔邊矣。 二十冬的讀冊會，共咱大家牽做伙 有人會曉講笑詼，有人教咱啉好茶 阿得老師齣頭濟，𤆬團認真眾人綴 教冊運動歕鼓吹，文武全才伊攏會 二十冬的讀冊會，共咱大家牽做伙 老街行讀四界踅，拍開五感讀活冊 冊本電影輪流看，毋免考試毋免驚 誠懇鬥陣二十冬，讀冊會內攏勥人 我的詩是台語詩，美麗島這首歌若拄好有人寫台語詞，按呢跟我的詩鬥做伙就誠四序，毋免是一半唱中語一半唱台語。佇網路頂飼予google揣，真正有人寫過唱過，按呢我就用台語的美麗島鬥我的台語詩，唱予逐家聽看覓，美麗島的台語歌詞是按呢寫的。 晟咱大漢的美麗島，親像老母溫暖疼惜 歷代的祖先注目咧看，看咱怎樣紲接怹跤步 祖先一代閣一代咧吩咐，毋通袂記，毋通袂記 祖先一代閣一代咧吩咐，殷勤開墾，殷勤拍拚 海水清清的太平洋，圍著這苦難的美麗島 雖然日光遍照土地，光照懸山溪水佮田園 遮爾媠的鄉土是咱所有，祖先開墾，上天賞賜 土地有生出豐富的土產，水牛、稻仔、弓蕉、玉蘭花 配合旋律，我的台語詩略仔調整變台語歌詞是按呢： 二十冬的讀冊會，共咱大家牽做伙 有人會曉講笑詼，嘛有人教咱啉好茶 阿得老師的齣頭誠濟，𤆬團認真，眾人欽佩 教冊運動閣會歕鼓吹，文武全才，啥物攏會 二十冬的讀冊會，共咱大家牽做伙 老街行讀四界踅，拍開五感體驗讀活冊 冊本電影阮輪流來看，毋免考試阮毋免驚 誠懇鬥陣做伙二十冬，讀冊會內攏是認真的勥人
Embed this episode
No transcript yet.