PODCAST · education
台文用喙讀
by 楊振陽
練習寫台文了，有會曉講台語的朋友無慣勢看，我就共我寫的台文用喙讀出來，予朋友會使一面聽一面看。
Episodes
-
食頭路
有一個好朋友，大學讀的是外國文學，畢業了就隨予一間誠大誠有名的公司錄取。上班到今，雖然伊才四十偌歲爾，但佇同一間公司上班的時間嘛超過二十冬矣。 為著欲共工課做予較好些，伊佇上班的這二十偌冬裡，家己有閣利用時間，轉去學校，學習跟工課有關係的專業知識。雖然個性無稍愛跟人交際應酬，但工作上一定是百分之一百達成任務的。 這一兩冬有聽到伊咧講，怹的部門調來一個跟伊無稍對盤的主管，定定會揣伊麻煩。為著無欲予主管貓毛到，伊佇公司就愛定定加班到三更半暝！壓力大，身體嘛袂堪得。 聽伊講前一陣子，伊共怹頭家辭頭路矣，財務上無煩惱，股市閣紅絳絳，伊就先予家己休一陣子，欲換啥物工課以後再講。...
-
阿母講笑詼
頂一篇台文，閬縫閬傷久，寫了錄一集新的「台文用喙讀」，傳去podcast 平台，spotify 跟 Apple podcast攏會使聽到，但YouTube Podcast 紲無同齊放送，閣寄一封email予我，講怹的系統暫時無法度處理新錄的podcast，叫我愛家己想辦法！ 我只是較貧惰，無遐捷寫台文、錄台語podcast爾，阿無去改過YT的啥物設定，那會雄雄就未使用？查網路頂敢有人拄過這個問題？Google 的AI講，叫我去檢查我的YT podcast內底的 RSS...
-
阿母會記持的代誌
出家的小弟寫line來問講，阿母敲電話予伊，講厝裡有收到通知單，生活費已經入伊的郵局口座矣，所以敲電話來共師父說多謝一下。小弟煩惱阿母的記持是毋是有淡薄仔錯亂？抑是拄著詐騙？ 「詐騙攏是叫人提錢出去，阿母是收到錢，應該毋是啦！」 「敢會是阿爸留落來的保險金？」 「我問恁三嫂，伊講阿爸的保險金是徛年中跟年尾，我有去查公司的電腦，若這個時間收到保險金，應該是阿爸用你做被保人規劃的保單。阿母的記持猶閣誠好咧，伊無記毋錯啦！你會使放心。」...
-
阿母的皮包仔
早起接到一通電話，愛去台北一逝。既然愛駛車出去，無就順紲載阿母出來食素好了。彼工牽仔揣著一間「執行長素食水餃」招我跟查某囝鬥陣去食看覓，食了感覺袂䆀，食飯的氣氛誠好，頭家足愛跟人客講怹兜食素的故事跟食好油好食材的觀念。 這幾冬來，離徛家較近的素食餐廳關了了，若有食素的朋友來相揣，想欲請人食一下飯攏感覺誠無方便。這間素食餐廳開佇人的住宅大樓三樓，誠特別，按呢生理閣做會起來，應該有伊會使共人客留落來的功夫跟手路才對。...
-
說走就走的好運
牽仔招大姨仔去高雄揣怹表小妹耍三工，看到外口天氣遐爾好，我跟查某囝嘛佇厝裡坐未牢，想欲出去撈撈矣。共牽仔載去桃園高鐵坐車了後，我就開始看日不如喝行就行，手仔機提起來四界反看覓，有啥物活動、展覽抑是表演會使去看無？ 活動猶未揣到，line的兄弟群組就看到二兄交代大兄大嫂，阿母的喙齒無好，轉來陪阿母食中晝頓愛攢較爛的，出家的小弟隨應講，伊嘛拄好欲轉去。按呢我嘛會使招查某囝先轉去跟阿媽食中晝，食了才看欲斡去佗位。 進前佇七月揣展覽看的時陣，敢若有看到台北流行音樂中心的展覽，後來去無成。北流離東湖近近的，會使食飯飽才順紲斡過去。拄好北流這個展覽是長期的，頂遍看無成，換這遍來看。...
-
太陽能光電板
台灣若像有幾偌冬無去予風颱扇到矣，毋是來進前就轉斡無入來，較濟攏走去日本，無就是有倚過來，但風雨無啥大，歇到風颱假的所在，紲予百貨公司、電影院、餐廳遮的店面，生理比普通時閣較好！ 這遍的風颱ui嘉義台南入來，無先予咱的護國神山中央山脈稍擋一下，就直接掃過來，造成咱南部縣市足大的災害損失。看新聞翕到受災嚴重的畫面，有一款是我以早毋捌看過的，就是去予風颱扇到東倒西歪的太陽能光電板。...
-
AI幫我空耳注音
最近合唱團欲練唱義大利文的歌劇，合唱團有同學就跟逐家分享，伊是按怎叫AI共鬥相共的。伊共樂譜分段翕起來，貼予ChatGpt，請ChatGpt用中文，共這段歌詞注音，就是人講的空耳發音。 今馬AI真正有厲害，伊先共圖內底的字辨認出來，然後就用接近義大利文發音的中文字注音出來。伊閣會順續檢查這段歌詞對抑毋對？若有毋對，伊會提醒妳，這歌詞敢若有毋對喔！用中文字注音了，伊會閣問妳，愛伊唸出來聽無？若愛，伊就建議妳會使用開錢的版本，因為免錢的版本有一寡限制，會予用的人感覺歹用。...
-
詐騙電話
大學同窗的面冊貼文，寫到伊接到一通詐騙電話，講有人提伊的委託書跟身分證去戶政事務所辦代誌。我會記持我捌接過跟伊仝款的電話，嘛有寫過面冊貼文。我就用「詐騙」兩字去揣我寫過的貼文，有揣到兩篇。我共跟大學同窗相仝的詐騙電話彼篇貼予看，伊講委託人仝款叫楊偉明，跟兩冬前我拄著的是用仝一個劇本。當初寫這兩篇貼文的時陣，是中文跟台文濫咧寫，因為敲電話揣我的人是講中語，雖然我共怹攏講台語，但聽有的彼通，伊繼續講中語騙我，聽無的彼通，講無幾句就共我掛電話矣。...
-
紅記記的蛇年
欲共逐家講這件代誌的心情是真躊躇的，因為這牽涉到我個人私密的部分，嘛是跟現此時社會中，大部份人的觀念跟做法無仝，有可能真濟會關心我的親情五十，聽了袂當接受！會想欲叫我愛去做遮做彼，但這就是我的選擇。因為我有感覺，這個過程，對我誠有幫助，若有人跟我拄到仝款的代誌，加減會使參考，所以我決定共講出來。至親好友聽了會通做的，就是尊重、支持跟祝福我就好，任何煩惱心、歹念頭，攏毋通走出來！猶閣有的是，這款代誌無適合佇人食飯的時陣講，若拄好有人佇食飯的時陣，看到我的面冊，抑是聽到我的podcast，按呢我就對這些親友較失禮較歹勢矣。...
-
假音講電話
客戶講伊的信用卡到期，有換新卡，變新的期限。我隨敲0800，請服務人員直接幫客戶變更。敲了才想到，這個客戶是離職業務員的人客，愛阮某來替伊注文才會使，無0800攏會因為我毋是業務員，就無愛跟我講，一定愛叫阮牽仔來聽電話。 0800誠歹敲，敲通了愛閣等人來接，牽仔佇浴間仔當咧無閒，我貧惰閣重敲，就請坐佇電話邊飲茶的查某囝，來假怹母仔一下，我徛伊邊仔教伊按怎講就好。 查某囝突然間接到這款任務，看起來有淡薄仔緊張，這是正常人的反應。因為佇咱的生活中，袂去假作另外一個人的身份去跟人講電話，除非咱是詐騙集團，才會規工做這款代誌。...
-
看櫻花
牽仔跟恩愛農場的櫻花無啥有緣，上早是七年前佇228拜六去跟人塞車看無成，改去較山跤賰較少花的櫻木花道飲咖啡（ https://bit.ly/4bfegOw ）。閣來是五年前佇上班日拜四透早，想欲趁人猶未出門上班，車較少的時陣上山，結果伊爬未起床，干焦賰查某囝陪我去爾（ https://bit.ly/3D6WCA1...
-
結構性壓力
合唱團的小班長跟阮查某囝是佇桃園的高中讀仝屆的，有一工，伊佇line群組內底開講，講到怹母仔咧共逼婚，問看伊有欲去參加，辦佇蘆竹的聯誼活動無？我看了就隨去網路頂揣看是誰辦的？因為我嘛是蘆竹區民，哪會攏毋知這款活動？揣了才知，是蘆竹區公所辦予猶無交往對象的朋友參加的，猶閣會使報名。舉辦的時間是2月倚西洋情人節的附近，意思是有伴的人去過情人節，無伴的人就去參加聯誼活動揣一個伴。...
-
蛇年四字聯
台語有人共蛇叫做溜，按呢我蛇年的四字聯來共寫做溜。隨想到的是「溜之大吉」，有溜嘛有吉，應該會使算作過年的好話。有人講人的天性是追求快樂跟逃避痛苦，拄到問題就想辦法解決，若是無辦法解決，按呢跤底抹油溜之大吉嘛是無辦法中的一種辦法。 溜溜大順是中語六六大順的倚音，讀作台語嘛誠順，因為溜了有順才會當逃過災厄。看到今馬美國加州有夠驚人的野火就知，若溜會赴是厝燒無去爾，溜未赴人就無命矣。...
-
蛇年春聯
近來想欲寫蛇年春聯，但攏想無步，無靈感。今年是輪到欲合查某囝的名，我就問查某囝「蛇」妳會想到啥？伊講「煎藥仔」。雖然煎跟蛇的台語聽起來是有倚到音，但毋知欲接啥？揣網路頂的俗語，嘛誠少講到蛇的好話，甚至民間有人會忌剋講到蛇，攏共蛇叫做溜。 有一遍轉去丈人彼，隔壁厝邊K先生拄好來厝裡坐。佇開講的過程中，丈人講伊下晡時較毋敢泡茶，驚暗時厚尿。K先生嘛綴咧講，查晡人食到咱這個年歲，就是有這種問題，伊嘛是。我知影K先生怹後生跟阮查某囝年歲差不多，應該跟我仝緣的，毋是阮丈人彼輩。我就問伊「咱差無幾歲吧」「我溜」伊隨共應，「阿毋才大我兩歲爾，我羊仔」。旦佇網路頂揣到這款講法爾，想袂到佇生活中就隨拄到。...
-
讀冊會「生命最後三通電話你會打給誰」
讀書會最近讀的冊叫「生命最後三通電話你會敲予誰？」。作者郭憲鴻，外號小冬瓜，是一位自細漢就綴著佇黑道的老爸（外號冬瓜）四界走路，後來怹老爸投入殯葬業，他嘛自細漢就綴怹老爸參與殯葬事務。年紀雖輕，但已經看過誠濟人間告別的過程。雖然冊名是這按呢問，毋過作者並毋是寫一本冊來回答這個問題，而是用家己參與過，一個閣一個的告別故事，以書寫文字來解鬱家己跟已經過往老爸之間的愛恨交纏。...
-
牽仔做的日本旅遊影片
舊年去日本前，牽仔是買一支自拍棒，才耍無偌久爾，遙控器就落佇船頂險險撿袂轉來，佳哉查某囝的手指頭仔幼秀閣長，才共救轉來。（ https://bit.ly/49jcTNL ） 這遍去日本前，牽仔是開幾偌萬去買一支新手機仔，耍到上尾三工，有一遍欲共自拍棒搝長的時陣，手機仔紲夾無好勢，雄雄摔落去塗跤！雖然毋是我摔的，我嘛是去予伊唸到臭頭，好哩佳哉干焦傷到貼佇螢幕外口的保護片爾。無若傷到機身，毋但會予人唸爾，轉來台灣就愛閣開錢消災矣。牽仔講這逝來日本，有綴查某囝行幾偌間神社，算有拜有保庇到。...
-
歡迎朋友的非洲歌
今仔日是2024年11月8號，面冊跳出一篇3冬前寫的台文。我若台文無寫傷長，就未閣錄音唸予朋友聽。我看這篇文章內底有講到一條歌，我會記持我彈吉他唱過，而且是家己一個人唱兩個聲部合起來的。我就揣看面冊頂其它的貼文有寫到無？原來是寫佇2022年3月15號的這篇面冊貼文內底。拄好這篇嘛是短的無錄音的台文，按呢我共兩篇合做伙，濫我唱過的這條非洲歌，錄一集podcast予朋友聽。 2021年11月8號的貼文是按呢寫的。 阮讀冊會𤆬頭的退休老師阿得 莊義得...
-
App學英文
牽仔最近誠認真咧學英文，定定會聽到手機仔講一句，伊綴咧唸一句。有當時仔，早早就去睏的我，已經睏一醒起來翻身矣，伊閣猶未來睏，換衫間的火是開到光龐龐，一句一句聽到伊佇彼咧綴手機仔唸英文。 我最近是因為參加合唱團了，上台欲唱的十外條歌攏毋捌聽過唱過，驚會綴人未著，才會規工拼生命咧練唱。阮牽仔就毋知是按怎，嘛若像予啥物物件牽去仝款，無代誌嘛無愛較早去睏，三更半暝猶閣咧耍手機仔內底學英文的軟體。...
-
合唱團甄選
合唱團甄選 八月初，朋友貼一條網鏈仔予我看，是桃園市民合唱團咧招新團員。看了心足撓的，想欲去試看覓，甄選的方式是自選曲1分鐘跟看譜演唱。有經驗的人一看就知影，這跟唱歌比賽仝款，有自選曲跟指定曲，只是指定曲換做是現場分一段樂譜予你現看現唱爾。我這個無經驗的紲憨憨，直接共想做是家己愛準備一分鐘的自選曲樂譜，看樂譜唱予老師聽。...
-
網路社交平台
網路頂的社交平台 因為科技的進步，人跟人聯絡感情的方式，已經無地理空間的限制，只要有網路，無論是天邊海角，信號有通，咱就會使揣人開講，想欲看到人，鏡頭共開來照就看有，精差無通有實體的接觸爾（握手啦、相攬啦）無定著閣過幾年，科技閣較進步了，嘛會使解決這個問題，予人佇網路頂就會使有實體接觸的感覺。...
-
詩歌節
阮讀冊會𤆬頭的桃園高中退休老師阿得，伊去接著一個活動，有朋友邀請伊佇詩歌節內底的一個時段，發表伊遮濟年來推捒讀冊會的經驗。滿腹攏是才華的阿得，若有上台頂的機會，一定毋甘願干焦孤孤徛佇台頂演講爾，若無予伊過一下子街頭藝人的癮，伊是絕對袂放伊家己煞矣！ 阿得老師有揣幾個阮讀冊會的同學，陪伊鬥陣上台，嘛有揣我跟伊的蕯克斯風合唱美麗島這首歌曲。我少年時陣毋捌參加過社會運動，雖然愛唱歌，民歌當咧時行的時陣，差不多逐條歌攏會曉唱，但記持內底就是毋捌學唱過美麗島這條佇彼時陣會使講是社會運動界的國歌。為著欲陪阿得老師佇詩歌節內底跟伊的蕯克斯風對唱，我家己愛先來學唱練習一下。...
-
「山教我的事」讀冊會
「山教我的事」讀冊會 這學期讀冊會欲讀的冊，有一本叫做「山教我的事」。我有印象敢若幾年前佇公司的讀冊會，捌讀過這本冊。因為牽仔足敖清物件，我毋知影這本冊有予清掉無？就line 問伊，咱兜敢有這本冊？伊隨翕相予我看，猶閣有佇咧厝裡的冊櫃內底，按呢就免閣開錢買冊矣。牽仔講這本冊誠好看，伊哪有可能共清掉。選冊的時陣，我已經袂記持這本冊是咧寫啥？閣共掀一遍來看，就有淡薄仔記持矣，因為冊裡有講到原住民，幾年前佇公司讀這本冊的時陣，有一個原住民的同事就順續教阮幾句泰雅族的族語。...
-
序細的大紅嬰仔
老菩薩用四跤柺仔佇厝內底徙動，盡量做到會使家己處理生活中的「大」「小」事有七八年了，近來的身體機能，已經退化到愛人幫忙伊上落眠床，徙位去坐馬桶椅、拭尻川，換衫褲尿褲拭身軀矣。有𤆬過嬰仔的爸母應該攏做過這些代誌才對，只是𤆬嬰仔的時陣，咱差不多才二三十歲，嬰仔的體重才四五公斤爾。今馬𤆬老菩薩這身大紅嬰仔，咱已經是五六十歲人，大紅嬰仔的體重是六七十公斤。...
-
老菩薩跌倒
最近跟丈人開講，講到阮爸身體欠安，感冒咳嗽，規身軀僐鬥鬥軟夠夠，倒咧眠床頂紲爬袂起來。彼工四跤柺仔無徙好，重心無穩，規个人跋落去塗跤，佳在我有佇邊仔咧看，七八十公斤的人軟跤，根本就捧袂牢，干焦會使予伊順我的手，慢慢的溜落去，佇塗跤稍倒一下，我才共扶起來眠床邊坐。 丈人聽我按呢講，伊就講阮丈姆彼工嘛是仝款，佇伊的眠床邊坐無好勢，溜落去塗跤坐，嘛是爬袂起來，佇遐叫人叫規晡，伊聽著聲才趕緊去共拉起來。丈人講佳在伊有佇厝內底，無伊若出去，阮大姨仔咧睏，一定是睏到聽袂著聲叫袂起床，阮丈姆仔就愛佇眠床邊坐到暗頭仔，聽候伊轉來，才會使爬起來矣。...
-
好轉反應
我的面冊最近跳出一篇十冬前寫的網誌，是一個醫生朋友來介紹彼時陣大腸癌治療的方式。過去十冬矣，大腸癌仝款是咱台灣發生率跟死亡率排前三名的癌症。規場演講內底，予我印象上深刻的，就是用貴參參的藥仔治療了，干焦會使加活幾個月到一二年爾，按呢這款藥仔怹嘛叫做有效！面冊已經無網誌這個功能矣，我仝款共co出來貼佇這篇文的下跤。最近有想到一個如何看待咱身上病疼的觀念，家已感覺誠有道理，就講出來跟逐家分享一下。前一陣仔佇咱的過年歇睏日，有跟幾個大學同窗翁仔某約出來開講，這個歲數講的較濟攏是跟健康有關係，開講到落尾，現場的幾個同窗會共我這隻老羊剾洗，我若叫怹莫遐趕緊去看醫生的時陣，怹就會同齊講「這叫做『「人體自癒…
more -
龍年春聯
2021的牛年開始，我就用台語來寫阮兜的春聯，經過牛、虎、兔三個生肖了，今年2024是兔仔年欲來迎接咱的龍年，春聯又閣輪轉來愛用阮某的名跟龍字來鬥矣。古早人的觀念來底，龍是足好的生肖，譬如講，皇帝的一切攏跟龍有關係，毋管是穿的用的，攏有龍的形體佇頂懸。若皇帝的身體無爽快，人攏講是「龍體欠安」。所以，我會記持以早做囡仔的時陣，嘛是台灣經濟起飛的年代，龍年出世的紅嬰仔就是比其他生肖年出世的較濟。佇龍年出世的囡仔，爸母向望的，就是這個囡仔會使跟古早的皇帝仝款，一世人平安順序，有享受榮華富貴的皇帝命。...
-
誰記得誰痛苦
薟妹仔跟阿弟仔是讀仝班的同學，彼年為著欲代表怹彼班去參加全學校班聯會主席的選舉，怹先予班上的同學投票初選，看誰會使代表怹彼班去參選。佇初選的過程中，阿弟仔一直叫薟妹仔愛約束伊佇網路頂遐的支持者，較君子些，莫閣胡亂共攻擊矣；薟妹仔嘛公開共回應講，遐嘛愛你先去說服別人，你是會予人信任的，因為欲做班聯會的主席，誠信是上基本的條件。 初選結束，薟妹仔選贏了，就隨叫阿弟仔來做伊的副手，做伙代表怹彼班去選全學校的班聯會主席，怹倆人佇班上初選彼時陣，吵吵鬧鬧罵來罵去的喙瀾，早就焦佇喙角，袂記持了了矣。莫怪有一齣足出名的表演藝術戲劇「那一夜，我們說相聲」內底的笑詼話是按呢講「誰記得誰痛苦」。...
-
人間條件8
透早起床，看到一个讀研究所的同窗，佇昨暗時九點偌寫line予我，這個時間我早就佇眠床頂唔唔睏，講欲佮我講幾句話，毋知是啥物代誌？三四點就起床的我，袂使隨共回line，無若手機仔囥眠床邊的人，可能會去予我吵到眠，只好聽候到七八點，人差不多攏起床，愛去上班矣，才來寫line予伊，問看是欲講幾句啥物話？ 寫了無偌久，伊就用line敲過來。伊講伊有兩張舞台戲的票，本來是怹翁仔某欲做伙去看，但年底伊佇香港的工課較濟，干焦拜六禮拜才有閒通飛轉來，上班日就飛袂轉來台灣。這齣戲拄好佇拜四暗，票的座位袂䆀，一張嘛愛開兩千偌箍，無去看是有夠拍損矣！看我有閒通陪怹翁去看無？...
-
「撼山河撼向世界」紀錄片電影包場
拜六參加阿得老師主辦的「阿得的同樂會」包場電影欣賞「撼山河 撼向世界」陳明章的記錄片。因為阿得老師有先跟我講，電影看煞欲cue我起來講1分鐘的心得。主辦人遐爾辛苦，共活動攢好好，咱干焦一箍遛遛去參加就好，所以分配予咱的任務，就袂使閣推辭矣，一定愛接受。 1分鐘嘛講無啥，因為愛唱歌，我就利用佇台頂的機會，請鬥陣來看電影的朋友，逐家做伙跟我合唱「流浪到淡水」上尾的副歌「有緣無緣，逐家來做伙，燒酒啉一杯，予焦啦！予焦啦！予焦啦！」哇！雖然干焦一句，但嘛唱了誠爽！這就是阿章師厲害的所在。...
-
旅遊影片
最近阮牽手足興咧做影片，ui日本轉來了後，伊就共伊手機仔內底翕的相片、影片濫做伙，用ipad內底免錢的音樂做背影，做三四齣這遍去日本𨑨迌的影片出來，貼起哩網路頂予親情朋友欣賞。 伊較早毋捌學過做影片這款軟體，算是第一擺家己學ipad內底提供的影片編輯功能。較早這款代誌攏是我跟阮查某囝用電腦咧做，伊看怹同學攏家己來，伊嘛想欲試看覓。 我共講莫閣用電腦的軟體編矣，怹同學攏是用Apple的產品，無論是手機仔抑是平板，所以我共建議，伊就直接用厝裡的ipad內底附的軟體做就會使矣，聽講Apple的軟體誠巧，用的人真緊就學會曉。...
-
寫問卷拍分數
這遍去日本本島的東北𨑨迌五工，上尾工佇仙台機場，等欲坐長榮的航班飛轉來台灣，有跟導遊訂物件的人攏佇邊仔整理行李，共提到的物件囥入去欲託運的大行李箱仔內底。我無跟導遊買物件，行李就免閣拍開整理，徛佇邊仔等。這時陣，有一個查某囡仔講中語，叫我幫伊寫問卷，主要是問阮來日本𨑨迌的感覺，這是仙台政府委託怹來問台灣人，是按怎知影來東北𨑨迌？𨑨迌了感覺按怎？仙台政府怹若來台灣辦觀光推廣的活動，我會想欲去看無？ 導遊先生嘛佇上尾工叫阮掃一個QR...
-
偏見
第一擺幫丈人丈姆佮阮阿爸阿母申請桃園市的金婚紀念是佇民國107年，彼當陣阮已經佇桃園蹛十偌冬矣，第一擺知影桃園市有這款老人福利。毋知是毋是彼年的年底有里長選舉？有一工，跟里長誠麻吉的鄰長無先跟阮約，就臨時提報名單來揣阮，鄰長講：「較早這款的結婚紀念攏無咧分錢，今年開始有通領二千箍的禮券，看恁欲幫序大人申請無？」寫報名單就有錢通領，有這款的好空，咱是好市民，當然愛共用一下。...
-
見講講過去
俗語講老人的記持是「見講講過去，現講現袂記」古早的代誌記牢牢，今馬的代誌袂記持了了。這種現象，咱若ui現代人已經機不離身的手機仔來了解一下，應該就會使理解，這款記持的問題是按怎造成的？咱家己嘛會使盡量避免這種老化的現象，發生佇咱的身上。 手機仔已經是現代人誠重要的生活用品，伊除了予人跟人之間會使隨時聯絡會到之外，伊嘛會使幫助咱記誠濟生活中想欲記起來的代誌，上捷用到的就是翕相的功能。較早若驚會袂記持的代誌，咱攏是會先提紙筆來共抄起來，今馬較簡單，手機仔提出來先翕才講，以後若有用到的時陣，才ui手機仔內底的相簿反出來看。...
-
momo桑
厝邊阿姨跟阮母仔差不多年歲，體格保持了袂歹，定定會佇社區內底走動，無論大人囡仔，攏叫伊momo桑。我臆伊應該無染頭毛，規頭殼白蒼蒼，頭毛白甲足齊勻的，一支黑頭毛就看無。逐改佇社區拄到，看伊的穿插一定攏有梳妝打扮過，我臆伊應該若有欲出門就會妝娗一下，無論食到幾歲，無論欲去偌遠，無論是佇厝裡附近抑是去重要的場所，伊一定會維持伊上優雅的儀態來予人看到。...
-
牽成阮的愛
三、四個五十外偌歲的學生，想欲招一工去揣怹兩班已經七十歲的小學老師開講。本來是差不多逐年攏會去一遍，新冠流行的這兩三冬內，紲一遍攏毋捌去過。跟查埔老師講了是無問題，嘛約好時間矣，但較晚些時陣紲換查某老師敲line來講，這站仔伊的跤較不方便，有一跤的跤頭趺是第二改開刀，醫生講愛較細膩的，可能愛聽候到明年初，才來相揣會較好。...
-
空間跟時間
最近因為一帖食咳嗽的藥方，我介紹誠濟親情五十，去看一本中醫冊叫「四聖心源」，是一個傳奇的清國御醫，名叫做黃元御所寫的，伊會使算是彼時陣乾隆皇帝的家庭醫師。阮阿舅是開中藥店，我自細漢就共中藥有咧接觸，但就是干焦比別人較慣勢食中藥爾，對中醫所講的陰陽，五行六氣，五臟六腑攏無啥了解。讀冊的時陣，受到較濟的訓練，嘛攏是現代科學所講的遐的原理、實驗、觀察的方法。 開始接觸中醫冊，是看到古早人咧講的陰陽環境變化，跟家己所讀過的，現代的時間空間，天文物理所講的，雖然解釋的方式無仝，但是怹所推演的現象，其實有誠相仝的感受。我就共九冬前所寫過的一篇面冊網誌，改寫做漢字台文，來跟逐家交流。...
-
無字的情批
窗外雷公爍爁落著大雨，少年人情場失志，規工吼攏袂煞，用目屎洗面。阿媽看了心足毋甘，就問少年人： 「你敢知影天頂哪會落遐大的雨？」少年人干焦直直哭爾，攏無欲講話。 「你看，爍爁是天的鎖匙，鎖匙共天拍開，雨水就㴙㴙滴。拍愈開，雨愈大。你若艱苦就大聲共吼出來袂要緊，目屎流流ê，鬱悶敨敨ê，心就開矣。」 紲落來，阿媽對神明桌下跤的屜仔內底，提出一封已經藏幾偌十冬，閣猶毋捌拆開過的批，跟少年人講：「人若無緣做伙就免閣講啥，扯扯ê煞煞去就好。明明知影我青盲牛毋捌字，閣寫批來糟踏我......」...
-
台語歌詞寫看覓
今仔日是這學期讀冊會的第一擺集會，參加的人攜家己欲舉荐予大家的冊來宣傳登記，了後大家才佇線頂投票，選出這學期欲讀的幾本冊來。前一陣子我會記得媠某捌跟我講過，伊以後不欲繼續參加這個讀冊會矣。大家看到干焦我一個人出現的時陣，我就滾耍笑跟有來的冊友怹講：我今馬是一個人孤飛出道矣喔！結果，大家關心的攏是阮某那會無愛來？私底下line阮某，講足思念伊，想欲看到伊，無看到伊會鬱卒.....。 然後，我就接到阮媠某的line講：「我是干焦今仔日無去爾，因為查某囝身體無爽快，毋是這學期攏無欲去喔。拄好今仔日嘛是我無佮意揀冊的方式是用投票的，按呢無予人揀到的冊毋就足無彩足拍損矣，所以才無想欲去。」...
-
古早味的台語字
這篇是共2020年4月11號的面冊貼文改寫做台文 因為跟大尾CEO佇便所內相拄著，一句「你嘛來旋尿喔」的相借問，予我想起佇彼咧時代攏無啥咧講台語的讀冊囡仔，予國文老師一教就記到旦的「旋」字。假使咱若會使順這條線索落去揣台語字，有可能會使發覺到，有一寡講法、發音，是今馬的中語誠少用到的字，但佇台語內底紲定定聽到，閣真有古早人的氣口。若是閣有朋友，有真大的誤解，認為台語是有聲無字的話，按呢看會使用這個角度來看無？其實台語是有字的，是咱猶毋捌學過爾。...
-
旋
這篇是共2020年4月4號的面冊貼文改寫做台文 自從三月份的生日會，媠羊講伊今年的生日願望，是會當共伊的母語揀轉來捷講捷用了，跟伊仝辦公室的彼陣古錐同事就足捧場的，只要跟媠羊開講，攏會儘量用伊的母語，這款的同事情誼，真正予人足感動，只是有當時仔聽到無稍輾轉的台語，嘛會予人感覺愛笑爾。 有一工，媠羊去便所小解，大尾CEO嘛拄好入內便所，看著媠羊就隨用台語跟伊相借問：「你嘛來『旋』尿喔。」媠羊隨共應講：「對呀，拄才啉幾偌甌茶，愛小來敨一下。」...
-
查某人緣
我是出世佇一個查晡人較濟查某人的家庭。阮阿母生四個查晡囡仔，我排第三個。讀冊的時陣，讀仝班的嘛是較濟攏是查晡囡仔，因為國中高中讀的是人講的和尚學校，大學讀電子，阮彼班全部攏是班草，干焦有一蕊班花爾。 毋過出社會了，紲入去一個看起來是查某人較濟查晡人的行業，佇阮辦公室內底是按呢，我無去揣正式的統計數字。拄來做保險不偌久，有跟同事前輩鬥陣去拜訪新竹的一間公司，彼工拄好怹的人事處長咧教員工按怎看面相，拜訪煞無代誌，阮規陣人就去坐咧邊仔聽。...
-
韻文短詩四首
第一首 今仔日透早 猶未五點天就光 我嘛起床做早頓 拍開冰箱揣無卵 薄衫罩咧隨出門 雞卵牛乳紲手買 饅頭包子家己炊 豆乳米乳逐工絞 佳哉某囡食會合 第二首 日頭赤焱焱 日頭誠猛，曝到大粒汗小粒汗 四界走傱，認真拍拼為著生活 無通歇睏，工課穡頭做攏袂煞 向望牽成，出脫成功幸福相伴 第三首 出社會 未來猶毋知欲去佗位 生活是踏著油門硬催 家鄉影跡愈來愈稀微 跤步一步步 像天頂的雲 風若來揣就綴咧去 起初的夢想無放袂記 成功的向望紲愈稀奇 年歲咧過就目一下躡 青春一蕊蕊 若像花咧開 閣較媠嘛有落土時 我想欲做跟別人不仝 我毋驚予人看無夠重 我一個人嘛會使出帆 前途一坎坎 有苦嘛有甘...
-
隱變量
這篇是共2020年6月24號的面冊貼文，改寫做台文 松鴉買一堆素包子轉來厝裡，拄共囥予涼無偌久，就直接共冷凍起來矣，因為包子店的頭家講，囥冰廂下跤層冷藏干焦會使囥三天，冷凍會使囥一個月慢慢仔吃。 隔轉工透早，松鴉想欲提三粒包子炊來食，才發現包子毋是一粒一粒分開結凍，是十幾粒包子全部黏做伙矣。 「咦？昨昏毋是囥涼了才凍起來的？那會變按呢？」松鴉看一下紲規个愣去。 「妳愛先共包子囥下跤層，等暗時欲睏進前，才共包子擘予散開提去冷凍。」媠羊佇邊仔老神在在，一面洗著早頓欲拍豆乳的豆子，一面講予松鴉聽。 為著欲予其他不欲炊的包子，會使趕快囥轉去冷凍，松鴉開始共遮結規揹的包子提起來敲。...
-
禁汗
有一工，辦公室的冷氣歹去，同事攏咧搶電風吹，我無欲直接吹到風，就換位坐，有噴到風尾仔就好。助理看我直直擦汗閣無愛吹電風就問我：「流汗毋是真無爽快？」「袂矣，我真佮意流汗。」「那有可能，汗攏黏黏，流汗會予人感覺足齷齪矣！」「咦？我的汗不是黏的耶！而且會感覺著毛管空攏予汗洗甲足清氣矣。一定是妳傷少流汗，毛管空攏無咧清，窒傷濟垃圾物仔，汗才會變黏黏。」...
-
校正回歸
莊子講：莫若以明，明字是日頭佮月娘的組合。意思是講，若會使用日頭佮月娘个懸度來看代誌，就無啥物通好諍囉！ 最近防疫中心公佈得新冠肺炎的人數內底，開始甲進前疫情突然間湠開，檢驗塞車袂赴驗出來的資料，補轉去前幾工的確診人數，真濟老百姓是看佮霧嗄嗄，捎攏無。 有人講舊年美國予病毒湠甲糜糜卯卯的時陣，就攏有甲袂赴驗出來的資料補轉去，按呢才會使正確判斷疫情會按怎發展（ https://bit.ly/3bQPg2R ）。嘛有人講你若欲按呢做，就愛學人美國先講予好，疫情突然間湠開，袂赴檢驗的有偌濟，這馬這得病的人數毋是上尾的數字，會閣補資料起裡。咱攏已經守一年矣，那會無甲別人的經驗先學起來囥？...
-
起毛敲油
怹阿母見講就是講過去，伊按怎去予人虐待、誤解、冤枉，彼攏已經是過去幾偌十冬前的代誌矣。跟伊蹛鬥陣的大查某囝，無嫁娶嘛退休矣，不想欲聽這若錄音機咧放一千O一擺的錄音帶仝款，就會用無啥好的口氣，想欲阻擋怹母仔繼續講落去。 怹母仔就會感慨講怹大查某囝「妳干焦攏會為別人咧講我無好啦！無睬我佇厝內煮予妳食，自細漢煮到你退休！」 「我退休了毋是仝款佇厝內煮予恁兩個食！」大查某囝隨共應轉去。怹母仔嘛無想欲諍輸人「阿無妳才煮幾年爾！敢會比之！」 大女兒愈聽愈氣，決定欲放絕招「妳退休了敢有煮過一頓予阿公食？無嘛！妳閣敢講我！我到今馬閣有煮予恁食咧！」...
-
發展主義
這篇是2020年6月26的面冊貼文 毋知對當時開始，我聽著一個評論講法時，攏會先用另外一爿的看法來思辨一下。有人講這是無家己的主張，無中心思想，牆頭草，西瓜像欲偎大爿；嘛有人講，無急咧評論別人是自我修養的開始，緊事寬辦，事緩則圓。人嘛，攏是揀好的來聽，講按呢是有修養的人較合我的意。 有一天，學弟貼一篇探討雙連市場改建的文章予我，乘紲批評政府官員真濟人攏是發展主義，就是愛發展經濟，越起越濟，起予人翕相打卡買物件，老攤商佇遐歹看，就用消防安全的理由共怹趕走，無咧睬這些老人是毋是生活過袂落去。...
-
真人圖書館-賣魚的作家林楷倫
查某囝對阮讀冊會讀的冊攏無啥興趣，若讀到有對少年人這緣較有幫助的冊，我攏會加減簡單紹介內容予聽，看伊會有興趣同齊讀無？較濟攏無興趣。這遍桃園高中舉辦的「真人圖書館」活動，伊紲罕咧叫阮共報名，伊想欲來聽，特別共去神社顧店的時間排開。學校邀請來的冊中人物，是一個賣魚兼寫冊的少年家─林楷倫，伊出的冊叫做「偽魚販指南」。...
-
憂鬱症
做囡仔的時陣，干焦知影有的人尻川尖、無時著定、坐攏坐不牢，有人較孽潲、愛創治人，可能毋是老師心目中的好學生爾。但是大漢了，定定聽著學校老師若拄著這款學生，攏會叫家長𤆬去看醫生，看是毋是「過動兒」？愛吃藥仔醫無？ 較早無人共遮的囡仔當作病，細漢攏鬥陣耍做伙的囡仔伴，人無吃藥仔嘛大漢矣，各行各業攏有咧發展。所以，若聽到朋友人客講，厝內底有囡仔予醫生講是過動兒，我攏感覺是做爸母的傷過緊張！...
-
郵局寄批
我蹛桃園市，佇徛家附近的郵局，我去寄批的時陣，若聽著我講「掛號」，服務人員會隨用台語共我應「好」，用台語講幾箍銀，紲落來問我「愛報數無？」我應「免」，錢納了就提著一張掛號的證明單仔。 昨昏我佇公司附近的郵局寄批，這郵局是倚台北車頭的補習街附近，我仝款用台語講「掛號」，櫃檯小姐聽了，無跟桃園仝款隨用台語共我應好，繼續用國語報我偌濟錢，問我「需不需要購票證明？」我共應「免」。 我無想到伊共我的「免」聽做「欲」，阮兩個就一個講國語，一個講台語，開始進入雞仔鴨仔講袂通的場面。伊繼續問我「抬頭要打什麼？」我共錢囥佇櫃檯頂，規頭殻干焦想提著掛號單仔了就欲來走矣。伊看我無反應，閣問一遍「抬頭是什麼」？...
We're indexing this podcast's transcripts for the first time — this can take a minute or two. We'll show results as soon as they're ready.
No matches for "" in this podcast's transcripts.
No topics indexed yet for this podcast.
Loading reviews...
Loading similar podcasts...
Frequently Asked Questions
How many episodes does 台文用喙讀 have?
台文用喙讀 currently has 82 episodes available on PodParley. New episodes are automatically indexed when they're published to the podcast feed.
What is 台文用喙讀 about?
練習寫台文了，有會曉講台語的朋友無慣勢看，我就共我寫的台文用喙讀出來，予朋友會使一面聽一面看。
How often does 台文用喙讀 release new episodes?
台文用喙讀 has 82 episodes. Check the episode list to see recent publication dates and frequency.
Where can I listen to 台文用喙讀?
You can listen to 台文用喙讀 on PodParley by clicking any episode. We provide an embedded audio player for direct listening, and you can also subscribe via your preferred podcast app using the RSS feed.
Who hosts 台文用喙讀?
台文用喙讀 is created and hosted by 楊振陽.
URL copied to clipboard!