Stefnir í sögulega umræðu um veiðigjöld og skrúfað fyrir gas frá Rússlandi

Önnur umræða um veiðigjaldsfrumvarp atvinnuvegaráðherra hófst á Alþingi klukkan þrjú í dag. Þetta er langstærsta málið sem eftir er á þessu þingi og framhald þingstarfa ræðst að miklu leyti af því hvort formenn nái samkomulagi um hvernig það verður afgreitt. Þingflokksformaður Flokks fólksins býst allt eins við að önnur umræða standi í heila viku. Evrópusambandið stefnir að því að skrúfa alveg fyrir gas og olíu sem flutt er frá Rússlandi til aðildarríkja sambandsins - og það stendur ekki til að byrja aftur þótt samið verði um frið í Úkraínu. Tillögur um þetta verða lagðar fram á næstunni - en þrjú ríki innan Evrópusambandsins hafa þegar lýst yfir andstöðu við þessi áform. Fimmtán þúsund eldri borgarar eru með tekjur undir lágmarkstaxta Starfsgreinasambandsins - og nýkjörinn formaður Landssambands eldri borgara segir að það verði að leiðrétta. Þá sé lífeyrir aldraðra langt fyrir neðan lágmarkslaun á vinnumarkaði. Það hljóti samt að fara að birta til, því trúlega hafi flestöll baráttumál aldraðra verið tekin inn í stjórnarsáttmála ríkisstjórnarinnar.