Suprātkys Pasīnē: pīrūbeža dzeivis stuosti

„Kolnasātā” suprātku aba vakariešonys laiks. Otkon gastejam kaidā nu Latgolys pogostu, kab kluotīnē sasatyktu ar vītejim cylvākim i pasarunuotu par dzeivi, tradicejom i volūdys sovpateibom. Itūreiz aicynojam īpazeit Ludzys nūvoda Pasīni. Kai pīrūbežā, kur sasajauc vysaidys kulturys, volūdys i dzeivis pīredzis, kur niu dzeivoj ap 200 cylvāku, Pasīnis vītys stuosti ir daudz leluoki par pošu cīmu.  Vīns nu pazeistamuokūs i apmeklātuokūs objektu ir baroka arhitekturys pērle Pasīnis Svātuo Dominika Romys katuoļu bazneica. Tū reizem sauc ari par Aglyunys bazilikys muoti, deļtam ka Pasīnis bazneica ir vacuoka par Aglyunys baziliku. Taipat Pasīnis bazneica ir īkļauta Latvejis ainovu duorgumu sarokstā. Vītejī sevi sauc par posīnīšim. Jī pyrmī nu reita sagaida sauli Latvejis austrumu tuoluokajā apdzeivuotajā vītā, kur da rūbeža ir viņ 2 km, i tū, kai Latvejis zalī meži puorīt Krīvejis zylajūs nu Bazneicys kalneņa var labi redzēt. Suprātkuos Pasīnē pīsadola: kulturys pasuokumu organizatore Jekaterina Sovāne, vītejuo īdzeivuotuoja Olga Kazaka, prīsters Vitālijs Filipenoks, zemnīku saimisteibys „Purvmaļi” saimineica Skaidrīte Marčenoka, dobys saimisteibys „Bites” saimineica i dobys turysma gide Ilga Ivanova i pensionare, kaidreizejuo školys direktore Ilga Ērika Brice.   Sarunys turpynuojums ar posīnīšim gaidoms cytā raidejumā.