Traballadores secuestrados, profesorado pechado e listas abertas

O novo capitalismo é profesional, moi profesional, que dicía o outro. Usa os traballadores como reféns para obter cartos públicos, e se non, miren para Alcoa, que aos dous anos de asinar un acordo para dez, xa está poñendo a man, para non pechar, di. Pechar, péchanse os representantes sindicais da maioría do profesorado, para que os reciba o conselleiro do ramo, Román Rodríguez, pero nin pechándoselle na sala de agardar dan falado con el. Destes asuntos sindicais, e da plataforma de Sumar Galicia que a ministra de Traballo, Yolanda Díaz, presentará en sociedade este sábado –e que esta web adiantou– faron os catro laretas de garda: Ana Luísa Bouza, Antón Losada, Marta Otero Mayán e Xosé Manuel Pereiro. Diso e doutras cousas que saberán se escoitan o podcast.