Ua Mautu (It Is Settled)

OPEN HEAVENS MATALA LE LAGI MO LE ASO TOONAI 20 TESEMA 2025 (tusia e Pastor EA Adeboye) Manatu Autu: Ua Mautu (It Is Settled) Tauloto Tusi Paia: Kolose 3:16 “Ia nofo le afioga a Keriso i totonu ‘iā te ‘outou ‘iā tele lava, a o ‘outou a‘oa‘o ma apoapoa‘i le tasi i le tasi i le poto uma lava, a o ‘outou pepese fo‘i i salāmo ma pese, ma siva fa‘aleagaga ma le fa‘afetai i le Atua i o ‘outou loto.” ‭‭ Faitauga - Tusi Paia: Salamo 33:8-9 So’o se taimi e fetalai ai le Atua, poo lē a lava e fetalai ai o lenā lava (Salamo 119:89). Ua faamanino mai i le tusi o Isaia 55:10-11, a auina atu e le Atua lana Upu I se feau, e lē toe fo’i fua atu ia te Ia se’i vagana ua faataunuuina le mea e finagalo i ai. O lona uiga afai e auina atu e le Atua lana upu i se tagata ae musu e talia, o le a alu atu lea upu i se isi tagata auā o le Upu a le Atua e lē mafai, ma le mafai ona fo’i fua atu ia te Ia e aunoa ma le faataunuuina o le mea na auina atu e fai. O lenei afai e nofo mau lenei upu i lou loto e mafai ona e faaaogaina e te maua ai mea tetele ma le mata’utia mo le Viiga o le Atua. E mafai ona e fai atu i le ma’i e alu ese mai lou olaga ma olaga o isi, ona alu ese ai lea. E mafai ona e faatonu le mativa e alu ese ona alu ai lea. O le faaleleia o tulaga lē lelei e ala i le Upu a le Atua, e tatau ona e faataga lana Upu e nofo mau i lou loto. A nofo mau se isi i se nuu poo se atunuu ua ia maua se nofoaga e malolō lelei ai. Ina ua tuuina atu e Noa se lupe ina ua mavae le lolo, fai mai le Tusi Paia e le’i maua e le lupe se mea e mapu ai ona vae, ona toe fo’i lea i le vaa ( Kenese 8:9). Seiloga ua e fa’aavanoa se nofoaga mo le upu a le Atua i lou loto, faatoa nofo mau i totonu ia te oe. O le Upu a le Atua e faamalūina tulaga faigata i lou olaga ma olaga o isi pe a e faataga e mautū i lou loto. E masani ona ta’u mauoa tagata ona o le tele o a latou tupe. O e ua na o ni nai afe talā i totonu o a latou teugatupe i le faletupe, e lē mafai ona faapea e mauoa. E faapena fo’i ona le mafai ona e faapea ua e ‘oa i le Upu ae na o ni nai fuaiupu o le Tusi Paia e te iloa. E ao ona e faatofu lou tagata i le Upu a le Atua ma faataga e uluulu i vaega uma o lou tagata e ala i lou toaga e faitau ma su’esu’e i aso uma. Aua ne’i faamalieina oe i fa’aaliga o ananafi, saili ia e iloa le Upu ia fou i aso ta’itasi. O le a nofomau lana Upu i totonu ia te oe pe a e manatunatu ma tautalatala ai. A mana’o se kuka e iloga ona malū ma manogi se fasipovi, o le a ia sokaina i ni faamanogi kuka mo ni itula e faamalū ai a’o le’i kukaina. E faapea le galuega a le manatunatu i le Upu e fai, na te fa’amalūina lou loto I le upu a le Atua ma fa’amauoaina ai oe. Le au pele e, faataga le Upu a le Atua e nofomau I totonu ia te oe, ma fa’aaloalo i ai e ala i lou usitai atoatoa i ai i taimi uma. A e faia faapea, soose taimi e te tautala ai agai i ou faafitauli o le a fa’amautinoa e le Atua ma te faataunuuina. I le suafa o Iesu, Amene.