Varganistei Ievai Zepai daškierta jaunradis veicynuošonys stipendeja

Saruna ar  varganisti, Stiernīnis apleicīnis saļmu dzīduotuoju, nazkodejū Stiernīnis Tautys noma vadeituoju, koru dirigenti, dokturanturys studeņti  i vysaiži cytaiž aktivū kulturys dzeivis dalineicu Ievu Zepu. Pārnejuo gods golā Vaļsts kulturkapitala fonds Ievai iz 2023. godu daškeire jaunradis veicynuošonys stipendeju tradicionaluos kulturys nūzarē. Kaidus dorbus jei īceriejuse dareit iz prīšku, klausīs sarunā. Ieva pīzeist, ka itei stipendeja ir cīsi lels pagūdynuojums i atbolsts turpynuot aizsuoktū tradicionaluos i kristeiguos kulturys laukā Stiernīnē. ”Eistyn augsts nūviertiejums tam, kas jau ir izdareits, i tei ir taida cīši loba zeime tam, ka Kulturkapitala fonds, byudams tuolejā Reigā, radz, cik svareiga ir darbeiba, pozitiva kusteiba i atteisteiba mozūs epicentreņūs. Itei stipendeja, prūtams, ir tai kai maņ personeigi, atbolstam, kaba es varātu vēļ vaira dareit tū, kū es jau ari da ituo laika asu darejuse. Bīžai viņ tys ir bejs Dīvam par gūdu. Itam, 2023. godam, ir vasala aile ar dorbim, kai attīceibā iz muna promocejis dorba pabeigšonu, kas ir saisteits ar Stiernīni, tai ari ar dažaidu pietnīcyskū dorbu, intervejom, ar mierki īmyužynuot i saglobuot tū, kas Stiernīne ir attīcynojams iz tradiocionalū kulturu.”