Vēļ var pīsaceit sovu školuotuoju Nikodema Rancāna bolvai 2022

Katuoļu goreidznīkam, Latgolys pyrmuos atmūdys darbinīkam, vuiceibu gruomotu autoram i pedagogam Nikodemam Rancānam septembra golā apritēs 152 godi. Gūdynojūt juo davumu Latgolys kulturā i izgleiteibā, itūgod jau ostoitū reizi regiona izcyluokajim pedagogim tiks padūta juo vuordā nūsauktuo bolva. Pasuocīni organizej Latgalīšu kulturys bīdreiba i tuo mierkis ir styprynuot pedagoga profesejis prestižu, gūdynojūt izcylu veikumu pedagogiskajā darbeibā i veicynojūt latgaliskuos kulturys tradiceju īaudzynuošonu jaunajā paaudzē. Nominaceju skaits kotru godu drupeit pasamaina, itamā reizē tuos byus treis golvonuos bolvys. Sovpus catūrtuo nominaceja par rodūšu i psihologiski atbolstūšu pīeeju vuiceibu procesa organizeišonā tiks daškierta kaidam nu izgleiteibys īstuožu vadeituoju. Pārnejā godā itamā nominacejā tyka sveikta Rēzeknis suokumškolys direktore Ilona Stramkale. Dasacejumu pījimšona ituo goda nominacejom nūteik da 16. septembra plkst. 24.00, aizpiļdeitu anketu syutit iz e-postu: [email protected]. Nikodema Rancāna bolva pedagogim kotru godu teik padūta cytā vītā, itamā reizē kai školuotuoju dīnys īskanis pasuocīņs padūšonys ceremoneja nūtiks 25. septembrī Bolvu Kulturys i atpyutys centrā.