Viktors Reblis – storp mežu, medeibom i gruomotom

Saruna ar februara jubilaru, naskodejū, ilggadejū Zīmeļlatgolys regiona mežkūpeibys vadeituoju Viktoru Rebli, kurais cyta storpā ir ari aizrauteigs medinīks, vairuoku medeibu trofeju izstuožu reikuotuojs i aktivs dažaidu kulturys pasuokumu atbaļsteituojs. Nu pārnejuo gods gola Viktors devīs peļneitā peņsejā, tok kasdīna vys vēļ ir vysaidim dorbim i aktivitatem pylna – ar medeibom, gruomotu skaiteišonu, sasateikūt ar draugim i rodim, stuostu raksteišonu i daudzi kū cytu. Viktors ir medinīku kluba „Mežabrāļi” izveiduotuojs i vadeituojs i klubā aktivi dorbojās ari šudiņ. Viktors īt nu Rēzeknis nūvoda Īdenis, kur pavadeita bierneiba. Tāvs beja medinīks, vītejuo medinīku kolektiva vadeituojs, leidz ar tū jau nu mozu dīnu Viktors ir pīsadalejs ari medeibuos i darads pi meža.  Medeibys i dorbs mežā, stotūt kūceņus, mudynuoja Viktoru turpynuot sovu ceļu taišni itymā vierzīnī. Itūšaļt jis skaita daudzi gruomotu i ari pats ir īceriejs saraksteit kaidu interesantu stuostu par dzymtuos pusis vītvuordim. „Grybu uzrakstiet vīnu stuostu ar vītvuordim, kuri pamozom aizīt nabyuteibā i ap Īdeņu taidu vītvuordu ir cīši daudzi. Es dūmoju, ka jaunuo paaudze jau vaira poša i nazyna tūs vuordus, ka tī beja Dedzins, tī beja Zūba kryums, tī beja Nūgryuba, vītejīs Kryutsgols, kas tei taida Kaksts irā i taidi pūreni kai Cimdiņs, Tymsiņs, Vistiņs i tai tuoļuok. Vīnkuoršai, dūma ir par taidu kai nalelu ekskurseju pa gaisu, sapynā puorlidojūt pa vysu apleicīni i apceļojūt vysys ituos vītys. Vītejī īdzeivuotuoji kotram zemis gabaleņam beja davušs koč kaidu nūsaukumu, kotrai pļovai, kotrim leluokim kryumim, meža gobolim. Taidu nūsaukumu teišom ir cīši daudzi. Prūtams, ka jī natiks pīfiksāti, ar laiku vīnkuoršai izgaiss nu atminis.”