Voldemārs Ivdris: cytu reizi navar pasaceit, kur beidzās latgaliskais i suocās ebrejiskais

Rēzeknis sinagoga voi Zaļuo sinagoga atsarūn Kruoslovys i Izraelys īlu styurī. Tei ir vīna nu senejuokūs kūka sātu Rēzeknē i aplīcynuojums tam, ka nazkod Latgolys sirdī dzeivuoja daudzi ebreju. Rēzeknē sovulaik bejs pat 12 sinagogu. Da myusu dīnu vys sasaglobuojuse tik vīna – Rēzeknis Zaļuo sinagoga. Sastdīnis vokorā, 18. majā, jau divdasmytū reizi nūtyka storptautyskuo Eiropys muzeju akceja “Muzeju nakts”. Itūgod “Muzeju nakts” kūpeiguo tema – izzynuot i dabuot, pieteit i saprast. Vīna nu vītu, kas itamā naktī attaisa durovys interesentim, ir ari Rēzeknis Zaļuo sinagoga, kur var izzynuot, kai nazkod dzeivuojuši ebreji Rēzeknē i Latgolā, kū lykuši golā i kai sadzeivuojuši ar latgalīšim. Kū latgalīši pajāmuši nu ebreju i ebreji nu latgalīšu, vaira zyna stuosteit sinagogys koordinators Voldemārs Ivdris. “Mes jau cytu reizi navarim pasaceit, kur beidzās latgaliskais i kur suocās ebrejiskais,” par ebrejiskuo i latgaliskuo sasaveišonu kai tradicejuos, tai volūdā i izteicīņūs, ari kulinarejā stuosta Voldemārs Ivdris. “I jī runuoja latgaliski ar myusejim, vysim latgalīšim. Jī beja draugi. Es skaitu – tei beja taida loba sūpluok pastuoviešona. I vīns ūtra saprota. Kotram beja sova niša: latgalīts beja zemnīks, ebrejs – tierguotuojs. Vīnam labi i ūtram labi.”