網路社交平台

網路頂的社交平台 因為科技的進步，人跟人聯絡感情的方式，已經無地理空間的限制，只要有網路，無論是天邊海角，信號有通，咱就會使揣人開講，想欲看到人，鏡頭共開來照就看有，精差無通有實體的接觸爾（握手啦、相攬啦）無定著閣過幾年，科技閣較進步了，嘛會使解決這個問題，予人佇網路頂就會使有實體接觸的感覺。 面冊是一個全世界有足濟人使用的網路社交平台，聽講有二三十億的人佇頂懸活動，這個人口數，是比上濟人的國家印度，閣加十外億人出來。這款網路社交平台，逐工攏有誠濟咱熟識抑是無熟識的人，佇頂懸講伊咧做啥物代誌予人知影，伊有啥物生活感想，伊對某物議題的看法是啥貨，伊對啥物代誌有趣味，抑是伊看到啥物趣味的代誌...等等。有定定咧網路社交平台貼文的朋友，咱免跟伊傷捷相借問，就會使知影伊最近過了按怎，顛倒是咱若一陣子無看到伊的貼文，才愛共關心，是毋是發生啥物代誌矣。 跟「實」相對的叫做「虛」，佇網路社交平台無實體的接觸，這款跟人交睬的環境，中語叫做「虛擬」，台語我紲毋知按怎唸，毋知有其它的講法無？抑是直接用台語讀出來就好。線頂的教育部台語字典，查會到這個詞，台語是讀做「hi-gí」。咱是食老才知影愛共台語揀轉來講跟寫的人，上捷用到的，就是線頂的這本教育部台語字典，我只要共想欲寫的台語字，用中語的詞跟「台語」做關鍵詞，飼予google，差不多攏會使佇教育部這本線頂的台語字典揣到，伊嘛有聲音會使予人聽看台語按怎讀。像這遍，我共「虛擬 台語」飼予google 了，除了教育部的台語字典揣有這個詞以外，並無揣到其它的講法，按呢我就共這個詞的台語發音學起來，會使盡量減少台語較少講到的詞，替換用中語摻咧講的部份。 因為使用上的簡單跟方便，咱的生活中紲有愈來愈長的時間，去予網路社交平台這款虛擬環境佔去。我嘛是誠捷佇頂懸看朋友有咧創啥無？留話跟朋友答喙鼓，抑是發表我的觀點跟看法。有人講佇虛擬環境內底，欲予人看到的消息，攏是報好不報䆀。你若無有正確的認捌，規工看到的，攏是朋友貼講怹去佗位𨑨迌，去食啥物好料的，按呢你會叫是全世界的人攏過了足好，干焦你上歹命爾！ 佇網路社交平台的身份，咱若無家己去共關掉註銷，伊會一直存在佇這個虛擬空間內底，所以講，佇面冊頂註冊的二三十億人，到底有偌濟人已經過身去矣，咱嘛毋知。我有一個朋友已經過身五年矣，逐年的年初，面冊仝款攏會提醒伊的生日到矣，我去看這個朋友的面冊動態，到今年初，猶閣有人來留話祝福伊生日快樂，毋知這些人是真正毋知這個朋友已經過身矣？抑是已經知影，閣特別來伊的面冊頂懷念伊的人？ 上早拄到有朋友的面冊身份過身的狀況，是佇12年前我的大學同窗。伊過身了，伊的好朋友共伊的面冊身份改做紀念身份，嘛替伊佇面冊頂懸舉辦紀念活動。無論是佇現實的世界，抑是佇網路的虛擬環境中，逐家攏知影伊已經過身的消息。雖然經過12年，伊的好人緣，予誠濟親情朋友，逐年攏會佇伊的生日，抑是祭日的時陣，佇伊的面冊頂留話，來表達對伊的思念。 留一個身份佇虛擬空間，予思念的人會使來遮留話，敢若跟伊咧開講，掀看這個人過去貼過的文章、相片、影片，懷念伊佇在世時陣的模樣，這是網路社交平台這款虛擬空間，會使實際幫助到現實社會的人，去面對至親死亡，行出悲傷的方式。毋知是毋是因為這個原因，有一個今年過身的高中同窗，伊的面冊身份佇伊過身了，閣予人開起來用。佇過去二三冬，伊的面冊身份應該是關起來的，因為我捌佇一陣子無看到伊的面冊貼文的時陣，我有佇我的面冊朋友內底，揣過伊的面冊身份，紲揣無，後來是聽到另外一個高中同窗，講到這個同學，伊的孤囝跟伊的婚姻有發生誠大的變故。我臆可能是按呢，伊才共面冊身份關起來。後來是予啥物人，為著啥物緣故，閣共拍開，予伊的面冊身份繼續活佇這個虛擬空間，咱就毋知矣！ 網路社交平台除了佇過身以後，閣會使予親情朋友來懷念之外，咱嘛會使佇過身進前，就利用伊無地理空間的限制，共咱想欲跟伊好好仔道別的親情朋友，無論伊蹛偌遠，攏會使聽到伊的聲，看到伊的影，佇咱人生上尾的時間，好好仔跟伊講一下。阮兜的老菩蕯，佇伊上尾的這段時間，就有用line跟一寡仔親情朋友講到話。老菩薩開始昏迷的前幾工，伊決定共伊逐工透早，攏會傳早安靜思語予親情朋友的習慣停起來，伊用line共逐家講，因為目睭茫霧看無字，就無欲閣逐工傳早安靜思語矣，請逐家免掛心。line出去了後，無論蹛偌遠的親情朋友，就開始一個一個用line敲過來揣老菩薩開講，伊彼當陣的意識非常清楚，跟誠濟親情朋友講誠久。幾工後，伊就開始睏毋知人矣。可能老菩蕯嘛有感覺伊的時間差不多矣，才先用這招來跟逐家告辭。按呢講起來，阮兜的老菩薩運用網路社交平台的方式，真正有綴到時代。