X’inhu l-Istrument Kontra l-Koerċizzjoni?

Il-koerċizzjoni ekonomika, li tfisser l-użu ta’ għodod ekonomiċi biex jintlaħqu l-għanijiet politiċi, saret problema dejjem aktar serja għall-gvernijiet u n-negozji tal-Unjoni Ewropea. Il-Membri tal-Parlament Ewropew adottaw miżuri biex jgħinu lill-pajjiżi tal-Unjoni Ewropea jipproteġu l-interessi tagħhom mir-rikatt ekonomiku u mill-influwenzi tas-suq manipulattivi minn pajjiżi li ma jagħmlux parti mill-Unjoni Ewropea. Bis-saħħa tal-Istrument Kontra l-Koerċizzjoni li għadu kif ġie stabbilit, il-pajjiżi tal-Unjoni Ewropea issa għandhom il-mezzi legali biex jindirizzaw miżuri koerċittivi minn pajjiżi li ma jagħmlux parti mill-Unjoni Ewropea. Dan huwa strument essenzjali f’sitwazzjoni ġeopolitika dejjem aktar assertiva. Iżda x’inhu dan il-mekkaniżmu u kif jaħdem?