Xulio Llaneza: 'Dende les cúpules polítiques cimeres hai un refugu descomonáu a la escontra de los nomes n'asturianu'

Siguimos n’Iniciativa pol Asturianu nes ondes con más convidaos y falamos agora con Xulio Llaneza que ñaz en Perabeles, parroquia de Santa Bárbola, conceyu de Samartín del Rei Aurelio. Realiza los estudios primarios na Escuela "El Corralón" y termina'l bachilleratu nel Institutu Virxe de Cuadonga de L'Entregu. Acaba la carrera de Maxisteriu na Universidá d'Uviéu, sacando oposiciones al cuerpu de mayestros nel añu 1981. Ye amás llicenciáu en Filosofía y Lletres y Doctor en Filoloxía Hispánica pola Universidá de les Islles Baleares. Asinamesmu ye miembru de l'Academia de la Llingua Asturiana, y tien recoyida tola toponimia oral de los cinco parroquies del conceyu de Samartín del Rei Aurelio (Santa Bárbola, Blimea, San Andrés de Llinares, Cocañín y Samartín), la de la parroquia cabraliega de Berodia y les de Carrio y Tolivia de Llaviana. Esta toponimia apaez recoyida en dellos cuadernos editaos pola Academia de la Llingua Asturiana. TOLES SELMANES INICIATIVA TA NES ONDES Sienti’l programa radio de l’Asociación “Iniciativa pol Asturianu” áu falaremos toles selmanes na nuesa llingua y de la nuesa llingua asturiana. El programa radio d'Iniciativa pol Asturianu, dirixíu por Samuel Gradín, ye selmanal col envís de tar más apegáu al día tres día de les custiones que cinquen a la nuesa llingua. Asina ufre a los oyentes de les emisores que collaboren cola organización y los siguiores de les nueses redes sociales, un programa selmanal de trenta minutos onde puen sentise entrevistes, noticies, anuncies, etc que surden alrodiu l'asturianu. Tate sollerte.....Iniciativa pol Asturianu nes Ondes......