自農會到長期照護、數位轉型 照顧農民一世人的代誌

專訪：農訓協會發言人 奚安鴻 「咱台灣的農、漁會，早就毋是過去人想的彼款『老老舊舊』的形象。」擔任中華民國農民團體幹部聯合訓練協會（簡稱農訓協會）發言人的奚安鴻，透過《台灣夜市》節目分享，今仔日的農漁會，佇咧轉型的路上，無論是數位力、電商，抑是社會照顧，攏沓沓仔綴時代咧行。 奚安鴻表示，農、漁會，其實早就發展出家己的電商平台，除了賣產品，農漁會的功能也咧擴展。因應台灣人口老化，真濟農會已經開始投入長期照護服務，農會的樓頂改建做日照中心，提供在地的老人關懷佮照顧。伊講：「這就是農漁會陪伴在地一世人的證明。」 面對AI時代，農訓協會也開始引進AI工具，輔助農漁會提升行政效率。「AI毋是欲取代人，是來做咱的好幫手。」奚安鴻認為，透過工具，農漁民會當閣較有效率拚生產。