Samoan Devotional

OPEN HEAVENSMATALA LE LAGI MO LE ASO FARAILE 15 ME 2026(tusia e Pastor EA Adeboye) Manatu Autu: Faaeteete i ou tulaga vae 3(Mind your footprints 3) Tauloto Tusi Paia: Eperu 12:13 “I le ma lea, ‘inā fai ia o ala laulelei mo o ‘outou vae, ne‘i mapeva le vae ‘ua pipili ‘ae lelei ‘ina fa‘amālōlōina.”Faitauga - Tusi Paia: Mataio 5:14-15 I nei vaitau, ua saosaoa le alu a le tekonolosi. E fou i aso uma metotia tau tekonolosi ma o loo taumafai pea tagata ia iloa ma malamalama ai. E ui e tatau ona tatou iloa ma malamalama i le tulaga maualuga ua faia e le Atua i le tele o vaega o atinae o atunuu, ae e matuā taua lo tatou faataga o Agaga Paia e taitaia i tatou ao tausinio i lenei lalolagi o le saosaoa o le tekonolosi. Le au pele e, tusa poo le ā le matagofie ma le maofa o se metotia faatekonolosi, e tatau ona e manatua faifaipea, muamua, o oe o le atalii/afafine o le Atua, o se amepasa o le malo o le Atua. O le faanoanoaga, o nisi o kerisiano ua leiloa atu ai a i lenei vaitau o tekonolosi. Ua matuā galo iai latou lo latou faasinomaga i le Atua, ua mulimuli atu a i taiga ua faia e le toatele, e aunoa ma le sailia pe o ō gatasi ma tapulaa a le Atua pe leai. Mo se faataitaiga, o le toatele o kerisano ua latou faasoa i luga o le intaneti le mau faalauiloa ina ia tosina mai tagata e toatele e fiafia iai, faasoa atu ma mulimuli ai iai latou. O nei kerisiano ua latou tuua tulaga vae, amiolētonu i luga o upega tafailagi ma faaleagaina le suafa o le Alii. Ua latou faatagaina le au lē faatuatua e upu vale ma tauleagaina le suafa o le Atua ona o latou amio ma aga. Afai o oe o se kerisiano, o oe o le malamalama o le lalolagi, o le aai e tu i luga o le mauga, e lē mafai ona lilo. O lona uiga o soo se mea e te faia e iloa uma e tagata. O ou tulaga vae i luga o upega tafailagi, e aofia ai soo se mea o loo e faasoa i luga o le intaneti, e mafai ona oo atu lava i masini a le tau fai miliona o tagata i le lalolagi. O faasalalauga i luga o le intaneti ua faigofie ai ona avea oe ma se faaevagalia i le lalolagi atoa mo le malo o le Atua.  Faaaoga tatau le avanoa ‘ae ‘aua le faamaimauina avanoa e faasalalau ai ata ma tala lē amio Atua i luga o lau itulau. Aua le tutuina le moli ma tuu i lalo o le mea e fua ai saito talu ai mea faalelalolagi ma le faatamala. Tusa poo le a le televave o metotia faatekonolosi i nei aso, ua valaaulia oe e fai ma sui o Keriso i soo se mea e te iai ma soo se mea e te maua. O leisi lelei ma le aoga  o le faaaoga tatauina o ou tulaga vae i luga o upega tafailagi e faasusulu atu ai le malamalama o le malo o le Atua, e tumau pea pe a mavae atu tagata ma lenei lalolagi. Mo se faataitaiga, o nisi o faifeau ua maliliu mo le tele o tausaga, o loo mafai pea ona tatou mauaina latou aoaoga o le Tusi Paia i luga o le intaneti. Le au pele e, o ā foliga o ou tulaga vae i luga o upega tafailagi pe a maea lau galuega i le lalolagi nei? Ou te tatalo ina ia e siitia le mamalu o le Atua i lou faaaogaina o tekonolosi, ma soo se mea e te faia, i le suafa o Iesu. Faaaoga ou tulaga vae i luga o upega tafailagi e faasusulu atu ai le malamalama o le Atua, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 14 ME 2026(tusia e Pastor EA Adeboye) Manatu Autu: Faaeteete i ou tulaga vae 2(Mind your footprints 2) Tauloto Tusi Paia: Faataoto 13:22 “O le tagata lelei na te tofia ana mea i le fānau a lana fānau; a o le ‘oloa o le tagata agasala, e teua lea mo lē amiotonu.”Faitauga - Tusi Paia: Mataio 7:16-20 Afai e savali pea se tagata i laasaga sesē i le olaga nei, e tele le avanoa e mulimuli ai foi lana fanau. Peitai a savali se tagata i ala tonu i le faia o faaiuga tonu, e tele foi le avanoa e mulimuli ai lana fanau i nei laasaga lelei. Mo se faataitaiga, i le olaga o loo tatou ola ai nei, e toatele alii e ui, e inoino i le fasi e latou tamā o latou tinā, e i’u ane foi e fasi avā. Aua foi o le taimi e faataga ai e latou tamā le agaga i tua atu o le fasi tagata ma le sauā, e latou te faataga foi lea agaga e oo atu i latou atalii. I le tele o tausaga ua leva, e iai se tinā ua leai sana tane na talosaga i la’u avā e talanoa i lana fanau teine e aua le toe ō ma tamaloloa (tulou). Ina ua amata ona talanoa la’u avā i lana fanau teine, na fai mai se tasi o i latou, ‘faamolemole talanoa na aoao lo matou tinā e taofi le aumaia i le fale o soo se tamaloa’. O loo mulimuli lava lana fanau teine i le amio a lo latou tinā, ma o loo iloa e lana fanau teine, a faaauau pea ona faia e lo latou tinā, e faigata foi ona latou tuua. Afai e te manao e avea oe o se matua lelei, filifili i le asō e tuua se faataitaiga lelei e mulimuli ai lau fanau. Aua le avea oe o se faataitaiga leaga i lau fanau, peitai e tatau ona e filifili e avea ma matua e tilotilo iai le fanau ma faataitai iai. E iai nisi o matua e manatu e mafai ona latou faia ni amioga faalilolilo ae lē iloa e latou fanau, peitai, talitonu mai, e sili atu mea e maitau ma iloa e tamaiti, e ono manatu se tagata latou te lē iloa. E mafai ona latou iloa ma maitau mea o loo tutupu i lo latou siomaga. E iai taimi, e fanau mai tamaiti ma soo i uiga o latou matua. Mo se faataitaiga, i le Kenese 20:2, na pepelo Aperaamo ia Apimeleko o Sarai o lona tuafafine. I le tele o tausaga mulimuli ane, o Isaako, lona atalii e lei fanau i le taimi na pepelo ai ia Apimeleko, na ia faia foi le pepelo e tasi (Kenese 26:7). O le atalii o Isaako o Iakopo na faasolo ai foi lenei masani o le pepelo, lea na ia faoa ai faamanuiaga a lona uso i le pepelo i lona tamā (Kenese 27:1-29), ao atalii o Iakopo, na taupulepule e pelogia lo latou tamā i le mea na tupu ia Iosefa lo latou uso (Kenese 37:31-33). Le au pele e, aua e te faia ni uiga ma amioga lē lelei aua o loo faasolo mai lau fanau, e latou te maua mai ia te oe, sei vagana ua faataga le Atua e taofia, aua a leai, e faasolo ai pea na uiga ma amioga lē lelei mai lea augatupulaga i leisi augatupulaga e tupuga mai ia te oe. Filifili i le asō e faia laasaga o le amio Atua ma le amiotonu e mulimuli ai lau fanau. Ou te tatalo e fesoasoani atu le Atua Matautia ao e filifili e te faia. O le a le ituaiga faataitaiga lelei e te naunau e tuua e mulimuli ai lau fanau? I le suafa o Iesu, Amene. 

OPEN HEAVENSMATALA LE LAGI MO LE ASO LULU 13 ME 2026(tusia e Pastor EA Adeboye) Manatu Autu: Faaeteete i ou tulaga vae 1(Mind your footprints 1) Tauloto Tusi Paia: Eperu 12:1 O lenei, o i tatou fo‘i, o lo‘o ‘ua vagavagaia e le fa‘apotopotoga o ē matamata mai o fa‘apea ‘ona to‘atele, ‘ina tatou tu‘u ‘ese ia o mea mamafa uma, ‘atoa ma le agasala e fa‘alavelavegofie ai i tatou, ‘ia tatou taufetuli ma le ‘onosa‘i i le ala tanu o i o tatou luma Faitauga - Tusi Paia: Kalatia 6:7-8 O le tele o tagata soifua I lenei lalolagi, e mafai ona latou tuua o latou tulagavae iluga o le oneone mo sina taimi. O nisi tulagavae e lelei, o isi e le lelei. O le galuega mo oe i le aso, o le lou vaai lea i ou tulagavae ua tuanai ma lona aafiaga mo lou lumanai. I le faitauga o le asō, o loo faapea mai le Tusi Paia, o le mea e te lulu, e te toe selesele i ai. E le faapea e te toto le aniani ae faamoemoe e fua mai i le apu, E tatau ona e iloa lelei le fatu ua e lulu i lau savaliga i lenei olaga pe a e manao e te ausia le taunuuga sili i lou taimi i luga o lenei fogaeleele. E tatau ona e galue ma tautala ma le faaeteete i aso uma, ina ia aua nei lamatia lou lumanai e ala i le sese o le fatu ua e totoina. I lenei vaitau, o se tasi o nofoaga tautaua e mafai e le tagata ona tuu ai ona tulaga vae o luga o upega tafailagi. E iai foi ma le faaupuga e faapea e le mafai ona galo se mea i le initaneti. E tatau ona e mafaufau lelei i mea e te tuuina i luga o upega tafaiilagi ma fesootaiga i luga o le initaneti. O tusitusiga lē talafeagai e te faasalalauina e atagia mai ai, le amio lē lelei ma e ono toe foi mai ia te oe i le lumanai. Ae afai e te tuua ni tulaga vae lelei, o le a leai se mea e te popole ai i ni faasea lē talafeagai mai isi tagata. I le upu tauloto o le asō o loo faapea mai, o loo vagavagaia i tatou e le faapotopotoga o e matamata mai e faapea ona toatele. Manatu i si tagata o loo faatatau i agelu o le lagi, peitai o le tiapolo ma ana au o loo matamata mai foi i au gaioiga uma ma sue mai auala e faaseseina ai oe i lou agai atu i le lumanai. O tatou uso a tagata foi, e lei faaolaina, o loo aafia i lenei faapotopotoga o tagata maimoa mai. Le au pele, aua e te manatu e mafai ona e faia faalilolilo se mea e aunoa ma le iloaina e se tagata. Tusa lava pe leai se tasi o tilotilo mai ia te oe, o loo iai le Atua o le Pule o le lagi na te silafia mea uma ua faia. I le Ieremia 17:10, ua fetalai le Atua, “O au o le Alii o le suesue i le loto, o le tofotofo i manatu, ina ia tuuina atu I tagata taitasi e tusa ma ona ala, e tusa foi ma le fua o ana amioga” E silasila pea le Alii i lou loto ma iloilo ou manatu ma au gaioiga. Ua tatau nei ona e faafou lou mafaufau i aso uma i lana upu (Roma 12:2) ma faafetai ia te ia i lau amio (Kolose 3:17). Fai sau filifiliga i le aso nei, ina ia aua nei e toe aafia i se mea e le lelei e ono aafia ai lou lumanai. Ou te tatalo ina ia faaauau e le Atua lana taitaiga mo oe, e te faia ai le mea tonu i le taimi talafeagai i le suafa o Iesu. AMENE

OPEN HEAVENSMATALA LE LAGI MO LE ASO LUA 12 ME 2026(tusia e Pastor EA Adeboye) Manatu Autu: O le suafa o Iesu (The name of Jesus)Tauloto Tusi Paia: Galuega 4:12 “E leai fo‘i se tasi ‘ua i ai le ola; e leai lava se isi igoa i lalo o le lagi ‘ua foa‘iina mai i tagata e mafaia ‘ona fa‘aolaina ai o i tatou.”Faitauga - Tusi Paia: Filipi 2:9-11 I le tele o tausaga talu ai, sa ma malaga atu ma la’u avetaavale mai se tasi nuu agai i le taulaga. Na iai se auala laupapa i le ala ma e na o le tasi le taavale e ofi ai i le taimi e tasi. O lona uiga e faatali le taavale i le itu pito mai seiloga e pasi le taavale o loo malaga mai i leisi itu ona faatoa alu lea i luga o le auala laupapa. Ina ia ma oo atu i le pito mai o le auala laupapa, na ma tilotilo atu e leai se taavale o sau mai leisi itu, o lea na amata loa ona ma malaga atu i luga o le auala laupapa. E ma te lata atu i le afa o le auala laupapa, ae ma vaai atu o masau mai se loli i leisi itu. E lua vaega ma te filifili iai i le taimi lea, o le alu sao ma fetaui ma le loli pe faatafa ona tofu lea i le vai i lalo o le auala laupapa. Ua leai se taimi e tatalo ai, ae na lava le taimi e alaga ai , ‘Iesu’. Na matou fetaui ma le loli i le ogatotonu o le auala laupapa, fepasiai ma sao lelei i leisi itu. Na matuā luluina la’u ave taavale, ua ia tago faatū le taavale ina ua ma oo i leisi itu. Ina ua to’a lelei, na faliu mai ia te a’u ma fesili mai poo le a le mea na tupu, ua ou fai atu iai na faalautele e le Atua le auala laupapa mo ma’ua. O le suafa o Iesu e matautia lona mana, e faamautinoaina le faasaolotoina (Mareko 16:17), saolotoga (Ioane 8:36), siitia le tulaga (Ioane 12:32), malologa (Mataio 11:28-30), loto malie (Ioane 7:37-39), tali o tatalo (Ioane 14:14) ma le manumalo (1 Korinito 15:57). Fai mai le Filipi 2:9 o lona suafa e sili i suafa uma lava. O lona uiga o soo se mea e iai se igoa, e i lalo uma o le suafa o Iesu. Afai o iai se ma’i o loo fai ma avega mamafa ia te oe, afai e iai se igoa, e vaivai i le suafa o Iesu, auā i lona suafa, e tootuli tulivae uma (Filipi 2:10). Le au pele e, ua maea ona foai atu e Iesu le pule ia te oe e faaaoga lona suafa (Ioane 16:23-24). O lona uiga o loo ia te oe le malosiaga e pule ai i soo se tulaga, ia ō gatasi ma le finagalo o le Atua mo lou olaga. Aua e te faavaivai pe a e feagai ma soo se tulaga lē lelei ae tago e folafola le suafa o Iesu ma le toa, ona e tulai mai lea ma le manumalo. Ou te tatalo ia oo atu le mana o le suafa o Iesu e faaumatia soo se fuafuaga a le tiapolo ia te oe ma lou aiga. O lona uiga e te savali ma le manumalo i taimi uma, i le suafa o Iesu. O le suafa o Iesu e sili i suafa uma lava, Amene. 

OPEN HEAVENSMATALA LE LAGI MO LE ASO GAFUA 11 ME 2026(tusia e Pastor EA Adeboye) Manatu Autu: Amuia ē sauāina (Blessed are the persecuted)Tauloto Tusi Paia: 2 Timoteo 3:12 “O i latou uma fo‘i o ē loto ‘ina nonofo ma le amio Atua ‘iā Keriso Iesu, e sauāina i latou.”Faitauga - Tusi Paia: Mataio 5:10-12 O kerisiano uma lava, e ui i latou i puapuaga i lenei lalolagi (Ioane 16:33) ma o le sauaina, o se tasi lea o puapuaga e feagai ma soo se kerisiano moni. E moni o sauaga e lē logomalie, peitai, o se tulaga e olioli ai o le iloa lea, na folafola e Iesu i le Mataio 5:10 “Amu‘ia ē sauāina ‘ona o le amiotonu; auā e ō latou le mālō o le lagi.”Fai mai le tauloto o le asō o soo se kerisiano faatuatua e filifili e ola amio Atua ia Keriso Iesu, e sauāina i latou, e ono matuiā pe feoloolo foi. Poo le a lava le ituaiga, o le sauaina e masani lava ona lē logomalie. O lona uiga, o le alu ese ai ma nei sauaga, o nisi kerisiano ua amata ona o ese ma le faatuatua ma ua ola e tusa ma le lalolagi. I lou tulaga o se kerisiano faatuatua, a ē alu ese ma le faatuatua i soo se taimi e sauāina ai oe, e lē taitai malosi lau molimau mo Keriso. O taimi uma na sauaina ai le au aposetolo, na maua ai isi avanoa e molimau atu ai mo Keriso i isi tagata. I le Galuega 4:1-3, na faia se faatonuga a taitai o le Ekalesia i Ierusalema ina ia saisai Peteru ma Ioane ma tuu i le falepuipui seia oo i le aso e sosoo ai, na latou taufaamata’u iai latou, le au aposetolo, ia taofi le lauga atu i le suafa o Iesu. Ina ua maea lea tulaga, na maua e le au aposetolo le mana mai le Atua ua sili atu i le tulaga na iai muamua ma ua faatupuina lo latou loto toa e lauga le Upu a le Atua (Galuega 4:31-33). Ina ua faatapeapeina i latou i le maea ai o le maliu o Setefano, na latou molimau ia Keriso i soo se nofoaga na malaga iai, ma ua matua faasalalauina ai le talalelei o le Upu (Galuega 8:4). Atalii/afafine o le Atua, pe o sauaina oe i le tumau i le upu a le Atua poo le laugaina foi o le talalelei, ua lava ma totoe le alofa tunoa o le Atua mo oe e taofia oe mai le liliu ese ma ia. O lona malosi e tauave ia te oe i taimi faigata pe afai e taulai pea lau vaai i le Atua. Afai o e ui i sauaga ona o oe o se kerisiano, tau ina ia e iloa e na te lē tuulafoaia oe. Ina ua faaali atu Iesu ia Saulo i le ala i Tamaseko, na ia faailoa atu o ia o Iesu, o Lē o loo sauaina e Paulo (Galuega 9:4-5). O lona uiga o i latou o sauaina oe o loo latou sauaina Iesu, ma o loo iai o ia ma oe i ou puapuaga. Le au pele e, aua e te faavaivai i lou faatuatua pe a oo mai puapuaga, ae e tatau ona e saili malosi i Lē na folafola e na te lē tuulafoai ia te oe (Eperu 13:5). E fai le Atua ma fesoasoani silisili i puapuagā (Salāmo‬ ‭46‬:‭1‬) ma e iai o Ia ma oe e oo i le gataaga o le lalolagi (Mataio 28:20). Amu‘ia ē sauāina ‘ona o le amiotonu; auā e ō latou le mālō o le lagi, i le suafa o Iesu, Amene. 

OPEN HEAVENSMATALA LE LAGI MO LE ASO SA 10 ME 2026(tusia e Pastor EA Adeboye) Manatu Autu: Faamanuiaga e aunoa ma le tigā (Blessings without sorrow)Tauloto Tusi Paia: Faataoto 10:22 “O le fa‘amanuia a le ALI‘I, o lea e fa‘atamao‘āiga ai; na te lē fa‘aopoopo i ai se tigā.”Faitauga - Tusi Paia: Ioane 10:10Toatele tagata e manana’o e mauoa i soose tau, ma ona o lea, e taumafai ai pea le tiapolo e fa’aosoosoina i latou e fai so’ose ituaiga amioga agasala. O nisi o i latou e i’u lava ina maua le tamāoaiga o mananao ai, peita’i o lea ituaiga tamāoaiga e masani ona maua faatasi ma le tele o le tigā. Ua na o manuia o le Atua, e maua e aunoa ma le faavauvau e pei ona o tatou vaaia i le fuaiupu tauloto o le asō.O le tiapolo e lē taitai mana’o e maua e se isi se mea lelei. E mafai ona faafoliga le fili peiseaī e mana’o i le aupito sili ona lelei mo se uso, peita’i o ia o se faamatua o taufaasesē ma e le mafai ona ia avatu i se tagata se mea lelei. Pau le mana’o o le fili, e fiafia e gaoi soosemea ua tuuina e le Atua i lana fanau. Ua faailoa mai le tusi o Ioane 10:10 fuafuaga moni a le fili mo soose tagata, o le gaoi, fasioti ma faaumatia. A e paū atu i mailei a le tiapolo e fai le agasala, ua e faatagaina le fili e gaoi oe, fasioti ma faaumatia oe.I tausaga ua mavae na fai mai ai se tamaita’i o la’u vasega, ia te a’u, “Tamā ua ou maua se taulealea talavou e mana’o e faaipoipo ia te a’u.” Sa o’u fa’amālō ia te ia ae fai mai, “Leai! E i ai le faafitauli.” Ona ia faamatala lea faapea na faailoa atu e lona tamā na ia foaiina ia i se tiapolo, le agaga o le gataifale, ma afai ae fai sona toalua o le a oti o ia. Na fai atu fo’i lona tamā afai e le o ia e oti, poo ai lava le tagata e faaipoipo I ai o le a oti i le aso tonu o le faaipoipoga. Ona faapea mai lea o le tamaita’i ia te a’u, “O lea la ua fai mai le taulealea lenei ma te faaipoipo ma ou te manatu o le finagalo lea o le Atua ia ou faaipoipo atu ia te ia. Peita’i ou te lē mana’o ou te tali Ioe ia te ia ona ou te lē mana’o e fasiotia le taulealea e le tiapolo poo le agaga o le gataifale. O le a se mea e tatau ona ou fai?” Sa ou ata ma fai atu i le tamaita’i, “Ou te iloa le Tamā o agaga uma.” Ona ou tatalo lea o se tatalo faigofie i le suafa o Iesu ma fai atu i le tamaita’i, e alu e talia le talosaga a le taulealea. Lua tausaga mulimuliane a o ou i totonu o se falesa i Yaba Lagos, ae savali atu le tamaita’i lenei ia te a’u o loo ia sapai se pepe i ona lima ma fai mai, “Susuga e, e te manatua a’u?” Sa ou tali, “Ioe!” Sa o’u fesili ia te ia poo fea lana tane ma sa ia faasino i se taulealea aulelei. Pe ana lē sulufa’i lea tamaita’i ia Iesu, semanu e ola ai lava I saisaitiaga o le pologa o le fasiotia o tane uma e faailoa lo latou manana’o ia te ia.Le au pele e, o faamanuiaga a Satani e omai faatasi lava ma loli pusa sasa’a o le faavauvau. Peita’i a faamanuia oe e le Atua na te avatu manuia e faatamāoaiga a’i, na te lē faaopoopo I ai se tigā, I le suafa o Iesu, Amene.

OPEN HEAVENSMATALA LE LAGI MO LE ASO TOONAI 9 ME 2026(tusia e Pastor EA Adeboye) Manatu Autu: Mealilo o le soifua umi 6 (Secrets to longevity 6)Tauloto Tusi Paia: Esoto 16:30“Ona mālōlō lea o le nu‘u i le aso fitu.”Faitauga - Tusi Paia: Kenese 2:1-3 Ina ua avea a’u ma Ta’ita’i aoao o le Ekalesia RCCG, sa mamafa tele ia te a’u le tupu ma ola o le lotu, sa ou anapogi ma tatalo e lē aunoa ma lauga i le mea e gata ai, ma ua ou le malolo ai pe tafao. Na o’u faia lenei faiga mo ni tausaga seia o’o ina faafuasei ona o’u maitauina pe a ou lauga, e uma loa le sefululima minute e te’i a ua matuā leai a so’u leo. E ui sa ou tausisia ituaiga fautuaga uma e fo’ia ai le faafitauli, o se tasi o nei fesoasoani o le inu o le ti e ave i ai le honey, e le’i te’a ai na tumau pea. O le tasi aso na sau ai se tinā matua na ia maitauina le tulaga ua tupu ma fai mai ia te a’u, “Susuga e, ua e aafia i le fa’ama’i a faiaoga.” Sa o’u fai I le tinā lenei, ou te le’i faalogo muamua i lea faamai ma sa ia tali mai. “Ua e a’oa’o, pea lava pea, ma ua e lē tuua se avanoa e faamalolō ai lou siufofoga. O lena ua lē fiafia le leo.” Sa ou fesili i le tina pe faafefea ona fo’ia le faafitauli ma sa ia faapea mai, “Faamalolō lou siufofoga mo aso e sefululima.” E faafefea ona o’u faia?” Sa o’u fesili ae tali mai le tinā. “E mafai lava ona e a’oa’o e aunoa ma le leai o sou leo mo le sefululima minute; ae a le mafai loa ona e o’o i le lima minute; e tatau ona e faia loa le mea lea o’u te fai atu ai.” O lea la, mo le taimi muamua talu ona avea a’u ma ta’ita’i o le ekalesia, sa ou alu ai ou te malolo. Sa ou malaga i Siamani ma ou nofo i se fale sa i ai se potu faaafu (sauna). Fai mai lē e ona le fale sa ou nofo ai, e mafanafana ai le tino atoa mai totonu i fafo, ma a ou ulufale e tatau ona ou toe ulufafo pe a uma le sefululima minute pe a umi, aua o le ā matua’i sisina lo’u afu. Sa ou alu i totonu o le potu mafanafana ma e uma ifo le lima minute e leai ma se afu. Uma le sefulu minute e leai lava se afu. O le uma o le sefululima minute faatoa ou faalogoina sina afu itiiti. E fasefulu lima minute o o’u i totonu o le potu fa’aafu faatoa sau se afu. Ua leva ona lē tausia lelei lo’u tino ua lē toe galue lelei ai. Mai lea aso, ua ou iloa ai afai ou te fia ola umi ma fa’aaogaina a’u i le galuega a le Atua ua tuuina mai ia te a’u e tatau ona lava la’u malolo.Le au pele e, afai e te mana’o e umi lou soifua e tatau ona fa’aavanoa sou taimi e te malolō lelei ai. O loo tau mai i le faitauga mai le Tusi Paia o le asō, na malolo le Atua ina ua maea ona Ia faia le foafoaga ma o se faataitaiga lea mo kerisiano uma. E mata’utia ma ogaoga le galue mamafa e lē malolo auā e mafai ona e maliu ona o le tino vaivai ma le lēlavā. ‘Aua e te faapologaina lou tagata ona o le faataunuuina o lou valaauina mai le Atua. Faaavanoa le taimi e te malolo lelei ai ona e maua pea lea o le malosi e mafai ai pea ona e tamo’e i lau tausinioga. I le suafa o Iesu, Amene.

OPEN HEAVENSMATALA LE LAGI MO LE ASO FARAILE 8 ME 2026(tusia e Pastor EA Adeboye) Manatu Autu: Mealilo o le soifua umi 5 (Secrets to longevity 5)Tauloto Tusi Paia: Isaia 28:12 “Na ia fai atu fo‘i ‘iā te i latou, “O le mālōlōga lenei; ‘ia ‘outou avatua le mālōlōga i ē ‘ua lailoa; o le mālōlōga fo‘i lenei;” a ‘ua latou lē mafafai ‘ona fa‘alogo mai.”Faitauga - Tusi Paia: 1 Tupu 19:4-8 O le asō, o le a faaauau atu le suesueina o mealilo o le soifua umi, o le a taulai i le taua o le toe faaolaola o maa o le tino. E lē tatau ona faatalalē i lou malosi i le tino aua e te manaomia e te manumalo ai i galuega o le agaga. Mo se faataitaiga, o se galuega faaleagaga na tuuina ia Mose e taitaia le fanauga a Isaraelu mai le nofo pologa agai i le nuu na folafolaina. E ui o lenei galuega i lona aotelega e faleagaga, ae sa iai vaega e manaomia ai le malosi i le tino, semanu e lē ausia pe ana le faalogo i le fautuaga a Ieru, na faasaoina ai o ia mai le vave uma o lona malosi ae lei taitau oo i lona taimi. Ua galue e sili atu i le tulaga manaomia i le lē amanaia lea o le tatau ona toe faafoisia le malosi i le tino i le faia lea o se malologa e tatau ai (Esoto 18:13-26). O taeao, o le a ou talanoa atu i le fai o le malologa.O leisi auala e faaolaola ai lou malosi i le tino ina ia mafai ona onosaia ma manumalo i le ala ua saunia e le Atua i ou luma, o le ai paleni i le taimi talafeagai. I le 1 Tupu 18:19, na faaaoga e Elia lona malosi faaleagaga e valaau ia paū le afi mai le lagi, valaau ia paū le timu ma tamoe saosaoa atu i lo le kariota a le tupu. O na galuega tetele e mautinoa na faaaogaina uma ai lona malosi i le tino ma le agaga, aua ina ua faalogo o loo saili Iesepela e fasioti ia te ia, na tamoe ese. Na tamoe mo le tolu po ma le tolu ao, ona fai lea i le Atua e ave lona ola. Na ia moe i le nofoaga na fai ai ana tatalo, ma faafetai, na auina mai e le Atua se agelu e fafagu ma fafaga ia te ia, ina ia toe faafoisia lona malosi, ma faaiu ai ma le manuia le faigamalaga umi o loo i ona luma. Ou te manatu i le mea e ono tupu pe ana lē fafaguina e le agelu ia Elia, ae maua atu e Iesepela ao lelavā ma vaivai, o loo moe. E toatele tagata ma lumanai matagofie ua maua atu o momoe, ua oo atu Iesepela ma fasioti i latou aua ua latou faatalalē i latou tino, ua vaivai i le taimi e sili ona manaomia ai le malosi. O Iesepela i le tulaga lea o le agasala. Mo se faataitaiga, afai e faatalale se ulugalii i le la mafutaga faaleulugalii i le tino, e ono maileia ma paū i le agasala o le tuinanau o le tino ma iu ai ina faagataina faafuasei le faigamalaga faaleagaga. Le au pele e, e tatau ona aoaoina oe e fai se malologa a lou tino ma vaai mea e manaomia e lou tino e tusa ma le finagalo o le Atua i taimi essese, ina ia mafai ona e fiafia i le soifua umi ma tamoe ma le manuia i lau faigamalamaga i le ola nei. E lē tatau ona e faatalalē i lou tino pe afai e te manao e tumau i le ala tonu ma faataunuuina le finagalo o le Atua mo lou olaga, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 7 ME 2026(tusia e Pastor EA Adeboye) Manatu Autu: Mealilo o le soifua umi 4 (Secrets to longevity 4)Tauloto Tusi Paia: Luka 6:21 “Amu‘ia ‘outou e fia ‘a‘ai nei; auā e mā‘o‘ona ‘outou. ‘Amu‘ia ‘outou e tagi nei; auā e featani ‘outou.”Faitauga - Tusi Paia: Salamo 107:8-9 A’o faasolo atu pea le aoaoga i mealilo o le soifua umi, ou te fia talanoa atu i le taua o le toe faatumu pea ao savali i le ala ua faasino e le Atua i ou luma. O le fiafia ma manuia i le soifua umi aemaise i le malo o le Atua, e tatau ona toe faatumu pea i le tele o taimi. O le mafuaaga lea na ia faia ai e mulimuli mai le po i le ao ina ia mafai ona galue malosi i le ao, ona e moe lea i le po ma toe faafoisia ai lou malosi. E faapena foi pe a uma le ti o le taeao, o se tulaga masani le toe fiaai pe a maea ni nai itula, pe afai o loo faaagaoina pea lou malosi. Na faia oe e le Atua e ai faaitula ina ia toe faafoisia lou malosi. O le mafai ona faaaogaina o se fana, e tatau ona toe utu pulu pe a maea ona fana. E faapena foi le kerisiano faatuatua e tatau lava ona faaolaola pea ona ma’a faaleagaga. Mo se faataitaiga, e le mafai e se kerisiano ona ola i le upu a le Atua na faalogo ma aoao ai i le tausaga talu ai, poo le anapogi ma tatalo na faia i le tolu tausaga talu ai. O lea kerisiano e matua vaivai ma e faigofie ona maileiina e le tiapolo. O lona uiga, e tatau ona faifai pea le fafagaina ina ia malosi lelei i le agaga. Fai mai le Mataio 5:6 “Amu‘ia ē fia ‘a‘ai ma fia inu i le amiotonu; auā e mā‘o‘ona i latou.”Na faia e le Atua le fiaai e faamanatu mai ai ua maualalo le malosi, ma ua tatau ona ai e toe faafoisia le malosi. E pei a ona ia faia le fiaai i le tino o se faailoga e tatau ai ona ‘ai ia maua le malosi, na ia faia foi le fiaai i le agaga o se faailoga e tatau ona faafoisia ai le malosi i le agaga. A e fiaai mo le Upu a le Atua, e te fiafia pe a oo i le taimi o aoga Tusi Paia, fiafia pe a oo i taimi o fono tatalo, o loo e malosi faaleagaga. Peitai, afai e te le faia se mea i le fiaai, e te ono le toe faalogoina pe a maea sina taimi. Afai e le toe fiaai se kerisiano faatuatua i mea faaleagaga, o lona uiga ua matutū o ia ma ua lata ina oti i le agaga. Le au pele e, e leai seisi e umi i le malo o le Atua e aunoa ma le fiaai i taimi uma, ina ia toe faatumu faaleagaga. Afai e te oo i le tulaga ua e lē toe fiaai i le Upu a le Atua, tagi atu i le Atua e toe faafou lou fiaai faaleagaga. Tau ia e fiaai ma fiainu pea i le amiotonu ina ia faamalosia oe e faataunuuina le finagalo ma le fuafuaga a le Atua mo lou olaga, i le suafa o Iesu. Tatalo, Tamā, faamolemole, faafou lo’u fiaai faaleagaga ma fesoasoani mai ia te a’u e saili ia te oe i taimi uma ma lo’u loto atoa, i le suafa o Iesu, Amene. 

OPEN HEAVENSMATALA LE LAGI MO LE LULU 6 ME 2026(tusia e Pastor EA Adeboye) Manatu Autu: Mealilo o le soifua umi 3 (Secrets to longevity 3)Tauloto Tusi Paia: 2 Timoteo 2:22 “Ia e sola ‘ese i tu‘inanau o taulele‘a, ‘ia e tausisi i le amiotonu, ma le fa‘atuatua, ma le alofa, ‘atoa ma le filemū, fa‘atasi ma i latou o ē vala‘au i le Ali‘i ai le loto mamā.”Faitauga - Tusi Paia: Kenese 39:10-13 I le lua aso talu ai, sa ou talanoa atu i le taua o le iloa o le taimi e te lafi ai, ma e finau ai, o ni mealilo taua lea o le soifua umi. O le asō, o le a ou talanoa atu i le isi mealilo o le soifua umi, o le iloa o le taimi e te tamoe ai. A e faitau malie i le Tusi Paia, o le a e malamalama i le vaega o le faasinomaga o fanau a le Atua, o le maua o le atamai ma le malosi. Faataitaiga, fai mai le 1 Ioane 4:4 e sili o ia ‘ua ‘iā te ‘outou (Le Atua), i lē ‘ua i le lalolagi (le tiapolo), o loo faalia ai le malosiaga ma le mana o loo iai tatou le au kerisiano. Peitai, a oo i na tatou fefaatauai ma le agasala aemaise le tuinanau, fai mai le tauloto o lenei aso, e le na o na tatou tamomoe ese ae tatau ona tatou sosola ese. E le galue le faauuga i luga o le tuinanau, o lona uiga, tusa lava pe o le a le malosi o le faauuga ia te oe, pau lava le mea e faia ole sola ese. E mafai ona e faapea ifo ia te oe, ‘i le faauuga i luga o Tamā, le Taitai Aoao ma le maoae o lona taimi e faaalu e mafuta ai ma le Alii, e tatau foi la ona ia sola ese mai le tuinanau?’ O le tali o le Ioe. O le mea moni ua sili atu le tatau ona sola ese i le taimi nei nai lo le taimi ao avea ma kerisiano talavou. E mafua ona ua ou iloa, poo ai lava e tamoe i se tamoega, e manaomia le tamoe saoasaoa i le tini ina ia manumalo i se faailoga. O le tuinanau e le na o le pau lea o le agasala tatou te sosola ese mai ai, e tatau ona tatou sosola ese ma i soo se ituaiga agasala. Fai mai le 1 Tesalonia 5:22 “Ia mamao outou ma mea leaga eseese uma lava”. O lona uiga o soo se taimi e te vaai i se mea e iai le amioleaga, e tatau ona e alo ese mai ai. Faataitaiga, afai e siomia oe e tagata e fiafia i le amioleaga, e tatau ona e faamamao ma i latou. Fai mai Salamo 1:1 “aua foi e te savali ile filifiliga a e amiolega, aua foi e te tu i le ala o e agasala, pe nofo foi i le nofoa o e tauemu”. E mafai ona e faafeiloai iai latou, ma aoao iai latou, ae aua e te faa’uo iai. Fai mai le 2 Korinito 6:14-15 “Aua tou te amo fa‘alegatasi ma ē lē fa‘atuatua; auā pe fa‘apefea ‘ona fa‘atasi o le amiotonu ma le amio leaga? Pe fa‘apefea fo‘i ‘ona mafuta o le malamalama ma le pouliuli? Pe fa‘apefea fo‘i ‘ona loto gatasi o Keriso ma Pelialo? Pe fa‘apefea fo‘i ‘ona tofusia fa‘atasi o lē fa‘atuatua ma le ‘ua lē fa‘atuatua?” Le au pelē, a e manao e te manumalo i le tamoega ua tuu e le Atua i ou luma, e tatau ona e sola ese mai agasala uma, ma aua nei faia ni mafutaga ma galuega a le pogisa e leai se fua. Sola ese mai soo se mea o iai le amioleaga, i le suafa o Iesu, AMENE.

OPEN HEAVENSMATALA LE LAGI MO LE ASO LUA 5 ME 2026(tusia e Pastor EA Adeboye) Manatu Autu: Mealilo o le soifua umi 2 (Secrets to longevity 2)Tauloto Tusi Paia: Iakopo 4:7 “O le mea lea ‘ia ‘outou gaua‘i ai i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou.”Faitauga - Tusi Paia: Efeso 6:10-17O ananafi na amata ou faasoa atu i mealilo o le soifua umi ma vaega e tumau ai le au faatuatua i ala ua saunia e le Atua mo i latou. O le asō, o le a ou faasoa atu i leisi mealilo mo le soifua umi, o le iloa o le taimi e tau ma finau ai. A lua fetaiai ma le tiapolo, e le tatau ona e tamoe pe lafi, e tatau ona e tu ma tau. O le tiapolo e lē o se agaga agamalū, e taumafai e gaoia aia tatau mai tagata, e ala i le gaoi, fasi ma faaumatia (Ioane 10:10). O lona uiga o soo se taimi e tuu ai i luga lona ulu auleaga, e tatau ona e tetee vave ia te ia ma tuu i lona tulaga e faaaoga ai le pelu o le agaga (Upu a le Atua). E toatele tagata e manatu e latou te nonofo faatasi ma le tiapolo ma faia ni feagaiga ma i latou. Mo se faataitaiga, e iai ni aganuu ma faiga masani i aiga e ofo ni taulaga i agaga mo le puipuiga, ua latou manatu i le faaolaola pea o nei aganuu, o le a tuua i latou e le tiapolo. Peitai e le faapea le tulaga e iai aua o le tiapolo e tala pepelo, e pepelo ma o le tamā o pepelo ( Ioane 8:44). E le o seisi e fai ai se feagaiga, ma o le mafuaaga lea e fai mai le tauloto o le asō e tatau ona e tetee ia te ia ina ia sola ese ma oe. E lē tatau ona e fai paaga pe lulu lima ma ia. O le faitauga o le Tusi Paia o le asō o loo faapea mai o tagata faatuatua e tau ma ali‘i sili, ma faipule, ma ali‘i o le pouliuli o lenei lalolagi, ‘atoa ma agaga leaga i mea o i le lagi. O loo faapea mai fou e tatau i kerisiano faatuatua ona oofu i ofutau mai le Atua, peitai e te iloa e leai se vaega o le ofutau e puipuia le patua. O lona uiga o le taimi e ū ai le tua o seisi i le tiapolo, e na te osofai i lea kerisiano faatuatua. O lona uiga, e lē tatau ona ū lou tua ao e tamoe ese mai le tiapolo. Mo se faataitaiga, a e vaai atu o loo osofai le tiapolo i lau faaipoipoga, e lē lava le tau o le faia o se fono a le tou aiga aua fai mai le Tusi Paia i le 2 Korinito 10:3-4, o auupega o le taua e lē faaletino. Ae e te tulia le tiapolo mai lou fale i le faasagatau ia te ia e faaaoga ai le pelu o le Agaga (upu a le Atua). E faapena foi pe a e vaai atu e iai ni mea ese ua tutupu i le galuega a le Atua ua maea tuuina atu ia te oe, pe osofaia foi e le tiapolo lau galuega poo le pisinisi, tu i luga ma tau le taua. Aua nei ū lou tua i le tiapolo, e lē taalo lelei. O lau tali i le tiapolo e lē o le tamoe pe lafi, ae e tatau ona e tu ma tau le taua, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 4 ME 2026(tusia e Pastor EA Adeboye) Manatu Autu: Mealilo o le soifua umi 1 (Secrets to longevity 1)Tauloto Tusi Paia: Failauga 3:7 “o ona po e saei ai ma ona po e su‘i ai, o ona po e fa‘alologo ai ma ona po e tautala ai.”Faitauga - Tusi Paia: Failauga 3:1-8Ua 84 nei o’u tausaga, ua ou faaolaina mo le 53 tausaga, ma i le alofa tunoa o le Atua, ua avea a’u ma taitai aoao o le Ekalesia RCCG mo le 45 tausaga. I le viiga o le Atua, o loo ou galue punouai pea ma le filigā mo lo’u Tamā i le lagi i lo’u matua o loo iai nei. O loo ou tumau pea o se kerisiano malosi, ma o loo tuputupu pea le Ekalesia i le alofa tunoa o le Atua. I nai aso o le a sosoo atu, o le a ou faasoa atu ia te oe ini mealilo o le ola umi ma ta’u atu ia te oe vaega e tumau ai i ala o le Atua mo lou olaga e aunoa ma le toe foi i tua. O le mea lilo muamua i le ola umi, o le iloa o le taimi e lafi ai, finau ai ma tamo’e ai. E toatele kerisiano e manatu ona o latou e ia Keriso, e leai se taimi e tatau ai ona lafi aua o Lē e ona le mana uma lava o loo au ma puipui i latou. O le mafuaaga lea e toatele ai kerisiano faatuatua e lē tumau i le ala ua saunia e le Atua mo i latou ma faapuupuu ai latou faigamalaga. I le 1 Tupu 17:1 ina ua maea ona folafola e Elia i le tupu o le a lē toe iai se timu seiloga e na te faatonuina, o le Atua lava na fai ia te ia e alu e lafi. E iai lava le taimi e lafi ai ina ia mafai ona umi ma mamao le ala e te ausia. Ua folafola e Elia ua na o ia e toatasi e mafai ona toe aumaia le timu, o lona uiga e ono toatele tagata e unaia o ia ia toe folafola e oo mai le timu. O lea e sili atu le alu e lafi i lo le feagai ma tagata o loo unaia ma faatauanau atu ia te ia. A e vaai atu o loo unaia oe e fai ni faamatalaga poo ni gaoioiga e aunoa ma se faatonuga a le Atua ia te oe, e tatau ona e alu e lafi. Mo se faataitaiga, tusa poo le a le unai mai a tagata ia fai sa’u faamatalaga ae lei faia faiga palota i Nigeria poo taimi foi e tutupu ai ni mea tetele i le atunuu, ou te filemu lava pe afai e lei faailoa mai se mea e le Atua. O le mafuaaga lea e fia faalogo ai pea tagata pe a ou tautala i le faasolo mai o nei tausaga e tele, aua latou te iloa e mai le Atua. O le isi taimi e te lafi ai pe afai o loo faa misa mai le auuso kerisiano ia te oe. E matua leai se lagolago a le Atua i kerisiano e tauai misa, aua foi e tatau ona alofa le tasi i le isi, o le vaega lea e ese mai ai kerisiano mai tagata lē faatuatua (Ioane 13:34-35). O lea, o le faamautinoa e te lē misa ma le au uso, o ē o loo fia misa mai ia te oe, aua e te tali iai ae alu e lafi. Ia avatu e le Atua le poto e te iloa ai le taimi e lafi ai ina ia e tumau pea i le ala e ausia ai lona finagalo mo lou olaga. TataloTamā, faamolemole aumai ia te a’u le poto e iloa ai le taimi e lafi ai, i le suafa o Iesu, Amene. 

OPEN HEAVENSMATALA LE LAGI MO LE ASO SA 3 ME 2026(tusia e Pastor EA Adeboye) Manatu Autu: O le a se mea e te manao ai mai le Atua i le asō? (What do you want from God today?)Tauloto Tusi Paia: Teuteronome 30:19 “Ou te vala‘au i le lagi ma le lalolagi i le aso nei e fai ma molimau ‘iā te ‘outou, ‘ua ‘ou tu‘uina atu i ou luma o le ola ma le oti, o le manuia ma le malaia; o lenei, ‘ia e filifili i le ola, ‘ina ‘ia ola ai oe ‘atoa ma lau fānau;”Faitauga - Tusi Paia: Ioane 5:1-14O nisi tagata e mafanafana a i latou i latou faafitauli, ma e latou te teena soo se ituaiga fesoasoani e oo mai i o latou ala. Mo se faataitaiga, e te manatu ina ua tau atu loa Iesu i le tagata ma’i mo le 38 tausaga mai le faitauga o le Tusi Paia o le asō, e na o le faatonu lava e tu i luga ma ave lona moega. Peitai o le mea muamua na faia e Iesu o le fesili atu e faapea, ‘e te fia malolo ea?’ E lei faia se faaiuga a Iesu mo ia, ae na fesili muamua ia te ia pe manao e malolo ae lei faamaloloina o ia. Fai mai le Luka 18:40-41“‘Ua tu Iesu, ma fetalai atu, ‘ia ta‘ita‘iina mai le tagata tauaso ‘iā te ia. ‘Ua latalata mai o ia, ‘ona fesili atu lea o Iesu ‘iā te ia, ‘ua fa‘apea atu, “Se a le mea ‘e te mana‘o i ai ‘ou te faia mo oe?” ‘Ua fai mai o ia, “Le Ali‘i e, ‘ia va‘ai ‘ou nei mata.”I le fuaiupu ua taua i luga, na faafofoga Iesu i le alaga a le tagata ia te ia mo se fesoasoani. Ina ua fai atu e aumai le tagata i ona luma, e lei faapea na ave e Iesu e manao le tagata i le faamalologa, e ui e te iloa atu e tauaso. Na ia fesili atu ia te ia, ‘se a le mea e te manao iai ou te faia mo oe?’. Sa iai se fafine na ma’i ma na matou tatalo faatauanau mo ia ia manuia. Ina ua leai se suiga e tino mai, na faateia ai matou aua matou te iloa lelei lo matou Atua o le Fomai matautia. O lea na matou ole atu ia te ia faapea, ‘Tamā, o le a le mea ua tupu? E iai se mea e tatau ona matou faia e lei faia?’ Ona tali mai lea, ‘O loo tou tatalo mo le famalologa o le fafine lea, peitai ua tou fesili iai pe fia malolo?’ Na ou manatu ia te a’u lava, e mautinoa o soo se tagata ma’i e fia malolo peitai na finagalo le Atua e fesili i le fafine pe fia malolo ma o lea na ou fesili iai, ae o lana tali ‘e leai!’ Na faateia a’u ma ua ou fesili iai pe aisea ae tali mai, ‘A’o ou manuia, e tuai mai lava lo’u toalua pe a manava. E alu i le kalapu pe a manava. Ae ina ua ou ma’i, e sau sa’o lava i le fale pe a manava. O le mea lea ou te lē fia malolo ai’. Le au pele e, o loo tuuina e le Alii i ou luma le ola ma le oti, faamanuiaga ma le malaia, mauoa ma le mativa, saolotoga ma le saisaitiaga, peitai e na te lē faamalosia lana meaalofa o le faamalologa, ola, faaolataga i soo se tagata. Afai o e feagai ma ma’i, mativa, poo soo se tulaga lē lelei i lou olaga, ole atu i le Atua i le asō pe afai e te manao moni i se vavega mai ia te ia. E faafofoga o ia i lau tagi atu ma e tali i ou manaoga. Valaau i le Atua i le asō i le suafa o Iesu, ma ia faamanino ma faamaoti lou manaoga e te naunau e faia mo oe, i le suafa o Iesu, Amene. 

OPEN HEAVENSMATALA LE LAGI MO LE ASO TOONAI 2 ME 2026(tusia e Pastor EA Adeboye) Manatu Autu: O le aao malosi o le Atua 2 (The mighty hand of God 2)Tauloto Tusi Paia: Teuteronome 26:8 “Ona ‘aumaia lea o i tatou e le ALI‘I nai Aikupito i le ‘a‘ao malosi, ma le ‘a‘ao fa‘aloaloa, ‘atoa ma mea mata‘utia tele, ma fa‘ailoga, ma vāvega.”Faitauga - Tusi Paia: Iosua 4:1-3, 21-24A galue le aao malosi ma le mata’utia o le Atua mo le lelei o se uso, aiga po o se atunuu, e masani lava ona taunu’u pe i’u i fa’amanuiaga tetele ma lelei. O lona aao malosi fo’i e aumaia fa’amagaloga atoatoa i e o saisaitia ma le sa’olotoga i e o sauaina. I le Esoto 3:19 na fetalai le Atua ia Mose o le a lē tuuina mai e Farao le fanauga a Isaraelu e o, se’i vagana ua fa’amalosia e se aao malosi ma le mata’utia. O lea la ina ua fa’aalia le malosi o le aao o le Atua na maua e le fanauga a Isaraelu le laveaiina, puipuiga, malamalama ma le foa’i. A’o Aikupito, na avea ma ata lafoia o ia lava. Ua faailoa mai ai a’o galue le aao malosi o le Atua mo ona tagata, na faapenā ona galue e tete’e atu i so’ose malosi e ono tula’i ma faasagatau i le Alii po’o ona tagata. Fai mai le Esoto 8;17-19“………na fa‘aloaloa e Arona lona lima sa i ai lona to‘oto‘o, na ia tā i le efuefu o le fanua, i le ‘ua fai ma ‘utu i tagata ‘atoa ma manu; ‘ua liu ‘utu o le efuefu uma lava o le fanua i le nu‘u uma lava o Aikupito. ‘Ua fa‘apea ‘ona fai fo‘i e taulāitu ‘iā latou togafiti fa‘ataulāitu, ‘ina ‘ia tutupu a‘e o ‘utu, ‘ae lē mafaia; sa i ai fo‘i o ‘utu i tagata ‘atoa ma manu. ‘Ona fai atu lea o taulāitu ‘iā Farao, “O le ‘a‘ao lenei o le Atua.” A ‘ua ma‘a‘a pea le loto o Farao, e le‘i fa‘alogo o ia ‘iā te i lā‘ua, fa‘apei ‘ona fetalai mai ai o le ALI‘I.”I le fuaiupu mai le Tusi Paia o loo tusia i luga, o loo faamatala mai ai o faataulaitu Aikupito o ē na o latou mafaia muamua ona fa’ata’ita’i galuega ofoofogia na fai e Mose na ta’utino o le aao o le Atua o loo galue i le soifua o Mose, ina ua lē toe mafai ona o latou fa’ata’ita’ia mea na faia e le Atua e ala ia Mose. E ui i lea na ma’a’a pea le loto o Farao, ma musu e tuuina atu le fanauga Isaraelu e o. Faatoa sui ina ua o’o ifo le aao mata’utia o le Atua i ona luga faatasi ma ona tagata. Ou te tatalo, so’ose tasi o fa’ama’a’a ma tete’e atu ia te oe o le a o’o atu i ai le aao malosi o le Atua, i le suafa o Iesu.I le faitauga mai le Tusi Paia o le asō ina ua sopoia e le fanauga Isaraelu le vaitafe o Ioritana, sa galue le aao malosi o le Atua. Ina ua taunuu i le isi itu, na ta’utino e Iosua e moni, na faia e le Atua le ala i totonu o le vaitafe o Ioritana ma ta’ita’i atu i latou i le isi itu i luga o le eleele mātūtū ma faaali I tagata uma o le lalolagi, e malosi lona aao (Iosua 4:24). O le aao malosi o le Atua e faia le ala mo tagata ua foliga ua leai se faamoemoe. Afai o oe moni o se atalii o le Atua, fiafia auā e fa’amautinoa e lona aao malosi e galulue mea uma mo lou lelei (Roma 8:28). Peita’i afai e lē o oe o se atalii o le Atua poo e fai mai o oe o se kerisiano a o loo ola pea i le agasala, ou te fautua ia te oe ia e salamō i le asō ina ia aua ne’i e faasaga i le toasā o le aao malosi o le Atua. Ia aapa atu le aao malosi o le Atua e aumai oe i le manumalo o manumalō, ma puipuia oe mai mailei a le fili, i le suafa o Iesu, Amene.

OPEN HEAVENSMATALA LE LAGI MO LE ASO FARAILE 1 ME 2026(tusia e Pastor EA Adeboye) Manatu Autu: O le aao malosi o le Atua 1 (The mighty hand of God 1)Tauloto Tusi Paia: 1 Tupu 18:46 “Sa ‘iā Elia le ‘a‘ao o le ALI‘I; ‘ona fusi ai lea o ia i lona sulugātiti ma tamo‘e i luma o Aapo, ‘ua o‘o i le mea e ui atu ai i Isereelu.”Faitauga - Tusi Paia:Neemia 2:1-18I le tele o tausaga talu ai, na ou sue ai i se suega o le Matematika, ma ina ua aumai le pepa suega, ou te vaai atu e leai ma se fesili ou te iloa le tali. E ui ou te lelei i le numera, na matuā leai ma se mea na ou iloa i lea taimi. Ua amata ona ou afu malulū. Na ou tilotilo solo ma ou vaai atu i a’u uo o loo punonou ma tusi a latou tali. Ona ou te iloa e mafai e tamaiti e lē pasi i le suega ona toe su’e i le tausaga fou, ua ou manatu e sili loa pe a ou alu i fafo, ae sei oo i le tausaga fou. A’o ou tū atu i luga, na ou lagona se lima malosi, e ui ou te leiloa atu, o oomi a’u e nofo i lalo. Ina ua maea leisi 15 minute o tau mafaufau poo le a leisi gaoioiga e faia, na ou manatu o le a ou toe faitau lelei fesili. Na faafuafesi ona ou iloa, ua toe oo mai le malamalama ia te a’u ma ua ou iloa tali o fesili. Na amata loa ona tusitusi tali o fesili ma na uma lelei le pepa suega i le taimi faatapula’a. I le alofa tunoa o le Atua, na pasi maualuga lau suega lea. I le tele o tausaga mulimuli ane, ua ou iloa, o le aao malosi o le Atua na faanofoina au i lalo i le nofoa i le suega lea, na ia toe faafoisia lo’u malamalama ma aumai ia te a’u le vave. E ui na amata lemu, o lona aao na fesoasoani ia te a’u na vave ai ona maea le suega, na vave atu foi i a’u uo, o ē na uluai amata tusitusi a latou tali i lō a’u. I le tauloto mai le Tusi Paia o le asō, na iai le aao malosi o le Atua ia Elia, ona tamoe lea ua vave atu i le kariota a le tupu, e ono tosoina e ni solofanua pito i saosaoa i totonu o Isaraelu i lea taimi. O le aao malosi o le Atua na avatu ia Elia le vave faale Atua. E faapena foi i le faitauga mai le Tusi Paia o le asō, ina ua naunau Ieremia e toe foi i Ierusalema e toe fauina pa o Ierusalema, o le aao malosi o le Atua na avatu ia te ia le alofa tunoa i luma o tupu sa galue ai ma taitai sa iai i Ierusalema. Na ia maua le vave faale Atua i le toe fauina o pa puipui ma faitotoa o Ierusalema ona o le aao malosi o le Atua sa i ona luga. Le au pele e, afai o oe o se atalii poo se afafine o le Atua, e mafai foi ona e tofo ma maua le aao malosi o le Atua i ou luga e ala i le faaalu o lou taimi i le tatalo ma suesue i lana Upu i aso uma. E tatau foi ona e faamaulalo i ona luma ma tuu atu uma ou ala ia te ia, ina ia e maua lona alofa tunoa e fanau mai ai le vave faale Atua (Iakopo 4:6). Ou te tatalo mo oe i le asō ina ia iai i ou luga le aao malosi o le Atua ma foai atu le manino ma le vave faale Atua i soo se vaega o lou olaga, i le suafa o Iesu. TataloTamā, faamolemole ia iai i ‘ou luga lou aao malosi ma foai mai le malamalama, vave ma lou alofa tunoa, i le suafa o Iesu, Amene

OPEN HEAVENSMATALA LE LAGI MO LE ASO TOFI 30 APERILA 2026(tusia e Pastor EA Adeboye) Manatu Autu: Leai se faafitauli faigata (No difficult problem)Tauloto Tusi Paia: Ieremia 32:27 “Fa‘auta, o a‘u lava o le ALI‘I, o le Atua o tagata uma; pe faigatā ‘ea ‘iā te a‘u se mea e tasi?”Faitauga - Tusi Paia:Ioane 6:1-14I le tele o tausaga talu ai, na fai sa matou sauniga faapitoa o Agaga Paia i Lagos, Nigeria. Ao fai la’u lauga, na oo mai le Upu a le Atua ia te a’u e faapea, ‘o loo iai se tagata na fanau mai ma se faafitauli i lona itutino sā, ua faamalolo oe e le Atua i le asō’. Na vave ona alaga se alii talavou o le faapotopotoga. Na fanau mai ma le faafitauli ma na ave i taulasea palu vai ma ua atili ai le faafitauli. Na sau i le matou ofisa ma le tautinoga o le vavega ia te ia, ma iu ina manuia ma ua mafai ona maua se la tama ma lana avā. E leai ma se faafitauli e faigata i le Atua. I le tauloto mai le Tusi Paia o le asō, na fetalai le Atua e leai se mea e faigata ia te ia. E leai se mataupu e lavelave tele e lē mafai e le Atua ona fofo. A e faitau i le Tusi Paia, e te iloa ai le tele o taimi e fofo ai e le Atua faafitauli e lavelave ma ua leai se faamoemoe. I le faitauga mai le Tusi Paia o le asō mo se faataitaiga, na ia fafagaina le sili atu ma le 5000 o tagata i le nā o le 5 areto ma i’a e lua. Na ia faatūina se tamaloa mai le tuugamau na oti ma ua tanumia mo le fa aso (Ioane 11:1-44). E faapena foi i Kana i Kalilaia, na liua e lo tatou Alii o Iesu Keriso le vai i le uaina i se faaipoipoga ua maea ma leai se uaina (Ioane 2:1-11). Fai mai le Luka 1:37, e leai se mea e lē mafai ona faia e le Atua Matautia. Le au pele e, e lē tatau ona e faatagaina le iai o se tulaga e foliga mai ua leai se faamoemoe e te faavaivai ai. A e feagai ma tulaga faapea, aua le faavaivai, tuu lou faatuatua i le Alii. Fai mai le Tusi Paia i le Roma 10:11, o i latou e tuu lo latou faatuatua i le Alii e lē faamāina. Ta’u atu i le Atua lou faafitauli, ona e malolo lea ma le mautinoa, e faia e le Atua mea e lē mafaia. Ou te folafola atu ia faasaoina oe e le Alii mai soo se tulaga i lou olaga e ono foliga mai ua leai se faamoemoe pe matuā faigata tele, i le suafa o Iesu. Aua e te faavaivai ae faatuatua i le Atua e na te faia mea uma e fai mai le toatele e lē mafai, i le suafa o Iesu, Amene. 

OPEN HEAVENSMATALA LE LAGI MO LE ASO LULU 29 APERILA 2026(tusia e Pastor EA Adeboye) Manatu Autu: Pe a iai o Ia i le va’a 2 (When He is in the boat 2)Tauloto Tusi Paia: Salamo 16:8 “Ou te tu‘u le ALI‘I i o‘u luma e lē aunoa; auā o i lo‘u itū taumatau o ia, e le fa‘agae‘etia ai lava a‘u.”Faitauga - Tusi Paia: 2 Tupu 6:1-7O le aso ananafi na tatou vaai ai i le auala na manumalo ai soo o Iesu i le matagi malosi, aua sa iai Iesu i totonu o le vaa ma i latou. Ina ua latou valaau ia te ia, na tulai o ia ma vavao i le matagi. O le mea moni, o tagata uma i le lalolagi nei, e iai taimi e ui ai i matagi malolosi o le olaga, tusa poo le a le maualuga o le faauuga, meaalofa o le agaga, poo le tulaga pule ma le tauoloa o loo iai. O nei matagi malolosi e oo mai i soo se tulaga e aofia ai le ma’i, faatuai ona taunuu, lē fanau poo le maliu o sē pele. E pei ona ou talanoa atu ananafi, a iai Iesu i le va’a o se tagata, e mafai e lea tagata ona manumalo i soo se matagi malosi. Peitai, afai e lē ole ma tagi atu lea tagata i le Atua i le ogatotonu o se matagi, e ono lē manumalo o ia. Afai e lē faataga e se tagata le Atua i ona laasaga uma ae manatu e faalagolago i lona lava poto, e oo lava ina malemo i matagi o le olaga. I le faitauga mai le Tusi Paia o le asō, na o mai atalii o perofeta ia Elisaia ma logo ia te ia e fia faalautele lo latou fale e nonofo lelei ai. Na fai iai Elisaia e o e fai, peitai o se tasi o i latou e lei malie e tau o le faatagaga a Elisaia, na talosaga atu e latou te ō e aumai laau e fai ai le fale. Ao tā laau mo le fale, na paū le ulutoi a se tasi o i latou i totonu o le vai. Na vave ona alu atu le tamaloa ia Elisaia, e pei lava o le au so’o o Iesu i le ogatotonu o le matagi malosi. Na tagi atu le tamaloa ia Elisaia mo se fesoasoani aua sa ia faanoi mai le to’i mo lea galuega. Na afio atu le Atua i lea tulaga ona toe maua lea o le ulutoi i se vavega.  Le au pele e, e mafai e le Alii ona avatu le faatagaga e amata ai se galuega, peitai afai e te lē faalagolago ia te ia i le galuega atoa, e ono lē manuia e pei ona ia uluai fuafuaina. E lē tatau ona e faatali i tulaga o mea sei matua leaga ona e faatoa tagi atu lea ia Iesu. Ae tatau ona e faalagolago ia te ia i soo se faaiuga e te faia. I le tauloto mai le Tusi Paia o le asō, fai mai Tavita e na te tuua le Atua i ona luma e lē aunoa i soo se faaiuga poo se gaoioiga. Aua sa faalagolago Tavita i le Alii i soo se mea na te faia, e lei luluina o ia i le mau luitai na feagai mai ia. E tatau ona e faataitai ia Tavita i le tuu lea o le Alii i ou luma e lē aunoa. Ia avea le Atua ma ogatotonu o lou olaga ma ia taitai o ia i ou ala uma. Aua e te avea Iesu o sē e tau na o lou faaaloalo iai, faalagolago ia te ia i soo se mea e te faia ona e manumalo lea i soo se luitau i le olaga ma e maua le manumalo aiai i taimi uma. O le faataga o Iesu i lou vaa e lēlava lea, faataga o ia e faia le faaiuga mulimuli i mea uma e te faia, i le suafa o Iesu, Amene. 

OPEN HEAVENSMATALA LE LAGI MO LE ASO LUA 28 APERILA 2026(tusia e Pastor EA Adeboye) Manatu Autu: Pe a iai o Ia i le va’a 1 (When He is in the boat 1)Tauloto Tusi Paia: Esoto 33:15 “Ona tali atu lea o ia ‘iā te ia, “Pe ‘āfai tā te lē afio atu ma oe, ‘aua le ‘aveina a‘e i matou nai le mea nei.”Faitauga - Tusi Paia: Mareko 4:35-41I tausaga e tele ua mavae, na ou malaga i seisi itu o Nigeria e fai ai se matou polokalame faapitoa. I le taimi lea, e pau le auala e oo ai i lea nofoaga, o le sami. I ni nai aso ae lei faia la matou polokalame, na matou faalogo na goto ni vaa na o ai tagata ma e toatele na maimau ai o latou ola. Peitai, e ui i nei tala, ou te lei maluelue ai, auā na tumau la’u faaiuga e fai i le nofoaga lea la matou polokalame. Na ou taloina se fonotaga mo le aufaigaluega uma i la matou ofisa tutotonu ma saili po’o ai o le a matou malaga. E iai seisi o le aufaigaluega na sii lona lima ma fesili mai, ‘Lau susuga, faamolemole pe mafai ona ou alu i le vaa e te iai?’ Ua ou fai iai ua lelei. Ona ia tali mai lea, ‘ua lelei tele lena tonu’. Na ou fesili iai pe aisea ua faia ai lana fesili lea, ae tali mai o soo se vaa ou te alu ai e lē goto. Sa matua iai lona faatuatua i se tagata ola e pei o a’u, aua o loo ia iloa, o loo iai le Atua ma a’u. I le faitauga mai le Tusi Paia o le asō, na malaga le au soo ma Iesu i le va’a. Ua mavae sina taimi ona oo mai le o se matagi malosi, ae na faateia i latou aua sa matua gase le moe a Iesu. Ona o le fefefe tele, na latou fafagu ia te ia, ona ia vavao lea o le matagi. Ina ua maea, ona taunuu lea o le malaga ma le saogalemu. O le tautinoga lenei o le tulaga moni, o se matua faamanuiaga le iai o Iesu i le va’a o lou ola. Le au pele e, afai o oe o se atalii poo se afafine o le Atua, o loo iai Iesu i le vaa o lou ola ao e malaga atu i le  vai o le olaga nei. Ou te iloa lelei, auā na fetalai Iesu i le Mataio 28:20, e faatasi o ia ma oe i taimi uma. O le mafuaaga lea i le ogatotonu o luitau o le olaga, e tatau ona e faatuatua i Lē o loo iai i le vaa o lou ola aua o loo ia te ia le mana e te manumalo ai. A iai le Atua i le vaa o lou ola, e leai se auupega e faasagatau ia te oe e manuia. A ē faataga o Ia i ou laasaga uma, e te malolo ma le mautinoa, o au taumafaiga uma e i’u i le manuia. Afai e te lei tuuina atu lou ola ia Keriso, lafoai ma le atoatoa ia te ia i le asō ma talia o ia e pule i lou olaga. A e faia, e le gata o le a ia taitai i ou ala uma ae o le a ia savali ma oe i ou laasaga uma, a’o faasolo le malaga o lou olaga. A iai Iesu i lou va’a, e te manumalo i so’o se matagi, i le suafa o Iesu, Amene.

OPEN HEAVENSMATALA LE LAGI MO LE ASO GAFUA 27 APERILA 2026(tusia e Pastor EA Adeboye) Manatu Autu: Fa’ama’iteina o le fesoasoani mai le Atua 3 (Attracting God’s help 3)Tauloto Tusi Paia: Iakopo 4:10 “inā fa‘amaulalo ia i luma o le Ali‘i, ‘ona fa‘amaualugaina lea o ‘outou e ia.”Faitauga - Tusi Paia: Salamo 10:17-18O le asō o le a faa’iu atu le talanoaga na amata atu i le lua aso talu ai i le talanoa atu lea i le fa’amaualalo, o leisi lea auala e tāina mai ai le fesoasoani a le Atua. O le faitauga o le Tusi Paia o le asō, e tatou te malamalama ai e faafofoga le Atua i manaoga o ē agamalū ma faasaoloto iai latou mai soo se saisaitiaga. I le tulaga lea i lou olaga, e tatau ona e lafoai ma le atoatoa lou ola ia te ia. Fai mai le Roma 12:1 “O lenei, le ‘au uso e, ‘ou te ‘ai‘oi atu ‘iā te ‘outou, ‘ona o le alofa mutimutivale o le Atua, ia ‘outou tu‘uina atu o ‘outou tino i le Atua, o le taulaga ola, ma le pa‘ia, ma le mālie, o le mea lea e tatau ai ‘ona ‘outou faia.”A tuuina atu o outou tino i le Atua o se taulaga ola, o lona uiga ua lafoai atoatoa lou ola ia te ia ma ua ia pulea atoatoa lou ola. I le 2 Tupu 5:11-12, na toeitiiti lava lē maua le vavega a Naamanu ona o le faamaualuga. Ua ia manatu o se tagata i lona tulaga tauaoloa i tofi ma le tupe, e tatau ona faapitoa le auala e faia ai ia te ia. Ana lē fautua iai ana auauna e usitai i le perofeta a le Alii i le alu lea e tofu faafitu i le vai i Ioritana, semanu e oti lava o lepela. Fanau a le Atua, o soo se taimi e te alu atu ai i luma o lou Tamā oi le lagi, aua e te manatu i le oa o loo ia te oe poo vaega ua e ausia. Peitai e tatau ona e alu atu i le Atua malosi ma le loto maualalo ina ia e maua lana fesoasoani. Ua ou savali ma le Atua mo le tele o tausaga, ma o se tasi o vaega e inoino iai le Atua, o le faamaualuga. O le mea moni, ua ia fetalai mai i le Iakopo 4:6 “E tete‘e atu le Atua i ē fa‘amaualuga, ‘ae foa‘i mai le alofa tunoa i ē fa‘amaulalo.” O loo ta’u mai ai iai tatou, e vave le fesoasoani a le Atua i ē loto maualalo. O le faamaualalo o Tavita na ia fiafia ma maua ai fesoasoani a le Atua i le tele o taimi o lona olaga. E lei finau lava ma le Atua, ae na ia tilotilo o ia na faia e le Atua e manatu ma asiasi mai iai le Atua( Salamo 8:4). O le tali, na faaauau pea ona fesoasoani le Atua ia te ia seia oo i lona oti, ina ua matua ona tausaga ma le tele o le oa ma le mamalu (1 Nofoaiga Tupu 29:28). Le au pele e, a e naunau e tulai le Atua e fesoasoani ia te oe, e tatau ona lafoai lou ola ma le atoatoa ia te ia. E tatau ona e faailoa o ia e pule i lou olaga, ma a e alu atu i ona luma i le tatalo, e tatau ona e tuu ese lou tulaga tauoloa i tofi ma le oa. Ma le faamaualalo i lou loto, ia faaali atu ou manaoga i le Atua, ma ou te faapea atu ia te oe, e tulai mai o ia e fesoasoani ia te oe, e sili atu i ou manatunatuga uma. O le faamaualuga o se tasi o faalavelave i le tāina mai o le fesoasoani a le Atua, i le suafa o Iesu, Amene. 

OPEN HEAVENSMATALA LE LAGI MO LE ASO SA 26 APERILA 2026(tusia e Pastor EA Adeboye) Manatu Autu: Fa’ama’iteina o le fesoasoani mai le Atua 2 (Attracting God’s help 2)Tauloto Tusi Paia: Efeso 6:7 “ma le fiafia, o lo‘o ‘au‘auna atu ai i le Ali‘i, ‘ae lē o tagata;”Faitauga - Tusi Paia: Kenese 18:1-10O le asō o le a o’u talanoa ai pe faapefea e le fanau a le Atua ona tata’i atu le fesoasoani a le Atua e ala i le auauna punoua’i ma le loto olioli ma le loto malie.I le faitauga mai le Tusi Paia o le asō, ina ua iloa atu e Aperaamo tagata e toatolu o savavali ane i talane o lona faleie na tamo’e e fa’afetaia’i ma fa’aafe i latou e malolō mai la latou faigamalaga. E ui fa’ato’ā vaai lea i nei tagata e lē masani ai, na malie atoatoa e ofo atu se tausiga mo i latou, ma, o nei mea uma na ia faia, na te le’i iloa o le Atua lava ua ia faia i ai. O le agalelei talimālō o Aperaamo na mafua ai ona tula’i le Atua mo ia ma faamalolō le lē fanau na i totonu o lona aiga. O i latou e auauna i le Atua ma le loto malie e aunoa ma se vaai i se taui, e lilifa i ai lana fesoasoani e lē aunoa.I se tasi aso, na fesili mai ai se tasi ia te a’u, “Susuga e, o le a sou manatu faatatau i e tāina mea fa’ili e manana’o e totogi e le ekalesia faatoa auauna ai e tātā mea fai faili? E tatau ona totogi i latou?” Sa o’u tali, “E leai se isi e totogi faalua i se auaunaga e tasi. Afai e manana’o i latou e totogi muamua fa’ato’ā galulue ai, e tatau i le ekalesia ona totogi i latou. Peita’i, e lē tatau ona manatu i latou te maua se faamanuiaga faapitoa mai le Atua mo la latou auaunaga auā o lena ua uma ona totogi e le lotu.” Afai e finau se uso e totogi lana tautua i le Atua, e lē tatau i lea uso ona manatu na te maua se fesoasoani faapitoa mai le Atua mo lea auaunaga. O se atalii e fai i lona tamā e avatu sona totogi mo le fufuluina o lana taavale, e lē tatau ona ia manatu na te maua manuia o loo ‘ae’ae ai le tagata o lo’o auauna i le tamā ma le loto malie ma le olioli. O le tasi o mafuaaga ua o’u fiafia ai i le fesoasoani a le Atua i aso nei, aua na o’u tuua mea uma ae auauna i le Atua, a’o leai se faamanuiaga vaaia i le galue mo Ia.E i ai le eseesega o le auauna i le tagata ma le auauna i le Atua. A auauna i se tagata e mafai ona lilo ma lē iloa le pase’e o le galue ae siitia pea lona tulaga e ui e lē o ia o se auauna lelei. Peita’i o le Atua e silasila i le loto, ma afai o se tasi e tautua pa’aā, e lē maua e lea tagata se manuia mai le Atua. Fai mai le 2 Korinito 12:15 “Ou te matuā fiafia lava e fa‘auma a‘u mea, ia fa‘aumatia fo‘i a‘u ‘ona o ‘outou agaga; auā e ui lava ‘ina atili ai ‘ona itiiti ‘ona alofagia o a‘u, ‘ae matuā tele pea lo‘u alofa atu ‘iā te ‘outou.”I le fuaiupu ua tā’ua i luga, na faailoa e le Aposetolo o Paulo lona naunautaiga ma le loto fiafia e fa’auma ana mea ma faaumatia fo’i ia mo le galuega a le Atua ona e lē gata e alofa i le Atua ae alofa fo’i i tagata ua auina i ai ia e le Atua. Le au pele e, afai e te mana’o e tafe mai le fesoasoani a le Atua, auauna ia te Ia ma le loto fiafia ma le loto malie. E faamaoni o Ia ma e lē mafai ona galo ia te Ia lou tautigā ma le alofa (Eperu 6:10). O i latou e auauna i le Atua ma le loto malie, olioli ma le loto atoa, e tāina mai ai Lana fesoasoani ma faamanuiaga, I le suafa o Iesu, Amene.

OPEN HEAVENSMATALA LE LAGI MO LE ASO TOONAI 25 APERILA 2026(tusia e Pastor EA Adeboye) Manatu Autu: Fa’ama’iteina o le fesoasoani mai le Atua (Attracting God’s help)Tauloto Tusi Paia: Salamo 70:5 “A o a‘u, ‘ua ‘ou puapuagātia a‘u ma le mativa; le Atua e, ‘ia e vave mai ‘iā te a‘u. O lo‘u fesoasoani ma lo‘u fa‘aola, o oe lava lea, le ALI‘I e, ‘aua lava ‘e te tuai mai.” Faitauga - Tusi Paia: 2 Tupu 6:1-7E tāua tele mo le fanau a le Atua lo latou iloa o mea e mafai ona o latou fai e o’o mai ai le fesoasoani a le Atua. E tumu le Tusi Paia I le tele o faamatalaga pe na faapefea ona maua e tagata le fesoasoani a le Atua , ma o le a faasolo atu i aso o le a sosoo atu, lo’u talanoa atu i nisi o aiaiga e mafai ona e faia e ta’aina mai ai le fesoasoani a le Atua.I le faitauga mai le Tusi Paia o le asō, sa ta laau atalii o le ‘au perofeta i talane o le vaitafe o Ioritana ona paū ese lea o le matau na fa’aaogā e se tasi o i latou, i totonu o le vai. Na alaga le so’o i le auauna a le Atua mo se fesoasoani, ona aapa mai lea o le Atua ma aumai le fofō o le faafitauli. E fesoasoani le Atua ia i latou e valaau ia te Ia mo se fesoasoani. I le Salamo 3:4 fai mai Tavita, “Na ‘ou vala‘au i le ALI‘I i lo‘u leo; ‘ua fa‘afofoga mai fo‘i o ia ‘iā te a‘u mai lona mauga pa‘ia. Selā.”E faapea fo’i le Mareko 10:46-52; na alaga Patimaio ia Iesu, ma e ui ina taumafai nisi na i ai e taofi lana valaau, na musu Patimaio le tauaso e fifilemu. O le tali o lona alaga ma tagi pea mo se fesoasoani, na alofa mutimutivale Iesu ia te ia ma faapupula ona mata. O isi taimi a o’u vaai i tagata o tatalo ma le lē manatu mamafa, ou te ofo pe mananao moni i le fesoasoani a le Atua. Afai e te mana’o moni e te maua le fesoasoani mai Lē e toatasi, e mafaia moni ona lavea’i ia te oe, e ao ona faamaulalo lou loto ma le olega ia te Ia ma le loto maulalo mo se fesoasoani. Fai mai 2 Nofoaiga a Tupu 7:14 “āfai e fa‘amaulalo lo‘u nu‘u ē ‘ua ta‘ua i lo‘u igoa ma latou tatalo ma sā‘ili‘ili ‘iā te a‘u ma liliu ‘ese i o latou ala leaga, ‘ona ‘ou fa‘alogo ai lea mai le lagi ma fa‘amāgalo ‘iā latou agasala ma fa‘aolaina lo latou nu‘u.”Ou te manatua ina o fa’atoā ou auai i le ekalesia RCCG, a o faia se sauniga sa faapea mai se tasi sa ta’ita’i, “Viia le Alii,” Ona tali atu lea o se uso sa nofo i ou talane. “Aleluia,” i se alaga leotele na toetoe a o’u alu ai i le atoa i fafo ma le falesa. Le au pele e, aua ne’i fa’atagaina se mea e taofia oe mai lou faatauanau i mea a le Atua. A o’o i le taimi e vivi’i ai ia te Ia, siva i le mea e gata ai lou malosi. E le gata i lea, a o’o i le taimi tatalo, ia taula’i tasi lau vaai ia te Ia. A e i ai i le mamalu o Lē na faia oe, e lē tatau ona e toe manatu i se isi lava mea. Talitonu mai ia te a’u o loo faaauau pea ona fai vavega le Atua i le taimi nei e pei ona ia faia i aso anamua. Afai e te ole atu ma le loto maulalo ia te Ia i le tatalo, e mautinoa e tula’i o Ia e fesoasoani iā te oe. Valaau faatauanau i le Atua i le asō, ma ole atu e fesoasoani ia te oe i soo se vaega e manaomia ai Lana fesoasoani, i le suafa o Iesu, Amene.

OPEN HEAVENSMATALA LE LAGI MO LE ASO FARAILE 24 APERILA 2026(tusia e Pastor EA Adeboye) Manatu Autu: Asiasi mai o le Atua 2 (Divine visitation 2)Tauloto Tusi Paia: Luke 1:78 “Ona ‘ua mutimutivale le alofa o lo tatou Atua, ‘ua asiasi mai ai le malamalama mai lugā,” Faitauga - Tusi Paia: Salamo 65:9-13I tausaga ua mavae, na ou malaga atu i se taulaga i saute o Nigeria, e fai ai se matou polokalame tele, ma na faaali mai e le Atua le tagata ou te nofo ai. Na ou usitai i le Alii peitai na ou taumanatu pe aisea ua filifili ai e le Atua lea tagata aua foi e lē lotu i le matou Ekalesia, na o lo’u masani ai lava, ma e toatele la’u fanau faaleagaga e mafai ona ou nofo ai i lea aai. Ina ua ou taunuu atu i le fale o le tagata lea, na ia tali malō e pei a’u o se tupu. Na ia faafeiloai atu a’u i lana fanau ma sa matou fesootai lelei. Na latalata tele mai ia te a’u se tasi o lana fanau ma ua amata ona ou taua o la’u uo. I le aso lona lua o le matou polokalame, ao ou sauni ou te malaga atu i le nofoaga e fai ai, ae ou vaai atu ua sau i totonu le taavale a lē o loo tali malo ia te a’u, ma lana fanau. Na ou vaai atu i lana fanau uma ae ou te lē o vaai atu i lona atalii lea ua avea ma a’u uo, o lea na ou fesili atu poo fea o ia. Na faateia a’u ina ua tali mai, ‘o lau uo o loo i le falema’i, o le a oti’. Na faaopoopo mai, semanu e na te lē ta’u maia ia te a’u pe ana ou lē fesili atu, ona o loo ou sauni atu mo le polokalame. I le taimi lava lena, na faapea mai le Atua, ‘o le mafuaaga tonu lava lena na ou fai atu ai e te nofo iina’. Ona ou fai atu lea i le tamaloa, ‘tatou ō muamua i le falemai, ae faatali le polokalame’. Na matou o atu i le falemai, ma ou vaaia le tamaitiiti e leai se ofu ae o loo matua afu, e ui o loo i totonu o se potu ea malulu. Fai mai na faaonā e se tagata i le aoga. Ao ou tilotilo atu i le fomai, na faailoa mai ua leai se togafiti mo le tamaitiiti. Ona na faailoa mai e le Atua na ia saunia lo’u nofo i lea aiga mo le mafuaaga tonu lea, na ou faia se tatalo puupuu ona ou alu loa lea e fai le matou polokalame. Ina ua maea le polokalame, ua ou foi i le fale o le aiga lea, ma ao ou mapu atu, na taunuu atu foi ma le tamaloa ma lona atalii, la’u uo. Ua te’a i tua ma le falemai. Le au pele e, e pei ona iloa i le faitauga mai le Tusi Paia o le asō, e tele mea e tutupu ia te oe pe a asiasi atu le Atua. Peitai e lē mafai ona asiasi atu le Atua ia te oe ma foai atu le tele o mea lelei pe afai e te lei tuuina atu lou ola ia Iesu Keriso. Afai e te lei fanaufouina, talia loa Iesu Keriso e fai ma ou Alii ma Faaola, ma lafoai atoatoa ia te ia lou ola. Afai e te faia, e avea oe ma sui o lona aiga, e asiasi atu ma le tele o faamanuiaga. A asiasi le Atua i lana fanau, e mulimuli atu ai ma faamanuiaga, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 23 APERILA 2026(tusia e Pastor EA Adeboye) Manatu Autu: Asiasi mai o le Atua 1 (Divine visitation 1)Tauloto Tusi Paia: Iopu 10:12 “Na e foa‘iina mai ‘iā te a‘u le ola ma le alofa, o lou leoleo mai fo‘i na tausia ai lo‘u agaga.” Faitauga - Tusi Paia: 1 Samuelu 16:1-13O le tauloto mai le Tusi Paia o le asō, o loo faaalia ai o le asiasi ma le leoleo mai o le Atua e aumai ai le ola ma le alofa. A asiasi le Atua i se tagata, e amata ona suia mo le lelei mea uma i le olaga o lea tagata. O lana asiasi mai e iai le faailoga e tumau i olaga o i latou e asiasi iai o ia. I le faitauga mai le Tusi Paia o le asō, na fetalai le Atua ia Samuelu e alu i le fale o Iese e faauu le tupu o le a sosoo ai o Isaraelu. Ina ua taunuu atu, na faailoa mai atalii uma o Iese sei vagana Tavita. O inā e te iloa ai le tulaga matuā lē amanaia o Tavita e lona lava aiga. Peitai, o le Atua malosi ma le matautia, na ia saunia lona asiasi atu ia Tavita ao pisi lava o ia e vaai le lafu mamoe a lona tamā. Na faatonu e le Atua Samuelu e faauu atu ia te ia i luma o lona aiga, ma na amata mai lea aso ona amata suia mea uma mo lona lelei. Fai mai le Kenese 28:13-14 “Fa‘auta fo‘i, ‘ua tu ai le ALI‘I i ona luga, ‘ua fetalai mai, “O a‘u o le ALI‘I le Atua o Aperaamo lou tamā, ma le Atua o Isaako, o le fanua ‘e te ta‘oto ai ‘ou te avatu ai ‘iā te oe ma au fānau. E ‘avea fo‘i lau fānau pei o le efuefu o le ‘ele‘ele, e fa‘asalalauina solo fo‘i oe i sisifo, ma sasa‘e, ma le itū i matū, ‘atoa ma le itū i saute, o oe fo‘i ma au fānau e manuia ai ‘āiga uma o le lalolagi.”I le tusi fuaitau o loo taua i luga, na asiasi le Atua Malosi ia Iakopo, ma na amata mai i le aso lea, ona iloa faamanuiaga a le Atua i lona olaga.  Na manuia ma mauoa ma ua alofaina o ia i le silafaga a le Atua ma tagata. Ina ua asiasi le Atua ia Sara, na ataata i le olioli, ma o i latou na faalogo i lona talaaga na fiafia ma ia (Kenese 21:1-6). Na asiasi foi le Atua ia Hana ma o ona tausaga uma na lē fanau ai ma faanoanoa ai, na mou ese (1 Samuelu 1:19-20). E faapena foi ina ua asiasi le Atua ia Iosefa, o tausaga o le puapuaga, pologa ma le faigata, na mou ese i le aso e tasi, na ala ae i le taeao o falepuipui ae maea ane le aso ua siitia i le tulaga lona lua, e sosoo ma Farao ( Kenese 41:14, 41-44). O le aso na asiasi ai le Atua i le tamaloa i le vai i Petesa, o le aso lea na savali ai. I luma atu, sa pipili mo le 38 tausaga ( Ioane 5:1-9). Le au pele e, o Tamā i le lagi, o lana matafaioi o le faia o mea e lē mafaia. Afai o e tumau i se tulaga e pei e leai se faamoemoe, tagi atu ia te ia i le asō ma ole atu ia asiasi mai ia te oe. Auā o oe o lona atalii poo le afafine, e faalogo o ia i lau tagi atu, ona liliuina lea o lou olaga mo le manuia. Ou te tatalo ia asiasi atu le Atua ia te oe i le asō, ma o soo se mea fai mai e lē mafai ona faia i lou olaga, o le a mafaia, i le suafa o Iesu. TataloTamā, faamolemole, asiasi mai ia te a’u ma soo se mea e tau ia te a’u, i le suafa o Iesu, Amene. 

OPEN HEAVENSMATALA LE LAGI MO LE ASO LULU 22 APERILA 2026(tusia e Pastor EA Adeboye) Manatu Autu: Liliuina o le faalumaina (Reversing shame)Tauloto Tusi Paia: Sefanaia 3:19 “O le ALI‘I le amiotonu o lo‘o i totonu ‘iā te ia, e lē faia o ia se amioletonu; o lea taeao ma lea taeao na te fa‘amalamalama mai ai lana fa‘amasinoga, e lē aunoa lava; a o le tagata amioletonu na te lē iloa mā. Fa‘auta, o ona po ia ‘ou te fa‘atigā ai ‘iā te i latou uma, o ē fa‘asauā ‘iā te oe. ‘Ou te fa‘aolaina fo‘i lē ‘ua setusetu, ‘ou te fa‘apotopotoina fo‘i lē ‘ua tulia. ‘Ou te avatu fo‘i ‘iā te i latou le vi‘iga, ma le igoa i nu‘u uma lava sa fa‘amāina ai i latou.” Faitauga - Tusi Paia: Ioane 2:1-11I se taimi ua mavae, na sau se fafine i le lotu ma faapea mai, “Faamolemole fesoasoani mai ia te au, ua ou leiloa le mea o le a fai. O lou toalua ua fealualu’ai solo i le po ua lē mafai ona ia pulea ana mea e fai”. Sa matou taitaia lenei tina ia Keriso ma tatalo mo ia. E le i umi ae siitia lona tulaga i lana galuega ma ua maua lana taavale fou. Ona e lē iloa ave taavale, sa augani i lona toalua e alu e momoli o ia i le lotu, sei alu ifo le faifeau e faapaia le taavale. Sa malie i ai lona toalua ma le tuutuuga, e nao le ave lava i le lotoā a le lotu ae le ulufale i le falesa. Sa ia momoli ma nofonofo i le taavale ae alu lona toalua ile lotu. Ao nofonofo le tamaloa i le taavale, na ia lagona atu lava le lauga o loo faia. Mulimuli ane ua fai le valaau, ma ua alu i totonu o le falesa ma tuuina atu lona ola ia Iesu. Ua tuanai nai vaiaso, ona osofaia lea o lenei tamaloa e le tiapolo ao agai atu i lana galuega. Ua ese ona faalogona, ua amata lē lelei lona mafaufau ma ua fealualu’ai solo i lana taavale seia oo ina ulufia e Agaga Paia ma faatonuina e alu i le falesa. Ina ua taunuu i le falesa ma ua oso i fafo mai le taavale, ua vaaia e tagata e foliga o loo iai se mea o tupu ia te ia. Sa latou feosofi mai ma fesoasoani e avatu o ia i totonu o le falesa. Sa matou tatalo mo ia, ona tuuina atu lea i le Atua o lona tulaga o lo’oiai. Ua leva ona silafia e le Atua e iai faafitauli e feagai ma lenei tamaloa. Ana faapea e le toe fanaufouina, ua leva ona leaga le ulu. Ua ia filifilia se nofoaga e mapu iai i le taimi o faafitauli. Ou te tatalo, o a ni fuafuaga a le fili e  faalumaina ai oe, ia faaleaogaina i le Suafa o Iesu. I le faitauga o le Tusi Paia o le asō, o se ulugalii ua faaipoipo ma ua lā valaaulia Iesu i le tausamaaga. Ua amata mea uma i le lelei seia oo ina uma le uaina. E lei amatalia lo laua olaga nonofo faatasi ae o lea ua feagai ma le faafitauli o le faalumaina. Ae faafetai na liua e Iesu le faalumaina i le faamamaluina, ina ua lava ma totoe le uaina lelei mo le au valaaulia. Le au pelē, i le Roma 10:11 fai mai, o soo se tasi e faatuatua i le Atua, e le faamāina. Afai o e iai i se tulaga faalumaina i le taimi nei, tuu lou faatuatua i le Atua ma tagi atu ia te ia. E na te lagonaina lau tagi, ona liua lea o lou faalumaina i se tautinoga matagofie i le suafa o Iesu. Tatalo: Tama, faamolemole aua nei ou feagai ma le faalumaina, i so’o se vaega o lo’u olaga i le suafa o Iesu. AMENE

OPEN HEAVENSMATALA LE LAGI MO LE LUA 21  APERILA 2026(tusia e Pastor EA Adeboye) Manatu Autu: Liliuina o ma’i (Reversing sickness)Tauloto Tusi Paia: Malaki 4:2 “A o ‘outou o ē matata‘u i lo‘u igoa, e alu a‘e ‘iā te ‘outou le Lā o le amiotonu; e i ai fo‘i le mea e mālōlō ai i ona ‘apa‘au; e ō atu fo‘i ‘outou ma osooso pei o tama‘i povi mai le fale povi.”Faitauga - Tusi Paia: Galuega 9:32-34Sa iai se tama talavou, na ō ona matua e tapuai ma ifo i tupua, ua ave o ia i se tagata fai vai faataulaitu i le faatoa fanau mai. Ina ua taunuu atu i le tagata fai vai lea, na ia tilotilo i le pepe ma faapea mai, ‘e sili lou alu e ave le pepe lea ia Iesu Keriso’. Ina ua faalogo iai matua, na matua lē fiafia ma faapea mai, e faapefea ona fai mai se tagata fai vai e ave ia Iesu? E pei a o loo iai se mea o faaletonu ia te oe’. Ao ō ese ma le tamaitiiti mai lea nofoaga, na faafuaseia ona ma’i ma oo ina maimai i lona laitiiti atoatoa. Na ave e ona matua i soo se mea e saili fofo ai, peitai ua atili ai ona ma’i le tamaitiiti. E iai se aso, na ta’u iai ese tagata i nei matua e aumai le tama i se tasi o matou polokalame. Na latou aumaia le tamaitiiti e lilo le tino i le mau vai. Ao ou lauga, na faafuaseia ona ou vaai ise vevesi mai se itu o le faapotopotoga. Ina ua maea le sauniga na ou fesili poo le a le mea na tupu, a ua fai mai, ao faagasolo le sauniga, na tatala e le tina le ofu o le tamaitiiti ona o le vevela ae faatautau i luga o se nofoa. E lei leva, ae sau se gata mai le ofu o lenei tamaitiiti. Na paū mai le mamafa o le mana o le Atua ma aveesea soo se malosiaga leaga o loo faasagatau i lenei tamaitiiti. Na faaumatia le gata, ae maua e le tamaitiiti le faasaolotoga mai le ma’i. Ou te tatalo e lia’ieseina soo se mea elei totōina e le Atua i lou tino, i le suafa o Iesu. O le faitauga mai le Tusi Paia o le asō, o loo taua ai se tamaloa, o Ainea, e valu tausaga o ta‘oto i lona moega. Leiloa pe na iai ni papala i lona tino i le 8 tausaga, ona e lē mafai ona gaoioi ia lava, ma sa ia tele ona faalagolago i soo se tagata i lona siomaga seia oo ina asiasi atu Peteru i lona nuu o Litia. Ina ua vaai atu iai Peteru, na ia faatonuina e tū i luga ma ave lona moega. E te tō manatu i se tagata sa lē mafai ona alu ese ma le moega e aunoa ma le fesoasoani mo le 8 tausaga ae tei lava ua tū i luga ma toe fai lona moega. Le au pele e, e mafai e le Atua ona aveeseina ma’i e pei o le emo o le mata. Afai o e ma’i poo seisi o lou aiga, valaau ia te ia i le asō, e na te liliuina lena ma’i ma suia i le soifua maloloina lelei. Ou te tatalo e oo atu le mana o le Atua ma faaumatia soo se ma’i o loo iai i totonu o lou tino ma avatu ia te oe le soifua maloloina lelei mai le Atua, i le suafa o Iesu. TataloTamā, faamolemole ia liliuina soo se ma’i ua leai se togafiti o loo iai i lou tino e aofia ai ma lo’u aiga, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 20 APERILA 2026(tusia e Pastor EA Adeboye) Manatu Autu: Liliuina o le leai o se faamoemoe (Reversing hopelessness)Tauloto Tusi Paia: Salamo 3:3 “A o oe, le ALI‘I e, ‘ua fai oe mo‘u talitā; o lo‘u mamalu fo‘i ma lē fa‘aeaina lo‘u ulu.” Faitauga - Tusi Paia: Ioane 5:2-9I le faitauga mai le Tusi Paia o le asō, o se tagata e 38 tausaga o puapuaga i le ma’i,  na fetaiai ma Iesu. A fua i lana tali i le fesili a Iesu, o loo atagia ai ua matuā leai se faamoemoe, peitai na liliuina lona tulaga ua leai se faamoemoe, ina ua faatonuina o ia e ave lona moega ma savali. I le taimi lava lena, o le 38 tausaga o le ma’i, ua mou ese. Ou te tatalo mo oe i le asō, ia faia e le Atua malosi o Lē mafai ona ia liliuina le leai o se faamoemoe, e asiasi atu ia te oe, ona e maua lea o se vavega, i le suafa o Iesu. A finagalo le Atua e liua se tagata ua tuuesea e le lalolagi, ae tuu iai se tautinoga ola, e na te saunia se avanoa e feiloai ai o ia ma lea tagata. O le a ia saunia avanoa e iloa uma ai e tagata i lona siomaga o loo galue atu le Atua i lea tagata. I ni tausaga se tele talu ai, sa ou malaga atu i se nuu i Saute i Sisifo i Nigeria. I le ala, na ou vaai ai i se taavale e foliga o pē i le auala. Ina ua latalata atu iai, na ou iloa atu o loo iai le faailoga o le RCCG i le taavale ma se sui o le Ekalesia ou te masani ai, o loo tūtū mai autafa. Ou te vaai atu e tō. Na tū le taavale ma ou fesili atu, ‘o le a le mea ua tupu i lau taavale?’. Na vave ona ia iloa mai o a’u, ma ua ofo ma faapea mai, ‘Tamā, o oe moi lea ou te vaai atu iai? Oi le Atua e!’. Na ou toe fesili atu, ‘e iai se mea o tupu i lau taavale?’ Na tali mai, ‘Tamā aua e te popole i le taavale. E iai lo’u faafitauli e sili atu’ i lo le taavale. Ona ia faamatala mai lea ia te a’u, o le pepe i lona manava, ua 6 aso talu ona lē toe gaoioi ma ua fai mai fomai e tatau ona aveese i fafo le pepe’. Ina ua ou faalogo iai, na ou faapea atu, ‘ou te folafola atu, pepe, toe foi i le ola, i le suafa o Iesu’. Na vave ona toe gaoioi le pepe. I ni nai tausaga talu ai,  ao ou asiasi i se tasi o lala o le Ekalesia i Europa, o le pepe lea na fai mai fomai e tatau ona aveese mai le manava o lona tinā, o loo tāina atigipalau. Le au pele e, ou te manao e te iloa, e leai ma se mea e faigata i le Atua (Luka 1:37). Afai o loo e iai i le ogatotonu o se tulaga e foliga mai ua leai se faamoemoe, ou te manao e tuu lou faatuatua i Lē na te faia vaitafe i le toafa ( Isaia 43:19). E mafai ona ia aumaia oe mai le tulaga o le leai o se faamoemoe ae avatu ia te oe le manumalo i se tulaga sa tatau ona e toilalo ai, i le suafa o Iesu. TataloTamā, faamolemole liliu soo se tulaga ua leai se faamoemoe i se tulaga lelei, i lo’u olaga, i le suafa o Iesu, amene. 

OPEN HEAVENSMATALA LE LAGI MO LE ASO SA 19 APERILA 2026(tusia e Pastor EA Adeboye) Manatu Autu: Liliuina Le Toilalo (Reversing Failure)Tauloto Tusi Paia: Salamo 30:11 “Ua e liua lo‘u tagitu‘i i le siva; ‘ua e tala‘eseina lo‘u ‘ie talatala, ‘ae fusia a‘u i le fiafia;” Faitauga - Tusi Paia: Luka 5:1-10I le faitauga mai le Tusi Paia o le asō o lo o tā’ua ai sa fagota Peteru i le po atoa ae leai se i’a na maua. E ui sa galue i le po atoa, sa leai se mea na ia maua e tusa ma lona tautigā. Peita’i na liliu e le Atua lona toilalo i se manuia vave e ala, i lona tapenaina o sana feiloaiga ma le Atua. Ina ua uma ona fa’aafio e Peteru Iesu i totonu o lona vaa, o iina na ia maua ai le tele nauā o i’a na masae ai ma lona upega. Ona ua lē mafaia e Peteru ona ave na o ia le tele nauā o le mau o lona faiva, na ia fai atu i isi ‘au faifaiva e fesoasoani atu ia te ia. I le taimi lava lea na aveesea ai lona toilalo ma ua ia faasaga ma vaaia se suiga maoa’e tele.A o soifua si o’u tina, sa masani ona tai lua vaiaso ma o’u malaga e asi i Ilesha o se nuu e lata i lo’u nuu I Nigeria sisifo. I se tasi o a’u asiasiga, a o sauni e fai le meaai ae avatu i totonu o le fale se tamaloa. I la’u uluai vaai atu iai, e faapea a’u e leaga lona mafaufau, pe a fua I la’u vaai i ona foliga. Peita’i na o’u faalogo e maualuga lona a’oa’oina ma sa tele lona tamāoaiga, a’o le’i fa’ataugāina e le tiapolo i se ala uiga ese. Sa ia te ia se faafitauli e leai se fomai i luga o le fogaeleele e mafaia ona togafiti. Na faamatala mai le tamaloa ia te a’u, e i ai vaitaimi tausisia e masani ona omai ai mai totonu o lona tino ituaiga manu nini’i eseese ma ua ia fa’aaluina mea uma na ia te ia i le sailiga o se fofō i lenei faafitauli ma agaga leaga. Ua faatau uma fo’i ona lavalava ae ofu i ieie. Faafetai sa i ai le alofa mutimutivale o le Atua ia te ia ma tapena ai se avanoa e feiloai ai ma le Atua. Ina ua faamatala mai e le tamaloa lenei ia te a’u le mea na tupu sa o’u fesili i ai, “E te mana’o e ofo lou ola iā Iesu Keriso?” Sa ou faamalamalama i ai, o le taua o loo tau ai ua na o le Atua na te mafaia ona fesoasoani iā te ia, ma manumalō ai. Na ofo lona ola ia Iesu Keriso ona ma tatalo lea i se tatalo faigofie, ona alu lea.Ina ua uma le lua vaiaso sa ou toe malaga i Ilesha e asi lo’u tina e pei ona masani ai. I le taimi fo’i ua o’u saofa’i i lalo ou te ai, ae savali mai i totonu o le potu se tagata aulelei, lavalava lelei. Ina ua vaai mai le tagata ou te lē o maitauina ia na faapea mai, “E foliga mai ua e le maitauina a’u,” sa o’u tali, “Ailoga na ta fetaui muamua.” Ona tali mai lea, “o a’u lea na e tatalo ai i le lua vaiaso talu ai. Vaai I le mea ua faia e le Atua i lo’u olaga i le na o le lua vaiaso!”Le au pele e, ou te tatalo mo oe, o so’o se taamilosaga o le toilalo i lou olaga, o le a aveesea tumau ma o le a amata ona e fiafia i taamilosaga o manuia ma vavega i le suafa o Iesu, Amene.

OPEN HEAVENSMATALA LE LAGI MO LE ASO TOONAI 18 APERILA 2026(tusia e Pastor EA Adeboye) Manatu Autu: Liliuina O Saisaitiaga (Reversing Bondage)Tauloto Tusi Paia: Luka 4:18 “Ua i o‘u luga le Agaga o le Ali‘i, auā ‘ua nā fa‘au‘u mai ‘iā te a‘u e folafola le tala lelei i ē matitiva. ‘Ua ‘auina mai a‘u e ia e fa‘amālōlō i ē loto momomo, e tala‘i le sa‘olotoga i le tāfeaga, ma ‘ia pupula mata o ē tauaso, e tu‘u sa‘oloto i ē ‘ua fa‘asauāina,” Faitauga - Tusi Paia: Luka 13:10-16 So’o se taimi e finagalo ai le Atua e liliu mea e lē mafai ona toe suia, e ui lava i faiga faatulagaina, e masani ona amata i se tofiga e mai ia te ia. O le uiga o lea fa’aupuga o le a Ia fa’atulagaina faalelagi tagata e feiloai ma mafuta.Sa i ai se alii e limasefulu tausaga le matua sa leai sana avā ona e le mafai ona tautala i se teine faapea, “Ta te faaipoipo?” Na matua’i saisaitia mau e le tiapolo lea alii ia aua ne’i mafai ona tatala lona fofoga e tautala i so’ose tamaita’i na mana’o ai lona loto, e ui o se alii sa maualuga le a’oa’oina. Sa iloa lelei e le uso e i ai lona faafitauli, peita’i sa ia le iloaina pe faafefea ona maua sona sa’olotoga. O le tulaga na lelei mo ia, na faatonuina i matou e le Atua e fai se polokalame i le nuu o le alii lenei. A o faia le sauniga na talia e le alii le faaolataga ma ofo atu lona ola iā Iesu Keriso. E lē gata ina faaolaina e Iesu lona agaga ae na Ia fa’aumatia le olaga pologa sa i ai, ma i le ono masina mulimuli ane, na fai ai lona toalua (lana avā). E iva masina talu ona faaipoipo ae fanau lona toalua o se masaga. I le lua tausaga mulimuli ane na fanau ai e lona toalua se isi fo’i masaga. O le talaaga o le tamaloa lenei o le faamaoniga e leai se saisaitiaga malosi mata’utia e faigata i le Atua ona talepe. Ou te tatalo mo oe i le asō, so’o se avega o faalavelave ia te oe ia faaumatia i le suafa o Iesu.I le faitauga mai le Tusi Paia o le asō, na afio Iesu I le sunako e pei o lana masani ai, peita’i o lea aso na la fetaui ai ma se fafine sa faapologaina e le tiapolo mo le sefulu ma le valu tausaga. Sa fa’ano’uno’u lava ia ma sa lē mafai ona tu sa’o i luga. Mo le sefuluvalu tausaga sa fa’avaivaia o ia i vaega uma o lona olaga. E ui i saisaitiaga matuiā sa aafia ai le fafine, na fetaia’i o ia ma Iesu i le sunako ma fa’asa’olotoina ai o ia. O le amo o le pologa sa saisaitia ai i le tele o tausaga ua faaumatia, ma ua saoloto e faaeaea lona ulu ma sisi’i ona lima e vivi’i atu i le Alii.Fai mai Isaia 10:27 “O lea aso fo‘i e ‘ave‘eseina ai lana avega i lou fuatāua ma lona amo fo‘i i lou ua; e gausia fo‘i le amo ‘ona o lē fa‘au‘uina.”O lea la, ou te folafola i le suafa e sili i suafa uma lava, poo le a lava se avega o taofiofia oe mai le si’i a’e o lou ulu ma ou lima e vivi’i i le Atua, ua faaumatia i le asō. O le Atua mata’utia o le a Ia galueaina oe ia maua se lua feiloaiga faalelagi e fa’asa’olotoina atoatoa ai oe mai so’o se mea e ono faapologaina oe ma faalavelave ia te oe i le suafa o Iesu.TataloTamā faamolemole ia ou maua se mafutaga ma oe e gausia ai so’ose ituaiga saisaitiaga e ono tupu i lo’u olaga i le suafa o Iesu, Amene.

OPEN HEAVENSMATALA LE LAGI MO LE ASO FARAILE 17 Aperila 2026(tusia e Pastor EA Adeboye) Manatu Autu: Liliuina o le Lē Fanau (Reversing Barrenness) Tauloto Tusi Paia: Salamo 113:9 “O ia e ‘avea ai le fafine pā,‘ia nofo o ia ma le ‘oli‘oli, o le tinā o tama” Faitauga - Tusi Paia: 2 Tupu 4:8-17 I tausaga ua mavae, sa iai se tina sa faatali I le Atua mo se fanau, ma sa ia tuu alu I le faifeau e tatalo mo ia. I se taimi mulimuli ane sa fai atu ia te ia le faifeau “E toatele tagata na ou tatalo mo ni fanau ma maua, ao o oe e ese, ma ou te leiloa pe aisea” Sa faailoa atu loa e lenei tina, o ia sa taumafai e faapaū lana to muamua, ma sa iai se mea na sese I le faatinoga o le taotoga, ma aveesea ai lona toala fanau. Sa faateia le faifeau ma faapea atu “Lona uiga o lenei taimi atoa ua leai sou toala fanau, ae o loo e fai mai lava ou te tatalo mo sau tama” Ua amata loa ona alofia e le faifeau le tina lenei. Ua iloa foi e le tina le gaioiga a le faifeau ma ua amata loa ona faasaga I le Atua. Sa ia faapea atu “ou te lē toe alu I le faifeau ae ua ou sau ia te oe o lē na faia a’u.” Mulimuli ane sa fai lana miti I le po. Fai mai sa ia tulai le lavalavā I se nofoaga ae sau se tamaloa tino tele ma se ie fulufulu manu I ona lima ma ia taai faataamilo I lona manava ma toe mou ese. O iina na muta ai le avanoa o le lē fanau. O le taimi mulimuli na ou faalogo ai I lenei tina, fai mai ua toalima le fanau. E mafai e le Atua ona suia mea e le mafai ona suia. Fai mai le Kenese 21:1-2, na suia e le Atua le oti o tino o Aperaamo ma Sara ma foai iai tamaiti e ui sa tele tausaga e lei maua se fanau. I le 1 Samuelu 1:4-20, na manatua e le Atua Hana ma ia tatala lona toala fanau. I le faitauga o le Tusi Paia o le asō, o le fafine Sunema na ia vaaia Elisaia o malaga ane ma ia faatauanau ia te ia e afe ane I lona fale e taumafa. Sa ia fafaga ia te ia I le tele o ana malaga ma fausia se potu laititi I lona fale e malolo ai pe a malaga mai. Ina ua finagalo le Atua e asiasi ia te ia, sa ta’u atu e Elisaia I lenei tina o le a maua sana tama. Peitai ua ia fai ia Elisaia e aua le faaole’ole ia te ia, o se faailoga o le lē talitonu, ae o le Atua Silisili ese na ia aveesea lona masalosalo ma foai ia te ia se tama tama ona o lana auaunaga. Le au pelē o e faamoemoe mo se vavega I se tamaititi poo se manuia I se vaega o lou olaga? Faa’auau ona auauna I le Atua ma faamamaluina o Ia. Taofi mau I lana afioga e te le faanoanoa ai. Ou te tatalo ina ia liliuina e le Alii le tulaga lē fanau I lou olaga ae ia e manuia I vaega uma o lou ola I le suafa o Iesu. Amene

OPEN HEAVENSMATALA LE LAGI MO LE ASO TOFI 16 APERILA 2026(tusia e Pastor EA Adeboye) Manatu Autu: Liliuina o le faafanoga (Reversing curses).Tauloto Tusi Paia: Kalatia 3:13 “Na fa‘atauina mai i tatou e Keriso a‘i le fa‘afanoga o le tulafono, ‘ina ‘ua fa‘afanoina o ia mo i tatou, auā ‘ua tusia, “E fa‘afanoina i latou uma o ē na fa‘atautauina i le la‘au.” Faitauga - Tusi Paia: 2 Tupu 2:19-22I le faitauga mai le Tusi Paia o le asō, na o atu alii o Ieriko ia Elisaia ma faafitauli o lo latou nuu. E tele faafitauli o le nuu ona ua tuu i lalo o se fetuu a Iosua (Iosua 6:26), ua leva ona maliu. I le maea ai o le maliu o Iosua, na faaauau pea le malosi o le fetuu seia oo i le taimi o Elisaia, ua oo atu ma faia iai se galuega e amata mai le a’a. Tusa poo le a le malosi o se fetu’u poo le faafanoga, e iai le mana i le Atua e liliuina ai ma suia ia avea ma faamanuiaga. I le Kenese 49:5-7, i lana mavaega, na fetuu e Iakopo Simeona ma Levi. Na ia faapea atu o le a faataapeapeina i latou i totonu o Isaraelu. Peitai i le  Numera 3:11-13, na fetalai le Atua Malosi ia Mose, “O a‘u fo‘i, fa‘auta, ‘ua ‘ou ‘avea sa Levī a‘i le fānauga a Isaraelu e fai ma sui o ulumatua uma lava”. O le Atua i lona Silisili Ese ma le pule aoao, na ia liliuina le fetuu a Iakopo i luga o Levi ma suia i le faaeaina. A iai se fetuu i se tagata, e amata ona iai o ia i faigata, puapuaga, tigā, ma’i, mativa ma isi. E galue saoloto le tiapolo i le olaga o se tagata o loo i lalo o se fetuu. O le mafuaaga lea a e vaai atu o loo galue se fetuu i lou olaga poo lou aiga, aua e te nofonofo filemu. Ae ole atu i le Alii ona e faatuatua lea i lona mana e faasaoloto ia te oe ma le atoatoa. E naunau o ia e faasaoloto ia te oe mai soo se mea e taofia oe mai le maua atoatoa o ana fuafuaga ma faamoemoega mo lou olaga. Ua faasaolotoina oe e Iesu mai le fetuu poo le faafanoga o le tulafono, e pei o le tauloto mai le Tusi Paia o le asō. E mafai ona ia pulea ma liliuina soo se fetuu ua tuu ia te oe ese tagata ma liliuina fetuu tuufaasolo mai augatupulaga, ma suia o ni faamanuiaga e tuufaasolo i lou augatupulaga. I le 1 Nofoaiga Tupu 4:9-10, fai mai le Tusi Paia o Iapesa o se tagata faatuatuaina. Peitai ona o upu fetuu ua folafola e lona tinā ia te ia, ua faaigoaina o se tagata e faatupuina le faanoanoa. O upu a lona tinā ua tuuina ni tapulaa e taofia le alu i luma ma na i’u lava ina tagi ma ole atu i le Alii e faapea “E, fia manuia a‘u ‘iā te oe ma fa‘alauteleina lo‘u lau‘ele‘ele, ia ‘iā te a‘u fo‘i lou ‘a‘ao ma ‘ia e leoleo mai ‘iā te a‘u a‘i le leaga, ‘ina ne‘i tigāina a‘u.” Na talia e le Atua lana olega ma liliuina le fetuu na i ona luga. Le au pele e, afai o loo e i lalo o soo se fetuu tuu faasolo mai augatupulaga o lou aiga, poo se fetuu mai ou matua e pei o Iapesa, ou te manao e te tagi ma ole atu i le Atua i le asō, ua na o ia e mafai ona liliuina mea e le mafai ona liliuina. Tamoe ia te ia i le asō, ona e maua lea o le faasaolotoga atoatoa. E mafai e le Atua ona liliuina soo se fetuu poo le faafanoga, e ono iai i lou olaga ma suia i ana faamanuiaga sautualasi ma le faulai, i le suafa o Iesu, Amene. 

OPEN HEAVENSMATALA LE LAGI MO LE ASO LULU 15 APERILA 2026(tusia e Pastor EA Adeboye) Manatu Autu: Liliuina o le oti (Reversing death).Tauloto Tusi Paia: Eperu 2:14 “O lenei, ‘ina ‘ua i ai i le fānau le tino tagata ola, na fa‘apea fo‘i ‘ona ‘ua i ai ‘iā te ia, ‘ina ‘ia fa‘aumatia e ia i lona maliu o lē ‘ua i ai le mālō e oti ai, o le tiapolo lea,” Faitauga - Tusi Paia: Luka 7:11-17O ananafi na ou talanoa atu e mafai e le Atua ona taofia pe liliuina tulafono o natura o mea ina ia faia ni vavega. E mafai e le Atua malosi i nisi taimi ona pulea nisi o tulafono i isi tulafono e malosi atu. Mo se faataitaiga, i le faamasinoga maualalo, e mafai ona faamaonia se solitulafono a se tagata, peitai e mafai e lenā tagata ona talosaga i le faamasinoga e maualuga atu, ma e mafai e le faamasinoga maualuga atu ona fai se faaiuga o loo sese le faaiuga a le faamasinoga maualalo ma liliuina le faaiuga. O le Atua o Lē pule aoao i le lagi ma le lalolagi, ma e mafai ona ia pulea soo se tulafono o natura o mea, e oo i le tulafono o le oti. Fai mai i le Ioane 11:43-44, “Ua ia fetalai atu ia ‘upu, ‘ona ‘alaga lea o ia ‘ua leo tele, “Lasalo e, ‘inā sau ia i fafo.” ‘Ona alu ai lea i fafo o lē na oti, ‘ua fusifusia ona vae ma ona lima i ‘ie na tanuma‘i, ‘ua fusi fo‘i ona mata i le solosolo. ‘Ona fetalai atu lea o Iesu ‘iā te i latou, “Tatala ia ‘iā te ia, ‘inā tu‘u atu ia e alu.”I fuaitau ia, na tanumia Lasalo mo le 4 aso, ma e tusa ma le tulafono o le oti, e tatau ona amata ona pala ma manogi (tulou). Peitai, na faaaoga e Iesu se tulafono e maualuga atu, o le tulafono o le toetu ma le ola, e faaleaogaina le tulafono o le oti, i lona fapea atu, ‘Lasalo ina sau ia i fafo’. Ina ua maea le faatonuga, o le tagata na oti mo le fa aso ua toe ola mai. O le Atua matautia e mafai ona ia liliuina le malosi ma le aafiaga o le oti. A maliu se tagata ma ua amata ona pala lona tino (tulou) e uliuli lona toto ma e amata ona pala atu i le pa’u o le tino. O le toe faatuina mai o Lasalo mai le oti, o lona uiga o lona tino ua amata ona pala ma le toto ua uliuli sa toe faafoisia i lona tulaga e ola ai. O le tulafono o le toetu ma le ola na faaleaogaina le tulafono o le oti. Ou te tatalo ia avea le tulafono o le toetu ma le ola e faaleaogaina ma pulea soo se vaega ua amata ona oo atu iai le oti i lou olaga, i lou aiga ma lau pisinisi, i le suafa o Iesu. I le faitauga mai le Tusi Paia o le asō, o se fafine ua oti lana tane, ua oo foi le oti i lana tama. Sa muai oti lona toalua, ae o lea ua taoto mai le tino oti o lana tama e toatasi ma ua sauni e tanu. Na matua ootia lona faanoanoa peitai ina ua oo atu le toetu ma le ola, na ia liliuina le faanoanoa i le olioli. E leiloa pe sa matuā misi alofa iai le nuu atoa ona o maliu sosoo na feagai ma ia, peitai na avea ma tagata tautaua ona o lana vavega. Le au pele e, ou te tatalo mo oe i le asō ia liua e lo’u Tamā se vaega ua oti ua matua aafia ai lou olaga, ia liua e avea ma tulaga e te fiafia ai, i le suafa o Iesu. E faaleaogaina le malosi o le oti pe a oo atu iai le malosi o le toetu ma le ola, i le suafa o Iesu, Amene. 

OPEN HEAVENSMATALA LE LAGI MO LE ASO LUA 14 APERILA 2026(tusia e Pastor EA Adeboye) Manatu Autu: Liliuina o tulafono (Reversing laws).Tauloto Tusi Paia: Salamo 118:1 “Vivi‘i atu ia ‘outou i le ALI‘I auā e lelei o ia auā e fa‘avavau lava lona alofa.” Faitauga - Tusi Paia: Mataio 14:22-32 Na faia e le Atua tulafono e pulea ai le natura o mea ma le vanimonimo. Peitai, o nei tulafono e pei o mea uma na ia faia, na faia mo lona finagalo ( Faaaliga 4:11). O soo se mea e finagalo ai, e mafai ona ia taofia le tulafono pe liliuina foi ina ia faia se vavega. I le faitauga mai le Tusi Paia o le asō, na tauanau e Iesu lona au soo e o i le vaa ma malaga i le isi itu o le vai ao alu atu i le tumutumu o le mauga e tatalo ai. E oo ane i le taimi na afio mai ai i lalo o le mauga, ua oo atu le vaa i le ogatotonu o le sami. Ona finagalo lea o Iesu e taofia le tulafono e fuafuaina le pauū o mea ae savali i luga o le vai ia oo atu i lona au soo. E na te lei aveesea le tulafono, ae na ia taofia mo sina taimi. I le 2 Tupu 6:1-7, sa ta i lalo laau e atalii o perofeta i tafatafa o le vaitafe i Ioritana, ona paū lea o le ulu o se to’i (tulou) na faaaogaina e se tasi o i latou i totonu o le vaitafe ma ua magoto i lalo. Na vave ona tagi atu lenei tamaloa ia Elisaia ma fai atu sa faanoi mai le ulu toi mai seisi tagata. Ona tago lea o Elisaia ma ta se fasi laau ae togi i totonu o le vaitafe. O le fasilaau sa tatau ona opeopea, ua goto ao le ulutoi uamea e tatau ona magoto, ua opeopea. Na liliuina e le Atua malosi le tulafono e opeaopea ai mea ina ia faia se vavega. E faapena foi i le Ioane 6:1-14, na liliuina e Iesu le tulafono o natura o mea e faaitiitia ai mea pe afai e faaaogaina, ina ua finagalo e faia se vavega. Ina ua ia tuuina atu areto e lima ma i’a e lua e tufatufaina atu i le motu o tagata, a fua i le natura o mea, e tatau ona faaitiitia ao tufaina atu. Peitai, auā ua maea ona ia tuuina atu ma le faafetai i le Tamā, na faateleina areto ma i’a a’o tufaina atu i tagata. Le au pele e, o le faafetai o se aupega matautia e faia ai e le Atua gaoioiga e taofia tulafono o le natura o mea, pe liliuina foi mo oe, ao faatulagaina oe mo le faateleina sautualasi. Ina ua avatu le faafetai e Iesu i le Ioane 6:11, o le tulafono e faateleina ua pulea le tulafono e faaitiitia. Ao faaumatia i latou e tomumumu ma muimui ona o le muimui (1 Korinito 10:10), e te maua le faateleina ma le faaeaina pe afai e te faia i taimi uma le faafetai (Ieremia 30:19). Afai e te naunau e taofia e le Atua pe liliuina se tulafono ona o oe, ou te faamalosiau ia te oe ia e manatua mea uma ua ia faia mo mo oe ma e faafetai ia te ia ma le olioli. Ou te tatalo ia auina mai e le Alii fesoasoani ia te oe mai lugā ma liliuina soo se tulafono o loo galue e faasagatau i lona finagalo mo lou olaga, i le suafa o Iesu. Ia e manatunatu i mea uma ua faia e le Alii ia te oe mai le tele o tausaga, tusi i lalo ma amata ona faafetai ia te ia mo na mea uma, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 13 APERILA 2026(tusia e Pastor EA Adeboye) Manatu Autu: Liliuina o avanoa (Reversing opportunities).Tauloto Tusi Paia: Teuteronome 30:3 “ona fa‘aa‘e lea e le ALI‘I lou Atua o lau tāfeaga, ma alofa atu ‘iā te oe, ma toe fa‘apotopoto mai ‘iā te oe a‘i nu‘u uma ‘ua fa‘ata‘ape‘apeina ai oe e le ALI‘I lou Atua.” Faitauga - Tusi Paia: Ioane 21:15-19E masani ona faapea o avanoa ua misia ma leiloa e lē toe maua. Peitai, e mafai ona moni lea tulaga pe afai e filemu ma leai se mea e faia iai e le Atua. O le taimi e iai le Atua i lea tulaga, o avanoa leiloa uma e mafai ona toe maua. I tausaga o le 1960, sa ou taitai i vaega o taaloga i la matou kolisi maualuluga. Na maua se valaaulia a la matou aoga i taaloga i seisi aoga. I taimi o ia taaloga na ou talanoa ma masani ai i le taitai o taaloga mai leisi aoga i le nuu o Akure. I tausaga mulimuli ane, na talia au i le Iunivesite i Nigeria mo le faailoga o le Masters ona ou tusi talosaga lea i sikolasipi a le malo mo se fesoasoani i pili aoga. Ua mavae le tausaga ae leai se tali mai o le Matagaluega o aoga, ma ua ou manatu, ua lē maua se sikolasipi ma ua amata ona ou totogiina lo’u pili aoga. E iai se aso ao ou savalivali i le malae a le Iunivesite, na ou fetaui ai ma le taitai o vaega o taaloga mai le nuu o Akure lea na ma fetaui i tausaga ua mavae. Fai mai ia te au o loo faigaluega i le Matagaluega o Aoga. Ona ou fai atu lea iai, ‘na avatu lau tusi talosaga mo se sikolasipi i le tou matagaluega, ae ou te lei maua lava se tali’. Ona fai mai lea na te manatua lau tusi talosaga aua na o au na talosaga atu mo se faailoga maualuga i le matematika. Na fai mai sa autasi le faaiuga e aumai le sikolasipi ia te a’u ma na o le faatalatalanoaga le vaega mulimuli e manaomia. E faapuupuu atu le faamatalaga i lea mataupu, fai mai o le a alu atu ma vaai poo fea ua oo iai la’u mataupu. E lua vaiaso mulimuli ane, ae maua lau tusi mai le Matagaluega o aoga e logo mai, e maua lau sikolasipi ma e amata mai i le amataga o le aoga i le tausaga ua tuanai. Ou te folafola atu, o soo se avanoa lelei ua e manatu ua e misia ma ua leiloa, e toe faafoisia e le Atua malosi, i le suafa o Iesu. I le Mataio 26:69-75, na maua le avanoa o Peteru e tulai ai mo Keriso, peitai na ia misia ina ua faafiti faatolu i le Alii. Na matua ootia lona loto na manatu ai o le a toe foi i le faifaiva ( Ioane 21:3). Peitai, na afio atu Iesu ma avatu ia te ia seisi avanoa, e pei ona tatou iloa i le faitauga mai le Tusi Paia o le asō. Ina ua maea ona afio atu Iesu ia te ia, o le tagata na faafiti faatolu ia Iesu, na ia fesagai ma taitai o le malo ma le loto toa, i latou na faasatauroina le Alii ma faailoa atu, e lē toe taofia lona talai atu o le talalelei ia Iesu (Galuega 4:8-13). Le au pele e, ua e misia poo ua leiloa nisi o avanoa taua i taimi ua tuanai? Ole atu i le Atua mo lona alofa mutimutivale, e na te toe faafoisia ma fesoasoani ia te oe ina ia e toe maua na avanoa. TataloTamā, faamolemole aumai seisi avanoa ia te a’u ma ia toe faafoisia avanoa lelei uma ua ou misia, i le suafa o Iesu, Amene. 

OPEN HEAVENSMATALA LE LAGI MO LE SA 12 APERILA 2026(tusia e Pastor EA Adeboye) Manatu Autu: Liliuina O Le Taimi (Reversing Time)Tauloto Tusi Paia: Tanielu 2:21 “O ia fo‘i na te liua tausaga ma tau; e ‘ave‘eseina e ia o tupu, e tofia fo‘i e ia o tupu; Pe foa‘iina mai e ia le poto i ē o popoto, ma le malamalama i ē o iloa mafaufau.”Faitauga - Tusi Paia: Iosua 10:1-14O le Atua e pulea Taimi ma fuata poo tau, e pei ona o tatou iloa i le upu tauloto o le asō. E pei ona o’u tā’ua ananafi o Ia o le Alefa ma le Omeka, o le amataga ma le gataaga (Fa’aaliga 1:8). O lona uiga o le Atua e fa’afoeina le tuana’i, taimi nei ma le lumana’i. Afai e finagalo ai o Ia, e mafai ona Ia taofia le taimi e pei ona Ia faia i le tusi faitau o le asō, na Ia taofia ai le goto atu o le La. O le Atua e mata’utia ma e mafai ona Ia liliuina le aafiaga o le taimi i luga o se tagata poo se mea o tupu.I le tele o tausaga ua mavae a’o lata i le atoaga o le onosefulu o o’u tausaga. Sa o’o mai ia te a’u le popole ona ua o’u matua ma e foliga o loo mamao lava a’u mai le fa’amae’aina o le galuega na aumai e le Atua ia te a’u e fai. Sa matua’i fiafia lava la’u fanau auā sa naunau matou te faatasi i le faailogaina o lo’u aso fanau; peita’i sa ou uiō ma tagi atu i le Atua i tatalo. O loo o’u manatua pea le nofoaga sa ou i ai i le tusa o le itula e lua i le taeao (2:00am), i le tatalo, na ou ole atu i le Atua mo se fesoasoani. Sa ou ta’u ia te Ia o loo tele galuega e manaomia ona o’u fai, a ua foliga mai ua pulapula lagoto lo’u ola. Na tali mai le Atua faapea; “Atali’i, o a’u e pule i le taimi e goto ai le la. O upu na, na matua’i aumaia le filemu atoatoa i lo’u loto. A o e faitau i lenei fa’amalosi’au, ou te tatalo ia fa’aalia e le Alii lona lava mata’utia i lou olaga.I le Isaia 38:1-8; na ta’u atu e le perofeta o Isaia ia Esekia le tupu o le a faamalolō e le Atua lona ma’i ma faaopoopo tausaga e sefululima e ola ai i luga o le fogaeleele. Na ta’u atu fo’i e le perofeta o le a avatu e le Atua ia te ia se faailoga e faamaonia ai lana upu e pei ona tusia i le Isaia 38:8 “Fa‘auta, ‘ou te fa‘afo‘i atu le ata i vaega na uma ‘ona alu ifo i le mea a Aasa e vaevae ai itūlā, ‘ia fo‘i atu i vaega e sefulu.” ‘Ona fo‘i atu ai lea o le lā i vaega e sefulu, o vaega lava ia ‘ua uma ‘ona alu ifo ai.”Le au pele e, e mafaia e le Atua ona aumai se tulaga mai lou tuana’i i lou taimi nei. Na te mafaia ona aumai se avanoa ua e manatu ua e misia e faavavau ma fa’afo’i mai ia te oe. I le Kenese 18:9-14; ina ua fai atu le Atua ia Aperaamo, “Ta’u atu i lau avā o le a ia fanaua se tama.” Na ataata Sara auā i le soifuaga o le tagata e le mafai e se fafine i lona matua ona fanaua se tamaititi. Peita’i na a’oa’i e le Atua Sara ma faailoa ia te ia na te mafaia ona toe faafoisia i le tagata se tulaga e foliga ua leiloa e faavavau. Ou te tatalo mo oe i le asō ia liliuina e le Atua le taimi mo oe ma avanoa lelei uma e foliga ua e misia e lē toe maua e faavavau, o le a faafoisia mo oe i le suafa o Iesu.TataloTamā, faamolemole ia liliuina le taimi mo a’u mantoe faafoisia avanoa lelei uma ua misia ma leiloa, i le suafa o Iesu, Amene. 

OPEN HEAVENSMATALA LE LAGI MO LE TOONAI 11 APERILA 2026(tusia e Pastor EA Adeboye) Manatu Autu: Liliuina o mea e lē mafai ona liliuina (Reversing the irreversible)Tauloto Tusi Paia: Salamo 46:1  “O le Atua, o lo tatou malu ia ma lo tatou malosi; e fai o ia ma fesoasoani silisili i puapuagā.”Faitauga - Tusi Paia: Esekielu 37:1-10E tele itu ma suafa o le Atua. E iloa o ia o le Atua e ou le malosi uma lava (Kenese 7:1), o lona uiga e ia te ia le malosi ma le mana ma e mafai ona ia faia mea uma. I le Ieremia 32:27 e taua o ia o le ALI‘I, o le Atua o tagata uma; e leai se mea e tasi e faigatā ia te ia. I le Isaia 40:28, o loo taua ai o ia o le Atua o le vavau, o le ALI‘I o lē na faia tulu‘iga o le lalolagi. I le Salamo 115:3, fai mai o lo tatou Atua, o i le lagi, e faia e ia o mea uma ‘ua ia finagalo i ai. I le Faaaliga 1:8, o ia o le Alefa ma le Omeka, o le amataga ma le gataaga, o loo soifua, na soifua foi ma o le a afio mai, e ona le malosi uma lava. O lona uiga, o loo ia te ia le tuanai, taimi nei ma le lumanai e tuufaatasi. O ia e ona le malosi uma lava e liliuina mea e le mafai ona liliuina. E iai se tagata na iai se faafitauli i ona fatugao ma e faitau selau afe tupe na alu e faamama ai lona toto i masini. I faafitauli faapea i fatugao, e pau le fofo e aumai e fomai o le sue o se fatu gao o seisi tagata e fetaui lelei e foai mo ia. E oo foi i tulaga faapea, e le mautinoa pe manuia i le maea ai o taotoga. Sa iai lenei tagata i le faapotopotoga i se tasi o matou sauniga ona faapea mai lea o le Alii, ‘talia lou faamalologa’. Na malolo i le taimi lava lena. E faapea vavega e mafai e le Atua e ona le malosi ona faia, e mafai ona ia suia soo se mea e foliga mai ua leai se faamoemoe. Ou te leiloa pe iai se fualaau e mafai ona suia le ituaiga toto o le tagata ae ua ou faalogo i le tele o tautinoga ua faia ai e le Atua malosi mo ni tagata. E na o ia e mafai ona liliuina mea e le mafai ona liliuina. E pei ona tatou faitau i le faitauga mai le Tusi Paia o le asō, e mafai ona ia toe faaola ivi mamago. E mafai ona ia liliuina soo se tulaga ua leai se faamoemoe ia le solosolo lelei. O le tala i ivi mamago i le faitauga mai le Tusi Paia o le asō e faaalia ai ituaiga tagata e maua vavega faapea. O ivi mamago, sa matua lē mafai ona maua sona fesoasoani, ae ua ou iloa i la’u tamai savaliga ma le Atua, e fiafia o ia e fesoasoani iai latou ua lē maua se fesoasoani. O lo’u Atua o le fesoasoani iai latou ua lē maua se fesoasoani, e taua o ia o le fesoasoani sili i puapuaga ( Salamo 46:1). Le au pele e, afai o e iai i se tulaga ua leai se faamoemoe, liliu i le Atua e pei o Tavita ma faapea atu, “O lo‘u fesoasoani mai i le ALI‘I lea, o lē na faia le lagi ‘atoa ma le lalolagi.”(Salāmo‬ ‭121‬:‭2‬). E afio mai o ia e fesoasoani ia te oe. Ou te tatalo ia liliu e le Atua soo se tulaga i lou olaga ua fai mai tagata ua matua leai se faamoemoe. E maualuga ai lona viiga i lena tulaga ma avatu ia te oe se tautinoga matagofie, i le suafa o Iesu. TataloTamā, faamolemole tulai mai e fesoasoani i mea uma o loo ou manaomia, i le suafa o Iesu, Amene. 

OPEN HEAVENSMATALA LE LAGI MO LE FARAILE 10 APERILA 2026(tusia e Pastor EA Adeboye) Manatu Autu: Tatalo mo le ekalesia (Prayers for the church)Tauloto Tusi Paia: Kolose 4:2  “Ia ‘outou finafinau i le tatalo, ‘ia mataala i lea mea ma le fa‘afetai.”Faitauga - Tusi Paia: Mataio 9:35-38TataloLe Alii e, faafetai mo lau Ekalesia. Faafetai mo le meaalofa o le tino o Keriso ma le faapotopotoga amio Atua o le au kerisiano faatuatua. Tamā, faamolemole ia foai le mana i lau Ekalesia e galue ai o le masima o le lalolagi ina ia maua e soo se tasi e sau i le Ekalesia le suamalie i o latou olaga, i le suafa o Iesu. Le Alii e, faamolemole ia foai le malosi ma le mana i soo se taitai i lau Ekalesia. Foai le poto, loto toa ma le loto finafinau e faia le galuega ma tausi i lau lafu mamoe. Tamā, faamolemole ia faamama i lau Ekalesia. Fesoasoani mai ina ia atagia lou mamalu ma le faapaiaina iai matou i le suafa o Iesu. Tamā, faamolemole ia aveesea soo se ituaiga pogisa ma le amioleaga mai lau Ekalesia i le suafa o Iesu. Tamā, faamolemole ia e foai mai mea uma o loo manaomia e lau Ekalesia. Foai mai mea uma o loo matou manaomia e tusa ma le faulai o le oa o loo ia te oe, ma ia faaaupegaina i matou e faia lau galuega, i le suafa o Iesu. Tamā, faamolemole ia tafe pea lou alofa i totonu o lau Ekalesia. Fesoasoani mai iai matou ia alofa moni le tasi i leisi ma le loto mamā, i le suafa o Iesu. Tamā, faamolemole fesoasoani mai iai latou o loo ola pea i ni olaga e faafoliga i totonu o lau Ekalesia, ia salamo loa. Fesoasoani iai latou ia gauai moni i le Upu a le Atua, i le suafa o Iesu. Tamā, faamolemole ia liaieseina aoaoga sesē, o tū ma aga lē amio Atua o loo faia i totonu o lau Ekalesia. Ia faavae ma ia mautu le faatuatua o ou tagata i lau Upu, i le suafa o Iesu. Tamā, faamolemole ia foai le mana i faifeau faamaoni o le talalelei ia latou laugaina le Upu a le Atua e aunoa ma le fefe. Taitai ese i latou mai tagata amioleaga ma tulafono e taofiofia i latou mai le laugaina o lau Upu ma le loto toa, i le suafa o Iesu. Le Alii e, faamolemole tulai mai ma fesoasoani i lotu eseese o loo sauaina i soo se vaega o le lalolagi. Faamalosi i lo latou faatuatua ma fesoasoani iai latou ia aua lava nei o latou faafiti ia te oe, i le suafa o Iesu. Tamā, faamolemole aua lava nei aveesea lou Agaga Paia mai lau Ekalesia. Faafetai i lou alofa tunoa ua matou maua ai lau faaolataga. Faaaupegaina i matou i le loto toa e talai le talalelei ia Iesu Keriso i o matou aiga, o uo, lo matou nuu ma le atunuu i le suafa o Iesu ua tatalo atu ai, Amene. 

OPEN HEAVENSMATALA LE LAGI MO LE TOFI 9 APERILA 2026(tusia e Pastor EA Adeboye) Manatu Autu: Vavega e tumau (Permanent miracles)Tauloto Tusi Paia: Failauga 3:14 “Ua ‘ou iloa, o mea uma e faia e le Atua e fa‘avavau ia, e lē mafai ‘ona fa‘aopoopo i ai o se mea, e lē mafai fo‘i ‘ona ‘ave ‘ese i ai o se mea; ‘ua faia fo‘i e le Atua ‘ina ‘ia matata‘u tagata i ona luma.”Faitauga - Tusi Paia: Ioane 5:1-14O se tasi o ou atalii faaleagaga e sau mai se aiga mauoloa, na maua i le kanesa o le auvae. Na mafai ona vaai e fomai popoto ma taugata mai Europa, peitai i le maea ai ona latou faia togafitiga mo sina taimi, ona latou fai lea i ona matua e toe ave i Nigeria ona toe lua vaiaso e ola ai. Na matua mafatia matua o lenei tama. Ina ua taunuu mai i Nigeria, na fai le faaiuga a matua e aumai i le matou togalauapiga ma na luluina lou faatuatua ina ua ou vaai atu ia te ia. Na le mafai ona ai se meaai, na fula lona ulu (tulou)ma e toeitiiti atoa le itula e tau inu ma faauma se faguinu. Ina ua ou toe to’a lelei, na ou tatalo mo ia ona faamaloloina lea o ia e le Atua. Na tupu lenei mea i le 43 tausaga talu ai, ma i le viiga o le Atua, o loo soifua pea o ia i le asō, ua fai lona toalua ma lana fanau. Na tuu ia te ia e le Atua se tautinoga o loo talafeagai pea e oo mai i le asō. Ou te tatalo ia avatu e le Atua ia te oe se tautinoga e tumau, i le suafa o Iesu. O se tasi o tulaga matagofie e tupu pe a afio mai le Atua e asiasi i se tagata, e aumai ni tali mautu o faafitauli. O loo tusia i le Mareko 10:46-52 le tala i se tagata tauaso e igoa ia Patimaio. Ina ua ta’u iai e se tagata o le a oo mai Iesu, na ia iloa lelei o le a lē toe aisi. O le mafuaaga lea na ia aveesea ai lona ofu, o le faailoga o le maasiasi, pogisa ma le tauaso. Ou te mautinoa o le taimi na maua ai lana vaai, e lei toe aisi o ia, o lana tautinoga e tumau. E iai tagata na maua a latou vavega peitai na toe aveesea. O nisi ua latou maua se mea e pito sili ona taua mai le Atua ona latou le toe maua lea ona o le faatamala. I le suafa e sili i suafa uma lava, o le tautinoga a le Atua e avatu ia te oe, o le a tumau e faavavau. Le au pele e, e pau le auala e tumau ai au tautinoga ma vavega mai le Atua pe a e sola ese mai le agasala. O le faitauga mai le Tusi Paia o le asō o loo aumai ai se tala i se tagata na ma’i mo le 38 tausaga, na faamalolo e Iesu ma ua matua fiafia. Peitai ina ua toe feiloai ma Iesu, na lapatai iai Iesu e aua le toe agasala aua a ia toe faia le agasala, e sili atu le leaga o le tulaga e toe oo iai. Afai e faasaoloto e le Atua se tagata mai le ala  e faaumatia ai, ae toe foi iai lea tagata, o le a sauaina ma fasia o ia e le tiapolo i lana faitalia. Afai ua e toe foi i le agasala, toe foi nei ia Iesu i le asō ma ole atu ia te ia e faaolaina oe. O le a ia toe faafouina oe i lona alofa tunoa pe afai e te toe foi mai ia te ia ma lou loto atoa. O le auala e tumau ai au vavega e le toe suia pe afai e te lē taalo i le agasala, i le suafa o Iesu, Amene. C

OPEN HEAVENSMATALA LE LAGI MO LE ASO LULU 8 APERILA 2026(tusia e Pastor EA Adeboye) Manatu Autu: Tupu tele le filemu (Multiplied Peace)Tauloto Tusi Paia: Salamo 119:165 “Ua tele le filemū o ē naunau i lau tulafono; e leai fo‘i se mea e tausuai ai i latou.”Faitauga - Tusi Paia: Tanielu 6:25-28I tu ma aga a isi nuu, e masani i tupu ona faafeiloai ona tagata i le faapea atu, ‘ia faateleina le filemu ia te oe’. I le Tanielu 6:25, ao tusi atu le tupu o Tariu i ona tagata ina ua maea ona faasaoina Tanielu mai le lua o leona, na amata lana tusitusiga i upu nei, ‘ia tupu tele so outou manuia’. I le feagaiga fou, o soo se taimi e tusi atu ai Paulo i soo se Ekalesia, e amata lava i le faafeiloai o i latou e faapea, ‘‘Ia ‘iā te ‘outou le alofa tunoa ma le manuia mai le Atua lo tatou Tamā.” (Roma 1:7,1 Korinito 1:3, 2 Korinito 1:2, Kalatia 1:3). E faapena foi i ana tusi, e masani ona ia tusi ma faapea atu, “Ia fa‘ateleina ‘iā te ‘outou le alofa tunoa ma le manuia.” (1 Peteru‬ ‭1‬:‭2‬ ‭ma le 2 Peteru 1:2). O nei faafeiloai e tatou te malamalama ai, e mafai ona faatupuina le filemu ma le manuia, e mafai ona faateleina. Tusa pe e te manatu ua e maua le filemu ma e leai se mea e te popole ai, e tatau ona e tatalo pea ia faatupuina lou filemu. A aumai e le filemu le tele o le malolo, o le faateleina o le filemu e faateleina ai le malolo. I le tele o tausaga talu ai, i lo’u foi mai Peretania ae agai atu i Nigeria, sa iai i le vaalele lea e tasi se tagata o le Atua e taualoa, ma lona toalua. Fai mai lana molimau na ou faalogo iai mulimuli ane, na fai i lona toalua i luga o le vaalele, ona o lō tatou tamā, le taitai aoao o le Ekalesia o Adeboye o loo i totonu o lenei vaalele, e leai ma se mea ta te popole ai. I le afa o le faigamalaga, na fetaui ma ni faigata i le ea ma ua luluina le vaalele. Na tū i luga lenei tagata o le Atua ma tilotilo i le nofoaga sa ou nofo ai i le vaalele ma vaai atu, o loo ou moe gase. Na toe foi i lona nofoa ma fai i lona toalua, e leai ma se mea ta te popole ai, o loo moe lo tā tamā. Fai mai o ia, ina ua vaai atu o ou moe i le na taimi, na faateleina ai lona filemu.  A e maua le faateleina o le manuia ma le filemu mai le Atua i soo se itu, o soo se faafitauli poo le fefe, o le a mamao ma oe. I le Ioane 14:27, na fetalai Iesu, “Ou te tu‘uina atu ‘iā te ‘outou le manuia; o lo‘u manuia ‘ou te avatu ai ‘iā te ‘outou; ‘ou te lē avatu ‘iā te ‘outou fa‘apei ‘ona avatu e le lalolagi. ‘Aua le atuatuvale o ‘outou loto, ‘aua fo‘i tou te matata‘u.” Ou te tatalo o le manuia ma le filemu o le Alii ia faateleina ia te oe i le asō, i le suafa o Iesu. Le au pele e, o le mea lilo i le fiafia i le manuia ma le filemu mai le Atua o loo faaalia i le tauloto mai le Tusi Paia o le asō, o le naunau ma alofa ia te ia ma lana tulafono. A e naunau e faateleina lou manuia ma le filemu, ia e alofa atu i le Alii lou Atua ma lou loto atoa ma lou agaga atoa ma lou manatu atoa (Mataio 22:37) ma usitai i ana poloaiga i taimi uma. TataloTamā, faamolemole ia e faateleina le manuia ma le filemu i soo se vaega o lo’u olaga, i le suafa o Iesu, Amene. 

OPEN HEAVENSMATALA LE LAGI MO LE ASO LUA 7 APERILA 2026(tusia e Pastor EA Adeboye) Manatu Autu: O ē tauave le afi 2 (Fire carriers 2)Tauloto Tusi Paia: Mataio 5:6 “Amu‘ia ē fia ‘a‘ai ma fia inu i le amiotonu; auā e mā‘o‘ona i latou.”Faitauga - Tusi Paia: Esoto 33:7-11O le aso ananafi na ou fai atu ai o le auauna i le Atua ma le loto atoa ma āva i e ua taitai ia te oe, o se auala lea e te tauave ai le afi o le Atua. O le asō, o le a ou talanoa atu i seisi auala e te tauave ai le afi o le Atua, o le tulaga o lou fiaai ma le fiainu mo ia. I le faitauga mai le Tusi Paia o le asō, na talanoa faafesagai Mose ma le Atua i le ao faaniutū i le faitotoa o le faleie o le faapotopotoga, ma sa iai Iosua ma ia. Ina ua maea ona talanoa Mose ma le Atua, ona afio ese lea o le Atua mai le faleie, peitai na nofo ai lava Iosua ona o lona naunau i le fia mafuta i le mamalu o le Atua. Ao fiafia le toatele i le mafanafana o latou faleie, na tumau pea Iosua i luma o le Afi Maamaai, ma ou te mautinoa o loo ia mafuta i le Atua ma saili i ona fofoga. I le Numera 27:18, na faamaonia e le Atua o ia o le tagata e iai le Agaga, ma faatonu Mose e faaee ona lima ia te ia. O Elisaia le isi tagata na maua le afi o le Atua ona o lona fiaai ma le naunau. O le taimi na tuu ai e Elia lona ofu ia te ia, na ia tuua mea uma ae mulimuli i le tagata o le Atua (1 Tupu 19:19-21). Ina ua oo i le taimi e aveesea ai Elia ma ave olaina i le lagi, na ia fai ia Elisaia e ole atu mo soo se mea. E oo atu i lea taimi, ua matua fiaai Elisaia, ia vaai i le sili atu o galuega mamana a le Atua ma sa ia naunau e nate faia galuega e sili atu i lona matai. E lei manatu tele i le oa o le lalolagi,  ae pau le tulaga na fiaai ma naunau iai o le Atua. Ina ua faalogo Elia i le manaoga o lana auauna, na ia tali iai, “O le mea faigatā ‘ua e fai mai ai; ‘āfai ‘e te iloa mai a‘u pe a ‘ave‘eseina a‘u ‘iā te oe, ‘ona fa‘apea lea ‘iā te oe; “ (2 Tupu 2:9-10). O le alu i se malaga umi e oo ai le lelava ma le fia moe i le toatele, ae lei faapena Elisaia. O lona fiaai ma le fiainu na tumau ai le mataala ma iloa mea uma o loo tutupu i lona siomaga. Sa tumau lona loto i le mea o loo naunau iai, ma o lea na ia vaai i le kariota afi ma Elia ao aveolaina i le lagi i le asiosio (2 Tupu 2:11–12). Le au pele e, tusa poo ai e faaee ona lima i ou luga, e le oo mai le afi o le Atua seia vagana ua e fiaai ma fiainu ia e iai i luma o le Atua ma lona mamalu. E ui o se fasi laupapa e mafai ona mumu pe a pai iai le afi, peitai e lē mumū pe afai e lē mago. E na o i latou e fiainu ma fiaai ia i luma o le Atua ma lona mamalu e latou te maua le afi e faia ai mea tetele i lana augatupulaga. TataloTamā, faamolemole faatumu lou loto, manatu ma le agaga i le fiaai ma le fiainu i lou mamalu ma le mana, i le suafa o Iesu, Amene. 

OPEN HEAVENSMATALA LE LAGI MO LE ASO GAFUA 6 APERILA 2026(tusia e Pastor EA Adeboye) Manatu Autu: O ē tauave le afi 1 (Fire carriers 1)Tauloto Tusi Paia: 2 Tupu 3:11 “A ‘ua fai mai Iosefatu, “E lē o ‘i‘inei ‘ea se perofeta a le ALI‘I, tatou te fesili ai i le ALI‘I?” ‘Ona tali atu ai lea o le tasi o ‘au‘auna a le tupu o Isaraelu, ‘ua fa‘apea atu, “O lo‘o ‘i‘inei Elisaia le atali‘i o Safata, na na liligi le vai i lima o Elia.”Faitauga - Tusi Paia: 2 Tupu 2:1-14A tuu se fafie i le afi, e mumū. E faapena le tagata ua tuuina atu lona ola ia Iesu Keriso, e mumū le afi mo Iesu ma o le afi o loo mumū i lea tagata faatuatua o le mana o Agaga Paia. E lua auala e maua ai e se tagata faatuatua le afi, e mai le Atua e pei o Mose ma Elia, pe tauala mai i isi tagata ua iai le afi o le Atua ma e latou te tauave le afi. Mo se faataitaiga, na maua e Iosua le afi mai ia Mose (Teuteronome 34:9), o Elisaia ma maua mai ia Elia (1 Tupu 19:19). O Iosua na taua o le auauna a Mose (Iosua 1:1), ma o soo se mea na alu iai Mose, sa iai Iosua e auauna ia te ia. Ao auauna ma le faamaoni Iosua ia Mose, na faaee lima Mose ia te ia, ma ia maua le agaga o le poto. Afai e te manatu ua e maualuga tele e te lē auauna iai latou ua tuu e le Atua e taitai ia te oe, o lona uiga e lei saunia lou tagata e tauave le afi o le Atua. E lei faigofie le auauna ia Mose, peitai na totogi e Iosua le tau ma le loto malie. I le Esoto24:13-18, fai mai le Tusi Paia, na ō Iosua ma Mose i le Mauaga o Sinai, ma nonofo ai mo le 40 ao ma po. Na auauna ia Mose ma le loto atoa, ma ina ua faaee lima o Mose i luga o Iosua,  na ia tuuina atu ia te ia le mamalu ma le alofa tunoa( Numera 27:18-23). O le mafuaaga lea, atalii ma afaine o le Atua, e tatau ona e ava iai latou ua tuuina e le Atua e taitai ia te oe. O Elisaia o leisi tagata na ia maua le afi o le Atua e ala i le ava ma le auaunaga. Na iloa o ia, o le tagata na ia liligi le vai i lima o Elia (2 Tupu 3:11). E ui e sau mai se aiga e mauoloa, na ia gauai ma faamaualalo e ava ma auauna i le perofeta a le Atua, o Elia. Ao pisi isi atalii o perofeta e suesue ma vavalo i le mea o le a tupu ia Elia (2 Tupu 2:3), sa pisi Elisaia e mulimuli i le tagata o le Atua ma auauna ia te ia. Na iu ina ia maua le faalua o le faauuga sa ia Elia. Le au pele e, afai e te manao e te tauaveina le afi a le Atua, e tatau ona e auauna ia te ia ma lou loto atoa ma gauai e auauna ma ava i tagata faauuina ua ia tofia e taitai ia te oe. Ou te tatalo mo oe i le asō, ia aua lava nei e faamaualuga ua lē mafai ona e ava ma auauna iai latou ua tofia e le Atua e taitai ia te oe. I le suafa e sili i suafa uma lava, e te tauave le afi o le Atua i lou olaga ma e faia mea tetele i lona malo. O le auauna ma le ava i tagata ua tofia e le Atua e taitai ia te oe, o se auala lea e te maua ai lona afi, i le suafa o Iesu, Amene. 

OPEN HEAVENSMATALA LE LAGI MO LE ASO SA 5 APERILA 2026(tusia e Pastor EA Adeboye) Manatu Autu: Tāla’i Le Talalelei 2(Share The Good News 2)Tauloto Tusi Paia: Salamo 40:9 “Ua ‘ou tala‘i le amiotonu i le fa‘apotopotoga tele; fa‘auta, ‘ou te le‘i tāofia lava o‘u laugutu, le ALI‘I e, ‘ua e silafia lava.”Faitauga - Tusi Paia: 2 Tupu 7:3-16Ua ta’u mai e le faitauga mai le Tusi Paia o le asō ia i tatou le ala na laveaiina ai e ni alii lepela se to’afā se nuu atoa mai le tulaga ogaoga o le faaletonu o lona tamāoaiga. Muamua sa i ai se oge tele i Samaria mo se taimi umi, ma sa faasolo ina tulaga leaga mea uma ma faatetele le oge ma le mativa ua amata ona aina e tinā a latou fanau, tulou, (2 Tupu 6;26-29). Ina ua mavae sina taimi ona folafola ai lea e Elisaia le auauna a le Atua le upu a le Atua, o le a suia mea i le lelei i le aso e sosoo ai. E le’i maua le upu faaperofetaga mai le fofoga o le auauna a le Atua e lepela e to’afā sa nonofo i fafo atu o faitoto’a o le aai. Na filifili i latou o le a o latou faia se laasaga lototele ma o atu i le toagālauapiga a le fili. Na taunuu lelei la latou savaliga auā na faia e le Atua se leo ta’alili (na faalogo i ai le fili) e pei o se osofaiga a se ‘autau mata’utia, o agai atu ia i latou ma sosola ai loa mai lo latou tōgalauapi. Ina ua ulufale lepela i le nofoaga sa nonofo ai le fili, na o latou iloa ai ua sosola uma fitafita ae tu’u a latou meaai, vaiinu ma isi uma a latou oloa. Na ofo i latou, na aai ma feinu ma ave uma ario ma auro ma isi oloa tāua. Peita’i ina ua mavae se taimi, na fetautalatala’i lepela nei, ua lē tatau lo latou faaloloto na o i latou. “Ona latou fetautalatala‘i ai lea, “E lē tatau le mea o tatou o faia nei, o le aso manuia lenei aso, a ‘ua tatou fa‘alologo pe ‘āfai tatou te fa‘atali se‘ia malama a‘e le taeao, ‘ona o‘o mai ai lea o le sala ‘iā te i tatou; ‘inā ō mai ia, ‘inā tatou ō e ta‘u atu i le ‘āiga o le tupu.”2 Tupu‬ ‭7‬:‭9‬ ‭Na iloa e lepela o se aso o le manuia lea aso, o lea na mumusu e taofi ia i latou lava le talalelei. Na o, ma latou logo atu i le aiga o le tupu meaai, meainu ma oloa e tele na o latou maua, ma o le ala lea na faataunuuina ai i le aso na soso’o ai le afioga a le Atua faatatau i se vavega e feliuaina le tulaga o le tamāoaiga o le nu’u. Afai o oe o se kerisiano, o lona uiga ua e silafia o le asō o se aso o manuia. Na maliu Iesu ma toetū manumalō e aumai i tatou i se aso fou. Ua talanoa mai le tusi o Ieremia 31:31; ia i tatou fa’atatau i le aso o le a osia ai e le Atua se feagaiga fou ma ona tagata. O aso nei o lea feagaiga fou; o aso o le alofa tunoa o le Atua ma le manumalō i le olaga agasala. Afai e te lē o tala’ia lenei talalelei ma faailoa i nisi le ofoofogia o galuega a le Atua, o lona uiga ua e taofiofia le avanoa mo i latou e fiafia ai i faamanuiaga a le Atua.Le au pele e, ua laveaiina oe e le Atua mai saisaitiaga a satani ma fa’asa’oloto oe mai avega o le agasala. O le tasi lea auala e faaali atu ai lou loto faafetai i le Atua mo le Togiola na ia saunia o le avea o oe ma se tasi e lē malolo i le folafola ma ta’utino i le lelei o le Atua. Aua e te taofia na o oe lava le talalelei o le faaolataga a Keriso. Ia manuia le Eseta!.

OPEN HEAVENSMATALA LE LAGI MO LE ASO TOONAI 4 APERILA 2026(tusia e Pastor EA Adeboye) Manatu Autu: Tāla’i Le Talalelei 1(Share The Good News 1)Tauloto Tusi Paia: Salamo 40:10 “Ou te le‘i natia lava i lo‘u loto lau amiotonu; ‘ua ‘ou ta‘uina atu lou fa‘amaoni ma lau fa‘aolataga; ‘ou te le‘i fa‘alilolilo lou alofa ma le mea moni, mai ‘iā te oe i le fa‘apotopotoga tele.”Faitauga - Tusi Paia: Mareko 5:1-20Ina ua fa’asa’olotoina e le Atua mata’utia le tagata e faaletonu le mafaufau mai Katara i le faitauga mai le Tusi Paia o le asō, na faatonuina e le Atua lea alii e tāla’i atu i nisi tagata le galuega lelei ua faia e le Atua mo ia. O le mea na tupu na amata ona fealuai solo le tamaloa ma faamatala i tagata le faasaolotoga na faia e le Atua mo ia. O se tasi o tulaga na ta’u mai e le Atua ia te a’u i le isi taimi e faapea; e tatau ona o’u ta’u i ona tagata o le tele o la latou molimau ma fa’ailoa, o le tele ia o vavega na te faia mo i latou. A fai e le Atua se mea i lou olaga e ao ona e ta’u atu i nisi le mea ua ia faia, ‘aua e te taofia ia te oe lava le talalelei o le alofa o le Atua ma lona finagalo faamagalo. Ina ua fetaui le fafine Samaria ma Iesu I le vaieli i Sukara, na tamo’e o ia e ta’u i tagata uma na mafai ona faalogo e uiga i le mea na tupu e faapea; “Ina omai ia e vaai i le tagata ua na ta’ua mai ia te a’u o mea uma lava ua o’u faia, pe le o le Keriso ea lea?” (Ioane 4:29).I se taimi ua leva, sa ou ui ai i se taimi faigata ma sa matua’i faigata lea taimi mo a’u. Peita’i soose taimi e fesili mai ai tagata po o a mai a’u sa le aunoa ona o’u fai i ai, o loo galue le Atua i taimi uma i le tausiga o a’u. E le’i taofia lo’u ta’uta’u pea o lona agalelei ma o aso nei, ua o’u atili lototele e faapea atu, o loo galue i taimi uma ma taimi faaopoopo le Atua i le tausiga o a’u. E lē taitai o’u mā e tāla’i mea lelei ua faia e le Atua mo a’u. Fai mai le 2 Korinito 4:3-4“Āfai fo‘i ‘ua ufitia la matou tala lelei, ‘ua ufitia ia i ē ‘ua fano; ‘ua fa‘atauasoina manatu o i latou o ē lē fa‘atuatua e le atua o le lalolagi nei, ‘ina ne‘i pupula atu ‘iā te i latou le malamalama o le tala lelei i le mamalu o Keriso, o ia fo‘i o le fa‘atusa o le Atua.”O tagata o loo tapua’i i tupua, latou te valaaulia isi tagata e auai atu ia latou tapuaiga sesē e ala i lo latou tāla’i ma fa’aali ia i latou mea na o latou maua mai le tiapolo. E lē nanaina e tagata nei mea latou te maua mai iā satani, e ui o nei meaalofa e masani lava ona omai o loo nanā mai ai tua taunuuga mata’utia. O lo’o tau mai e le fuaiupu mai le Tusi Paia ua taua i luga, afai tatou te fa’alafi le talalelei o mea ua faia e le Atua mo i tatou, o le a le maua e i latou o loo i le ala i le fa’afanoga le faaolataga. A fai e le Atua se vavega i lou olaga e le tatau ona e nanāina, a ia e faasoa atu lau ta’utinoga i isi tagata vagana ua fetalai mai ia te oe e taofi. Ta’u i au uō, tagata tou te faigaluega faatasi ma ou tuaoi e uiga i le lelei o le Alii i lenei vaitau o le Eseta. Faamalosi ia i latou ia latou tofo ma iloa e lelei le Alii. (Salamo 34:8). Afai tatou te lē faasoa atu mea lelei ua faia e le Atua  mo i tatou, e toatele tagata e tumau pea i saisaitiaga a le tiapolo, i le suafa o Iesu Amene.

OPEN HEAVENSMATALA LE LAGI MO LE ASO FARAILE 3 APERILA 2026(tusia e Pastor EA Adeboye) Manatu Autu: O Lē tauave avega (The burden bearer)Tauloto Tusi Paia: Mataio 11:28 “Ia ‘outou ō mai ‘iā te a‘u, o ‘outou uma o ē tigāina ma mafatia i avega, o a‘u fo‘i e mālōlō ai ‘outou.”Faitauga - Tusi Paia: Isaia 53:4-5I le tauloto mai le Tusi Paia o le asō, o loo valaau mai Iesu e ō atu ia te ia ma tatou avega. O le avega i lea tulaga e faatatau i se tulaga faigata o loo feagai ma se tagata. E masani ona pipii atu nei avega tusa pe lē talia e le tagata ma e lē mafai ona latou aveesea i lo latou malosi. I le 1 Tupu 17:10-12, o le fafine ua oti lana tane i Sarefata, ua toe ose meaai itiiti na totoe ona na folafola e Elia o le a leai se timu pe paū le sau seiloga e na te faia se poloaiga (1 Tupu 17:1). Na folafola e le Atua le faamasinoga e tauala i le perofeta ona o le tupu o le nuu e ifo i tupua, ma o lea sa matua aafia matuiā le fafine ua oti lana tane, e lē faapea na ia faia se mea sesē ae ona o agasala a taitai o le atunuu, ma e leai se mea e mafai ona ia faia e foia ai le faafitauli. I le 2 Tupu 5:1, fai mai le Tusi Paia o Naamanu e mauoa toe tautaua, peitai e ma’i lepela. Sa leai se togafitiga o le lepela i ia aso, ma ana mafai e tupe ma le tautaua ona foia lona faafitauli,  semanu e lē oo i le tulaga na iai. Ana faapea o le lepela o se mea e mafai ona ia aveesea i se pelu, semanu ua leva ona ia faia aua o ia o le fitafita. Peitai sa le mafai ona ia faia se mea tusa poo le a lona tulaga tauoloa. Le au pele e, o mamafa ea se avega o feagai ma oe? E iai ea sou faafitauli e leai se mea e mafai ona e faia iai? Afai o lau tali o le ioe, ou te fiafia ma oe i le asō aua o loo iai le tagata e faaigoaina o Lē tauave i avega, o lona suafa o Iesu Keriso. E faapipii atu lo’u faatuatua i lou faatuatua a’o e valaau atu ia te ia mo se fesoasoani i le asō, e tali mai o ia. O le agasala o se avega mamafa e taotaomia ai se tagata. A iai le avega o le agasala i luga o se tagata, o loo i lalo o ia i se amo mamafa seia fetaui lea tagata ma seisi e malosi atu ia te ia, e mafai ona aveesea le amo. Fai mai le Mareko 3:27, e leai sē na te mafaia ‘ona ulu atu i le fale o le tagata malosi, ma ‘ave ana mea, se‘ia mua‘i noanoatia le tagata malosi. O Iesu o ia e mafai ona faasaoloto i latou o loo taotaomia i lalo o le avega o le agasala (Mataio 1:21, Galuega 4:12). O mamafa ia te oe le avega o le agasala?O loo valaau Iesu ia te oe i le asō. E finagalo o ia e faasaoloto ia te oe ma avatu le malolo mai le avega o le agasala pe afai e lafoai atu lou ola ia te ia. Afai e lei tuuina atu lou ola ia Keriso, ia fai o ia ma ou Alii ma Faaola i le asō. Afai e te faia, e na te tauave lau avega ma foai atu ia te oe se ola fou. O loo faatali Iesu ia te oe e te lafoai atu au avega ia te ia ona ia avatu lea o le malolo, i le suafa o Iesu, Amene. 

OPEN HEAVENSMATALA LE LAGI MO LE ASO TOFI 2 APERILA 2026(tusia e Pastor EA Adeboye) Manatu Autu: O loo agai mai le fesoasoani! (Help is on the way!)Tauloto Tusi Paia: Salamo 16:4 “E fa‘ateleina o latou tigā o ē vave ō atu i se tasi; o a latou taulaga i mea e inu ‘ua faia i le toto ‘ou te lē sasa‘aina, ma o latou igoa ‘ou te lē ta‘ua i o‘u laugutu.”Faitauga - Tusi Paia: Esoto 20:1-5I se vaitaimi o le 1980, sa iai se fafine i le RCCG sa faatuatua i le Atua mo sana pepe. E ui na tatalo faatasi le aulotu mo lenei fafine, sa ma tatalo foi ma lo’u toalua mo ia i taimi uma e oo i taimi o matou faigalotu faale aiga. E lei leva ae maitaga loa. Ina ua matou faalogo i le tala fiafia, sa matou matua fiafia mo ia. Sa matou sisiva, pepese ma vivii i le Atua. Peitai na ia faapea mai iai matou, ‘sa fautua se tagata ia te a’u ou te saili fesoasoani i seisi mea ina ia maua sa’u pepe. O tagata na ou alu iai mo se fesoasoani e latou te faaaoga foi le Tusi Paia. Peitai e fai ma isi latou vai ma faiga faataulaitu, ma sa latou valaaulia a’u  ou te auai atu iai. Vaai, o lea ua maua le tali, lea ua ou tō’. Na tupu lenei mea i le 40 tausaga talu ai ma o loo matou faalogo o loo tō lava e lei fanau. E iai foi seisi fafine na matua naunau i sana pepe. Ua fiu ma ua lelavā faatalitali i le Atua, ma o lea na ia alu ma sue fesoasoani i isi auala faataulaitu. E lei leva ae tō ma ua fanau mai se pepe tama. Ina ua maua lana pepe, sa ia fai iai latou o loo faatalitali pea i le Atua e faapea, ‘e tatau ona tou saili fesoasoani mo le tou faaitauli e pei o a’u, ae aua le maimau le taimi e tatalo ai’. Ina ua atoa le 6 tausaga o lana tama, na alu i le potu o lona tinā, ua lē lavalavā ma faapea atu i lona tinā, ‘sau ta momoe’. Na matuā faateia lenei tina ma toe fesili atu, ‘o le a lau tala?’ Na toe fai foi le tala e tasi a le tamaitiiti. Na vave ona alu lenei tinā loto mafatia ma le loto faaletonu i se faifeau mo le faasaolotoga. Ao faia galuega mo le faasaolotoga, na fai mai le tamaitiiti, ‘aua le maimaua tou taimi, e lē o ulufia a’u i se temoni, o a’u o le temoni o loo tino mai i se tamaitiiti’. Le au pele e, aua e te saili fesoasoani i fafo atu o le Atua. O i latou e saili i atua ese ma isi auala i fafo atu o le Atua e iu lava i le faanoanoa. Fai mai le tauloto mai le Tusi Paia o le asō e faateleina tigā o ē vave o atu i isi atua. O i latou e saili fesoasoani i fafo atu o le Atua e iu lava i le totogi o le tau aua e leai se mea e foai fua e le tiapolo. Ou te talosaga ia te oe i le asō ia faaauau ona e tumau i le nofoaga o le Atua. Tuu atoa lou faatuatua ia te ia aua o lana fesoasoani o loo agai mai ma e na te foai mea uma ua ia folafola ia te oe (Eperu 10:35-38). Ou te tatalo ia faaauau pea ona ona e tumau ma faaaopoopoina le malosi o lou faatuatua i le Alii, i le suafa o Iesu. TataloTamā, faamolemole fesoasoani mai ia te a’u ina ia ou faatalitali ma le onosai ia te oe mo lau fesoasoani i taimi uma, i le suafa o Iesu, Amene. 

OPEN HEAVENSMATALA LE LAGI MO LE ASO LULU 1 APERILA 2026(tusia e Pastor EA Adeboye) Manatu Autu: O le Upu e mamana 2 (Word of Power 2)Tauloto Tusi Paia: Mareko 11:23 “auā e moni, ‘ou te fai atu ‘iā te ‘outou, ‘ai sē fai atu i lenei mauga, ‘‘Ia si‘itia oe, ma ‘ia lafoina i le sami,’ ma le lē māsalosalo lona loto, ‘ae peita‘i e fa‘atuatua o ia e taunu‘u lava mea na ia fai atu ai, ‘ona faia lea mo ia o le mea na te fai atu ai.”Faitauga - Tusi Paia: Mareko 5:35-43I le tele o tausaga talu ai, sa ou asiasi atu i se tasi o matou aulotu i se atunuu i fafo, ma ina ua ou taunuu atu i le malae vaalele, o se tasi o faifeau e masani ona faatalia mai a’u ua le alu atu. Na ou fesili poo fea o ia ae logo ane a’u o loo ma’i e faatalitali le oti i le falemai. Na ou talosaga atu pe mafai ona matou afe atu i le falemai mai le malae vaalele, ma ua matou o sa’o loa iai. I le falemai lea, e isi se potu faapitoa e tuu ai ma’i ua lē toe aoga iai se togafiti. A ave loa iai se ma’i, o lona uiga e lē toe umi se taimi e faatalitali ai, ma o ī o loo iai le faifeau. Ua maua i le kanesa ma e lē lelei ripoti a fomai. Na ou tatalo mo ia ma faatonu le agaga o le oti e alu ese ma ia. Ou te lei tatalo mo isi ma’i i le potu lea ona e mafai ona molia le tagata i le tulafono pe afai e tatalo e aunoa ma le faatagana a le ma’i. Ina ua maea ona ou tatalo mo le faifeau, na matou o ese lea. Ina ua maea le tolu aso, ua malolo atoatoa le faifeau ma ua te’a ma le falemai. E lē o se mea na ou faia, ae o le Atua na ia lagolago au upu i lona mana. Na ou iloa mulimuli ane i le aso lea, o le aso na te’a ai le faifeau na tetea uma ai i tua ma’i na iai i le potu lea. E te manatu i le mea e ono tupu pe ana faapea na ou faalogo i le tala faanoanoa ona ou misi alofa lea isi faifeau e aunoa ma le folafolaina o le Upu a le Atua i ona luga. Fanau a le Atua, e te lē ono iloa vavega e tele o loo e natia pe afai e te musu e folafola le upu a le Atua i tulaga lē lelei. E tatau ona  e iloa e lē o oe o se tagata e pei o le toatele, e mamana au upu aua o oe o le atalii poo le afafine o le Atua. A e fetaiai ma se mauga i le ala e siitia ai oe, faatonu ma tautala iai i le suafa o Iesu ona usitai lea ia te oe (Mareko 11:23). Fai mai le Faaaliga 1:6, o oe o le tupu ae fai mai le Failauga 8:4 o le poloaiga a le tupu e iai le pule. O lona uiga a e tautala ma folafola, e iai le pule. O le masalosalo o le itu pito malosi lea e taofia le pule ma le taunuu pe a e tautala atu. Le au pele e, aua e te filemu i le taimi o tulaga lē lelei i lou olaga, folafola le Upu a le Atua i le faatuatua, ona liua lea ma le atoatoa ma tumau ai, i le suafa o Iesu. A tautatala fanau a le Atua i le Upu a le Atua ma le faatuatua, e oo mai le mana, e oo mai le pule a le Atua, i le suafa o Iesu, Amene. 

OPEN HEAVENSMATALA LE LAGI MO LE ASO LUA 31 MATI 2026(tusia e Pastor EA Adeboye) Manatu Autu: O le Upu e mamana 1 (Word of Power 1)Tauloto Tusi Paia: Mataio 8:16 “Ua o‘o i le afiafi, ‘ona latou ‘aumai ai lea ‘iā te ia o tagata e to‘atele ‘ua uluitinoina e temoni; ‘ona ia tulia ai lea o agaga i le ‘upu lava, ‘ua fa‘amālōlōina fo‘i e ia o i latou uma nā mama‘i.”Faitauga - Tusi Paia: Mareko 5:2-15Fai mai le Eperu 4:12, o lo‘o ola le afioga a le Atua, o lo‘o matuā galue, o lo‘o sili fo‘i lona ma‘ai i pelu uma e fa‘atau ma‘ai itū. I le faitauga o le Tusi Paia i le asō, na fetalai Iesu i le tagata sa uluitinoina e lekeono o temoni, ona vave lea ona tuua o ia e temoni. I le Galuega 16:16-18, sa faapena foi ona fai e Paulo. Ina ua mulimuli atu pea ia te ia se teine sa ulufia e agaga leaga, sa faatonuina e Paulo le temoni e alu ese mai ia i le suafa o Iesu, ma sa usitaʻia e le temoni. E mamana upu e te tautala ai pe a fa’avae i le upu a le Atua Silisili Ese.Afai o oe o se soo moni o Iesu Keriso, o le a iloa oe e temoni, ma e fefefe ia te oe aua latou te iloa o loo ia te oe le mana e tutuli ai i latou. I le Galuega 19:13-17, na vaai atu atalii e toafitu a Seva i se tagata o loo ulufia e temoni, ona latou fa’atonu lea o le temoni e alu ese mai ia te ia, i le suafa o Iesu o loo talaʻi atu e Paulo. Na iloa e le temoni e leai se mafutaga a i latou ma Iesu, e lei usitaʻi iai ae na osofaʻia i latou. E iloa e le tiapolo o Iesu o le Malamalama ma ua Ia faia lana fanau ma malamalama. O le mea lea e usitaʻi ai temoni ia te oe pe afai o oe o se soo moni o Iesu Keriso.Sa i ai se alii talavou na auai i se fonotaga ae foi atu i lona fale, ua tumu i temoni. Sa matuā tigaina; sa le mafai ona tu pe nofo; sa na o le taoto lava i luga o le fola. Ina ua aumai i le lotu, sa ou fai atu, “Ou te faatonu oe e to’otuli aua ou te fia tatalo mo oe.” Na tali mai ma le pupula ita,  ‘E le mafai ona ou tootuli’. Na toe fai atu laʻu faatonuga, ma sa fesili mai o ia, “I le suafa o ai?” Na ou tali atu, “I le suafa o Iesu.” Na vave ona usitaʻi, ma sa ou tatalo loa mo ia. Ona ou fai atu lea, “Tulai i luga,” ae sa toe fesili mai, ‘I le suafa o ai?’ Na ou tali atu, “O Iesu.” Ona tulai lea i luga. Mulimuli ane, sa ou fai iai “Alu loa. Ua e saʻoloto i le suafa o Iesu.” Na alu, ma na gata ai iina lona faafitauli.Le ‘au pele e, afai o oe o se atalii poo se afafine a le Atua, o au upu e lagolagoina e le mana o ana Afioga. A e fai atu i se fa’afitauli poo se faalavelave e alu ese i le suafa o Iesu, e leai se isi tulaga ae tau o le usitaʻi ia te oe. Ia e nofouta i le mana o le Upu a le Atua, faʻaaoga le pule o loo ia te oe, i le folafola atu ma le loto toa i fa’afitauli ma mea e faataute’e mai, ona e manumalo lea i taimi uma. E mamana le Upu a le Atua i gutu o lana fanau, i le suafa o Iesu, Amene.  

OPEN HEAVENSMATALA LE LAGI MO LE ASO GAFUA 30 MATI 2026(tusia e Pastor EA Adeboye) Manatu Autu: Auala o le mana (Conduits of power)Tauloto Tusi Paia: Failauga 9:8 “Ia sinasina ou ‘ofu e lē aunoa; ‘aua fo‘i le aunoa le suāu‘u i lou ulu.”Faitauga - Tusi Paia: Mareko 6:53-56O se kerisiano ma vaega uma o lona olaga ua gauai atoatoa i le Atua, o se auupega malosi lea i le aao o le Atua. Mo se faataitaiga, e pei ona tatou vaai iai i le faitauga mai le Tusi Paia o le asō, o ofu na ofuina e tagata ua lafoai atoatoa o latou ola i le Atua ua avea ma auala e oo atu ai le mana o le Atua. O ofu o Iesu na tumu i le mana, na pai atu tagata mama’i i le pito o lona ofu ona malolo lea, e pei ona tatou iloa i le faitauga mai le Tusi Paia o le asō. I le Galuega 19:11-12, na faia e le Atua vavega tetele e tauala ia Paulo, e oo i solosolo ma tali palapala na latou faaaogaina, ua ave e tagata mama’i ona malolo ai lea. E lei lavea Paulo i le au soo e toasefululua o Iesu, o ia sa faasauā ma tetee i le talalelei ia Iesu Keriso seia oo ina faaolaina. Peitai, ina ua liliu ia Iesu, na faaaoga e le Atua e faia ai vavega faapitoa. O le Atua e fai vavega, peitai o loo saili o ia ini ipu, o alii ma tamaitai, e talitonu ia te ia, e fia faamatuu atu iai le mana i le lalolagi e tauala iai latou. Atalii/afafine o le Atua, e finagalo lou Tamā oi le lagi i lona mana e tafe i totonu ia te oe ina ia atia’e lana Ekalesia i soo se mea o e iai. Peitai o lou ofu, e atagia ai lou ola, e mafai ona avea ma auala o le mana o le Atua, ma o lou ofu i totonu e tatau ona mamā. O le tauloto mai le Tusi Paia mo le asō, o loo faaali mai iai tatou, e tatau ona sinasina o tatou ofu. E lē faapea o fai atu ia tou ofu papae, ae o loo faatatau i lou loto. Afai e lē lafoai le loto o se tagata i le Alii ma o loo tumu i le naunau i le oa, e lē mafai e le ofu o lena tagata ona tauave le mana o le Atua. Semanu e tauave e Keasi le faaluaina o le faauuga a Elisaia, peitai o lona naunau i le oa na ia lē maua ai lea faamanuiaga faaleagaga (2Tupu 5:20-27). Semanu o Iuta na faamaloloina le tagata pipili i le faitotoa o le malumalu Matagofie i le Galuega 3:1-11. Semanu e faia e le Atua ni vavega tetele e tauala ia te ia, e pei ona ia faia i isi aposetolo, peitai o le naunau i le oa na alai ona ia pule i lona ola ma ua faamāina (Mataio 27:3-5). Le au pele e, e finagalo le Atua e avea oe ma auala o lona mana e pei o Paulo ma Peteru. Peitai e le mafai ona faaali atu le mana o le Atua pe afai e lei lafoai lou ola ia te ia. Afai e lei lafoai lou ola i le Atua, ou te talosaga atu ia te oe ia e faia i le asō ina ia avea oe ma sē tauave i lona mana. Ou te tatalo ia faaofuina oe e le Alii i lona ofu ma avea oe ma auala o lona mana, i le suafa o Iesu. A lafoai lou ola ma le atoatoa i le Atua, e na te faia oe o se auala o lona mana, i le suafa o Iesu, Amene

OPEN HEAVENSMATALA LE LAGI MO LE ASO SA 29 MATI 2026(tusia e Pastor EA Adeboye) Manatu Autu: E mamana ou lima (There is power in your hands).Tauloto Tusi Paia: Mareko 16:18 “e fetāgofi i latou i gata; ‘āfai fo‘i latou te inu i se mea e oti ai, latou te lē afaina ai lava; e fa‘ae‘e atu fo‘i o latou lima i luga o ē mama‘i, ma fa‘amālōlōina i latou.” Faitauga - Tusi Paia: Mareko 1:40-45I le faitauga o le Tusi Paia o le asō, na sau se lepela ia Iesu ma faapea ‘Āfai ‘ua e finagalo i ai, “e te mafaia ‘ona fa‘amamā ‘iā te a‘u.” I na aso, o le lepela o se ma’i e leai se togafiti, peitai ina ua fetaiai o ia ma Iesu, na faamamāina i le taimi lava lena. I le Galuega 3:1-11, na feiloai Peteru ma Ioane ma se tamaloa na fanau mai e pipili, na faapea atu Peteru ia te ia, “…i le suafa o Iesu Keriso o le Nasareta, ‘inā tu ia i luga, ‘inā savali.” Ina ua le tū i luga le tamaloa, na tago Peteru i lona lima taumatau ma faatū i luga. I le taimi lava lena, na sosolo atu le mana o le Atua mai lima o Peteru ma oo atu i ponaivi o le pipili, ona ia oso lea i luga. Fai mai le Ioane 14:12“E moni, e moni, ‘ou te fai atu ‘iā te ‘outou, o lē talitonu mai ‘iā te a‘u, e faia lava e ia o galuega ‘ou te faia; e fai fo‘i e ia mea e sili i ia mea, auā ‘ou te alu i lo‘u Tamā.”I le fuaitau i luga, na fetalai Iesu o soo se tagata e talitonu ia te ia, e sili atu galuega e mafai ona ia faia i lo galuega na ia faia ao iai i le lalolagi. Afai o oe o se afafine/ atalii o le Atua, e tatau ona e iloa ua faauuina oe i le mana e lou Tamā oi le lagi. O lona uiga o ou lima e lē pei o lima o le toatele, ae ua avea ma auala e oo atu ai le faamalologa, faasaolotoga ma le toe fuataina a le Atua. Ua maea ona totogi e Iesu Keriso le tau mo le tigā ma ma’i, ma o le mafuaaga lea na ia fetalai mai ai i le Mareko 16:17-18 “E mulimuli atu fo‘i nei fa‘ailoga i ē fa‘atuatua; e tutuli e i latou temoni i lo‘u igoa; e tautalatala i latou i gagana fou; e fetāgofi i latou i gata; ‘āfai fo‘i latou te inu i se mea e oti ai, latou te lē afaina ai lava; e fa‘ae‘e atu fo‘i o latou lima i luga o ē mama‘i, ma fa‘amālōlōina i latou.”O lona uiga, afai o oe ose atalii/afafine o le Atua, e mafai ona faaee ou lima i luga o e mamai, ona malolo lea. A faae’e ou lima i luga oi latou, e sosolo atu le mana o le Atua mai ou lima ma faamalolo ai i latou. Ou te folafola atu, e amata atu nei, a e pai i e mamai, e malolo i latou. E masani ona ou fai i kerisiano o ni fomai, ‘ae e te lei faia le faatonuga o vai mo togafitiga i au ma’i, fesili atu iai mo se faatagana e faaee ai ou lima, ona e tatalo lea mo i latou’. Ou te fai foi iai, ‘o le a e feagai ma tulaga ua lē toe aoga se togafitiga faa fomai i au ma’i. I taimi faapena, tuu atu i Lē na faapea mai, ‘o a’u o le Alii e faamalolo ia te oe’. Le au pele e, o oe o le atalii/afafine o le Atua, o ou lima e mamana aua ua faauuina e le Atua. O lona uiga, faaaoga lou faatuatua ia te Ia, ma faae’e ou lima i luga o ē mamai mo lo latou faamalologa, ona e vaai lea i vavega faapitoa o tutupu e tauala ia te oe. O lima o kerisiano e mamana, e faaaoga e le Atua e oo atu ai le faamalologa, faasaolotga ma le toe fuataina, i le suafa o Iesu, Amene. 

OPEN HEAVENSMATALA LE LAGI MO LE ASO TOONAI 28 MATI 2026(tusia e Pastor EA Adeboye) Manatu Autu: Tagata tālai o le malamalama 2(Ministers of Light 2).Tauloto Tusi Paia: Isaia 8:18 “Fa‘auta, o a‘u nei ma la‘u fānau, o ē ‘ua foa‘iina mai ‘iā te a‘u e le ALI‘I, e fai ma fa‘ailoga ma mea e ofo ai ‘iā Isaraelu, mai le ALI‘I o ‘au, o lē afio i le mauga o Siona.” Faitauga - Tusi Paia: Mareko 16:17-20E taua mo le au kerisiano le savavali I faailoga ma vavega pe afai e manana’o e manumaloina le lalolagi mo Iesu. I le Ioane 4:48 na fetalai Iesu o isi tagata e lē talitonu i le talalelei vaganā ua vaai i ni faailoga ma vavega. O se faifeau o le malamalama o ia o le mea faigaluega a le Atua e tauala mai ai ana faailoga ma vavega i le lalolagi ma ua uma ona Ia fa’aa’uupegaina oe e faatino vavega.E saili le Atua ia faatino vavega faapitoa e ala i lana fanau uma, e pei ona ia faia ia Paulo (Galuega 19:11-12). Afai o oe o lona atalii/ afafine, e finagalo le Atua ia fa’ae’e ou lima i luga o e mama’i ia malolo ai i latou. O isi kerisiano latou te lē mautinoa pe malōlō le ma’i pe a fa’ae’e ai o latou lima ma o le mea e tupu, e lē taitai fa’ae’ea o latou lima i luga o e mama’i. E le’i fetalai le Atua e tatau ona fa’ae’e ou lima i luga o e mama’i ma maua ai lo latou fa’amālōlōga, pau lona finagalo o oe, ia fa’ae’e ou lima i luga o le ma’i, ma o le a Ia fa’amautinoa e malolō i latou. Pau lau matafaioi e fai o le usitai i le Atua ae o le isi vaega o le galuega o Ia e ana. A fa’ae’e ou lima i luga o le ma’i, o lona mana o loo galue i totonu ia te oe o le a tafe atu e ala i ou aao e fa’amautinoa ai e malolō i latou.Ina ia avea ma auupega e fa’ailoa ai faailoga ma vavega a le Atua, e mana’omia lava le faatuatua. O I latou o e usiusita’i i fa’atonuga a Iesu i le faatuatua, latou te maua e le aunoa le taunuuga na folafolaina e Iesu mo i latou. Faapei o se faifeau talavou, ina ua o’u faitau e mafai ona fa’ae’e o’u lima i luga o e mama’i ona mālōlō lea o i latou, amata loa ona o’u faia fa’alilolilo i lo’u fale. Soose taimi e fai mai ai la’u fanau ia te a’u ua tigā le ulu o se isi, ou te ave ai i latou i lo’u potu e lē iloa atu ai e se isi, fa’ae’e o’u lima i o latou luga ma faapea, “I le suafa o Iesu, ulutigā alu ese!” Peita’i ou te fa’amautinoa fo’i o loo i ai se fualaau mo le ulu tigā. O na taimi sa laititi lo’u faatuatua, peita’i e faafeiloai mai pea le Atua e lē aunoa i ana fanau e tusa ma le tulaga o lo latou faatuatua. A uma ona tatalo i lenā faiga, o le tele o taimi, e malolō i latou e le’i atoa se lima minute. O aso nei, ua mafai ona fa’ae’e o’u lima i luga o soose tasi pe a ma’i auā ua o’u iloa e manumalō pea Iesu.Le au pele e, ua tā’ua outou e le Atua; o le malamalama o le lalolagi (Mataio 5:14) ma e lē pepelo o Ia. O lea la, ia e lototele i lou malosi o se malamalama ma amata fa’asusulu atu. Ou te tatalo ia amata atu nei ona susulu atu le mamalu ma le mata’utia o le Atua i lou olaga e sili atu nai lo se isi lava taimi muamua, i le suafa o Iesu, Amene.

OPEN HEAVENSMATALA LE LAGI MO LE ASO FARAILE 27 MATI 2026(tusia e Pastor EA Adeboye) Manatu Autu: Tagata tālai o le malamalama1 (Ministers of Light 1).Tauloto Tusi Paia: Mataio 4:16 “O le nu‘u sa nofo i le pouliuli, ‘ua latou iloa le malamalama tele; o i latou fo‘i sa nonofo i le nu‘u ma le ata o le oti, ‘ua alu a‘e le malamalama ‘iā te i latou.” Faitauga - Tusi Paia: Mataio 5:14-16O le malamalama e malosi. E tafiesea le pogisa ma faaalia soo se mea o loo nātia. Na fetalai Iesu i le Ioane 9:5 “Manū ‘ou i ai i le lalolagi, o a‘u o le malamalama o le lalolagi.” O loo faapea mai foi le Ioane 1:4-5 “Sa ‘iā te ia le ola; o le ola fo‘i o le malamalama lea o tagata. ‘Ua pupula mai fo‘i le malamalama i le pouliuli, ‘ae le‘i manumālō i ai le pouliuli.”O loo faamaonia mai i nei fuaitau o le Tusi Paia o Iesu o le malamalama. Peitai i le Mataio 5:14, o Iesu lava na faapea atu i lona ausoo, ‘o outou o le malamalama o le lalolagi. E lē pepelo le Atua ( Numera 23:19), o lona uiga a fetalai Iesu o ona soo o le malamalama o lenei lalolagi, ma afai o oe o se tasi o ona so’o, o lona uiga o oe o le malamalama. O loo faaalia i le Iakopo 1:17 o mea lelei uma e foa‘ifuaina mai, ‘atoa ma mea alofa uma e ‘ato‘atoa ‘ona lelei, mai le Tamā o le malamalama, o lona uiga o lana fanau o le malamalama. E finagalo le Atua ia e susulu atu, ma i le faitauga mai le Tusi Paia o le asō, o loo poloai mai ia faapea ona pupula atu lo ‘outou malamalama i luma o tagata, ‘ina ‘ia latou iloa la ‘outou amio lelei, latou te vivi‘i atu ai le Tamā.I lou tulaga o le atalii/afafine o le Atua, o oe o le tagata talai o le malamalama, o lona uiga e tatau ona susulu atu lou malamalama. O loo valaau le Atua ia te oe o se tagata talai e agavaa i le feagaiga fou (2 Korinito 3:6), o lona uiga e tatau ona faaalia i lou olaga le mamalu ma le alofa tunoa o le Atua. I le Ioane 14:12, na fetalai Iesu o i latou e talitonu ia te ia, e faia lava e i latou galuega e na te faia; e fai fo‘i e i latou mea e sili i ia mea. A susulu le malamalama o le Atua i se nofoaga, o mea e lē mafaia, o le a mafaia. E tatou te vaaia lea tulaga i le soifua o Iesu, o soo se mea e afio iai, o vavega, faamalologa, faasaolotoga na tupu ma sa faulai. I le Ioane 9:1-7, na ia faamaloloina le tauaso na tauaso i lona olaga atoa. E faapena foi i le Ioane 5:1-9, na ia faamalolo le tamaloa na ma’i mo le 38 tausaga. Na ia faamalolo foi ini lepela i le Luka 17:11-19, faapea se tamaloa na ulutinoina e le lekeono o temoni( Mareko 5:1-20). Fai mai le Tusi Paia i le Mataio 4:23-25 na matua lauiloa Iesu ua oo atu ripoti i le malo o Suria ona o vavega ma ia faia. Na silasila atu tagata ia te ia o le malamalama ma naunau e mulimuli ia Iesu i soo se mea na feafio a’i ai. Le au pele e, afai o oe o se fanau a le Atua, o le malamalama o lou faasinomaga lea,  a o lenei malamalama e tatau ona matua susulu e mafai ona tafiesea soo se auala o le pogisa i lou siomaga. Ou te tatalo, ia aua lava nei tineia le malamalama o le Atua ia te oe, i le suafa o Iesu, Amene.