29 Dec. Actualidade Mediodía

No informativo de hoxe contamos que A Estrada solicita un obradoiro de emprego forestal para formar a 20 persoas, un proxecto que inclúe 24 actuacións no rural de 19 parroquias do municipio. Tamén destacamos que Raquel Campos Pico é a gañadora do Premio Xornalístico Manuel Reimóndez Portela, que celebra o seu 30º aniversario recoñecendo unha reportaxe sobre hiperconexión e saúde mental. Pecha o ano e, con el, chega o tempo de balance político no programa É de Mañá de Neves Rodríguez. Hoxe pasaron polos micrófonos Mar Blanco (Movete), Xoán Reices (BNG) e Luis López (PSOE), e mañá será a quenda do alcalde Gonzalo Louzao. En comarcas, o delegado da Xunta visitou o Centro de Recuperación de Fauna Salvaxe de Cerdedo-Cotobade, mentres que o Concello de Padrón reforzará o seu persoal con sete novas prazas de Policía Local. En deportes, A Estrada despedirá o ano con dúas citas xa tradicionais: a ruta BTT ao Monte Cabalar e a Carreira de San Silvestre polas rúas da vila, actividades que inclúen chocolatada e recollida solidaria de alimentos.