É de mañá con Neves Rodríguez

Neste xoves no que recibimos a visita da borrasca Christine ficamos ao quente no É de mañá gozando da radio de proximidade. Levantamos a persiana en Silleda para falar coa súa alcaldesa Paula Fernández da devolución de dúas pezas do tímpano do Mosteiro de Carboeiro expoliadas hai máis de 50 anos e da urxente restauración que precisa o Mosteiro para contextualizar estas dúas pezas para o goce da cidadanía. Á volta do Entroido tivemos unha amena e didáctica conversa con Antón Reigosa, unha das figuras máis recoñecidas e autorizadas de Galicia á volta da cultura popular, quen nos falou das orixes do Entroido, do seu simbolismo, da evolución e do compoñente cultural e identitario que ten esta celebración. Como cada xoves andivemos revoltas mais non axitadas coa compañeira Eli Rey que sempre trae os petos inzados de curiosidades; desta volta falamos sobre o Día Mundial da non violencia e da paz que se celebra o 30 de xaneiro. E por último con Moises Barcia, fundador e director de Rinoceronte Editora falamos do traballo que fan para achegar á sociedade galega obras da literatura universal traducidas ao galego. Un programa para quentar o corpo e a alma nestes días de friaxe e auga. Sede bos...ou non!