Informativos Radio Estrada

A actualidade deste xoves abre cun accidente na PO‑841, onde un condutor tivo que ser trasladado ao hospital despois de saírse da vía coa súa furgoneta nas inmediacións da rotonda de Toedo. Á falta de máis de tres meses, A Estrada comeza a preparar o Nadal, mentres o pleno de hoxe abordará o protocolo de cooperación con Rianxo no proceso de irmandamento entre ambos concellos. A Estrada inaugurou esta mañá a exposición “Castelao Grafista. Facsímile” na Casa das Letras, e a mocidade estradense está presente entre as candidaturas aos Premios Provinciais á Xuventude, que este ano alcanzan unha cifra récord. Tamén coñecemos que a unidade móbil da ITV chegará á Estrada en outubro para realizar inspeccións, e que o Conservatorio de Música abre a matrícula para o grao de iniciación e novas especialidades. A Fundación Salma presentou hoxe na Estrada a súa rede de apoio á saúde mental, e Ullama convoca unha reunión informativa para as persoas interesadas na campaña de recollida da mazá, que será mañá no MOME. En comarcas Atropelo en Forcarei con feridas leves. Cuntis, Barro, Moraña e Portas unen forzas para previr condutas adictivas. A Semana Verde prepara en Silleda unha edición especial polo Xacobeo 2027. A UNED de Lalín pon en marcha un curso para aprender a escribir, publicar e vender un libro. O programa +Bosques leva as súas últimas rutas do ano a Silleda e Pontevedra, con todas as prazas cubertas. En deportes Migui regresa ao Estradense para reforzar o ataque a poucos días do inicio da liga; falamos con el e con Toño Camba.