Informativos Radio Estrada

Informativo de hoxe en Radio Estrada A edición de hoxe chega marcada polos importantes cortes de telecomunicacións que deixaron sen teléfono nin internet a veciños de Moreira, Berres, Remesar, Agar e Loimil. Desde A Estrada Dixital explican que a avaría é allea á empresa, afecta a todas as operadoras e podería quedar resolta ao longo desta fin de semana. Tamén foi protagonista a cultura: esta mañá presentouse a 13ª edición de PANIC, o Ciclo de Cine de Terror da Estrada, que arrancará o venres 23 cunha charla de Darío Loureiro e unha maratón de películas que se estenderá desde as 22:30 ata as 7 da mañá. No ámbito administrativo, a Unidade Móbil de Expedición de Pasaporte e DNI rexistrou un éxito rotundo. As citas están esgotadas para o que resta de xaneiro e febreiro, e só quedan dispoñibles para marzo. Ademais, a Unidade Móbil da ITV visitará A Estrada a próxima semana, do luns 19 ao xoves 22, situada diante do pavillón Coto Ferreiro. No capítulo político, o PSOE chama á calma pola retirada da farola da Praza, asegurando que será recolocada e seguirá presidindo o espazo. Pola súa banda, o BNG leva á Deputación unha moción para rexeitar o tratado de Mercosur e reclamar máis fondos da PAC para Galicia. Esta tarde, ás 20:30 h, terá lugar a entrega dos Premios do Sorteo de Nadal de ACOE, con todos os gañadores xa localizados, tanto da Estrada como doutros concellos, un sinal do éxito destas campañas. En comarcas, mañá presentarase en Bandeira o Entroido dos Xenerais da Ulla, unha das citas máis emblemáticas da contorna. ⚽ Deportes: Como cada venres, repasamos os partidos máis destacados da fin de semana na nosa contorna.