Informativos Radio Estrada

Novo informativo de Radio Estrada, marcado de novo pola alerta amarela por vento, choivas intensas e treboadas. Comezamos cunha mañá complicada en Cuntis, onde unha forte saraibada con pedras de ata 2 centímetros provocou inundacións e numerosos problemas en apenas cinco minutos. Na A Estrada, os servizos de emerxencias traballan na retirada dunha árbore caída no entorno do colexio do Foxo, que impide o paso dos autobuses escolares e o acceso a unha vivenda con unha persoa dependente. Repasamos tamén a actualidade política e institucional, coa entrega de novos vehículos aos GES por parte da Xunta, a defensa dos orzamentos municipais de 2026 no pleno desta tarde e as críticas do PSOE ás contas do Concello. Falamos ademais de prevención no rural, control da madeira nas pistas municipais e dos danos provocados polo xabaril, que sitúan A Estrada entre os concellos máis afectados da provincia. No ámbito social e cultural, comezan novos cursos de actividade física para persoas xordas e de baile galego para maiores ou persoas con discapacidade, convócase o V Concurso de Solistas da Banda Municipal e celebramos a reapertura do bar restaurante Os Peares, un negocio histórico que combina renovación e tradición. Na comarca, achegámonos a Forcarei, Rodeiro, Ames e de novo a Cuntis, con obras en estradas, melloras no abastecemento de auga, encontros co sector audiovisual e unha nova edición do Tapalacón. Toda a actualidade local e comarcal, contada con proximidade, aquí en Radio Estrada. O que pasa na Estrada, pasa por aquí