Informativos Radio Estrada

Un novo episodio informativo dende A Estrada e a súa contorna, cun repaso completo á actualidade local, comarcal, cultural, política e deportiva. Nesta edición falamos dun coche que saíu da vía en Loimil sen causar feridos, dun corremento de terras en San Miguel de Castro que provocou a caída dunha torre eléctrica e dos plans municipais para crear unha área pública de estacionamento para camións detrás da estación de autobuses. O Concello tamén lembra o aumento da capacidade dos colectores amarelos na Avenida de Santiago. No capítulo político, o PSOE critica os orzamentos municipais por consideralos “superfluos” e celebra avances para recuperar a farmacia de Oca, mentres o BNG ofrece a súa propia valoración, cualificando as contas de 2026 como ideolóxicas e pouco ambiciosas. En Cultura, o Entroido da Estrada ultima a súa programación para este venres, e nas comarcas destacamos que o xornalista Alfonso Hermida será o pregoeiro da XXVII Festa do Lacón con Grelos de Cuntis. Ademais, adxudícanse obras por preto de 600.000 euros en Arrotea-Almofrei (Cerdedo-Cotobade), Ames recibe 122 propostas para as súas vivendas públicas en Galdrachán e a Deputación impulsa o circuíto +Escénicas para levar teatro e danza aos concellos máis pequenos. No deporte, chega o habitual resumo da xornada futbolística da man de Rafa Vázquez, marcada por numerosos partidos suspendidos, incluído o do Estradense fronte ao Céltiga polo encharcamento do campo. Tamén repasamos o bo papel do Club Deportivo Xesteiras nas probas ciclistas de estrada e montaña desta fin de semana.