Rafael Rodríguez Valdés del SNLL de Corvera úfrenos tolos detalles d'un cursu d'asturianu

Siguimos n’Iniciativa pol Asturianu con más convidaos y vamos dir agora pal conceyu Corvera nel centru’l país. Dende esta selmana y fasta’l 13 de marzu, ábrese’l plazu pa inscribise nel "Cursu Básicu de Llingua Asturiana" que, igual que n’ediciones anteriores, quier ser un mecanismu de deprendimientu de les normes básiques d’escritura del idioma, pero tamién una manera d’averase a dellos aspeutos de la cultura asturiana. El cursu, que ye de baldre, va ser impartíu pol técnicu responsable del Serviciu de Normalización Llingüística de Corvera, esti nun ye otru que Rafael Rodríguez Valdés que mos atiende al traviés de la llínia telefónica.