ក្រសួងអប់រំប្រកាសថា ដំណើរការប្រឡងបាក់ឌុប នាថ្ងៃទី១ ប្រព្រឹត្តទៅដោយរលូន

ក្រសួងអប់រំ បានប្រកាសថា ការប្រឡងសញ្ញាបត្រមធ្យមសិក្សាទុតិយភូមិ ឬការប្រឡងបាក់ឌុប នាថ្ងៃទី១ ត្រូវនឹងថ្ងៃទី២៨ ខែសីហា ឆ្នាំ២០២៥ នេះ បានប្រព្រឹត្តទៅដោយរលូនល្អ មិនមានបាតុភាពមិនប្រក្រតីណាមួយ គួរឲ្យកត់សម្គាល់ឡើយ។ ដោយសារបញ្ហាព្រំដែន សម្រាប់បេក្ខជនមកពីខេត្តឧត្ដរមានជ័យ ត្រូវបានរៀបចំការប្រឡងនៅស្រុកពួក ខេត្តសៀមរាប ដែលមានចំនួន ៣មណ្ឌល សរុប ៧២បន្ទប់។ សម្រាប់បេក្ខជនប្រឡង មកពីខេត្តឧត្ដរមានជ័យ និងព្រះវិហារ ចំនួន ៦នាក់ ដែលបានមកប្រឡង នៅរាជធានីភ្នំពេញ កំពង់ស្ពឺ ពោធិ៍សាត់ និងបាត់ដំបង មានវត្តមាន ក្នុងការប្រឡងធម្មតា ដោយទទួលបានថវិកាឧបត្ថម្ភរបស់ក្រសួងអប់រំ យុវជន និងកីឡា។