កូនប្រុសរបស់ស្នងការរងខេត្តបន្ទាយមានជ័យ ដែលបើកឡានបុកមនុស្សស្លាប់ ៥នាក់ ហើយរត់គេច ត្រូវបានដាក់ក្នុងបញ្ជីខ្មៅ

កាលពីថ្ងៃទី៣១ ខែមីនា លោក ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ដែលគ្រប់គ្រងប៉ូលិស និងអាជ្ញាធរខេត្តរាជធានីក្រុងស្រុកខណ្ឌឃុំសង្កាត់ បានប្រកាសណែនាំនៅក្នុងកិច្ចប្រជុំធំមួយ ឱ្យលោក ស៊ីវ សុជាតិ ស្នងការរង នគរបាល ខេត្តបន្ទាយមានជ័យ សហការជាមួយសមត្ថកិច្ច ដើម្បីនាំខ្លួនកូនប្រុសរបស់លោក ដែលបានបើកឡាន បុកមនុស្សស្លាប់ ៥នាក់ និងរបួសធ្ងន់ម្នាក់ នៅខេត្តបាត់ដំបង កាលពីយប់ថ្ងៃទី២៧ ខែមីនា ឆ្នាំ២០២៦ មកទទួលខុសត្រូវចំពោះមុខច្បាប់។ លោក ស សុខា ក៏បានប្រកាសថា អគ្គនាយកដ្ឋានអត្តសញ្ញាណកម្ម និងអគ្គនាយកដ្ឋានអន្តោប្រវេសន៍ បានអនុវត្តបទបញ្ជារបស់លោក ដោយដាក់ឈ្មោះជនបង្កគ្រោះថ្នាក់ចរាចរណ៍ ស្លាប់មនុស្សច្រើននាក់នេះ ទៅក្នុងបញ្ជីខ្មៅ ហាមឃាត់ មិនឱ្យចាកចេញពីប្រទេសកម្ពុជាឡើយ។