មន្ត្រីជំនាញបញ្ជាក់ថា ជាតិពុលក្នុងខ្យល់នៅកម្ពុជា មិនទាន់ដល់កម្រិតធ្វើឲ្យព្រួយបារម្ភឡើយ

ក្នុងរយៈពេលប៉ុន្មានថ្ងៃនេះ ប្រជាពលរដ្ឋកម្ពុជាមួយចំនួន ពិសេសអ្នករស់នៅភ្នំពេញ បានបង្ហាញការព្រួយបារម្ភ ចំពោះកម្រិតគុណភាពខ្យល់ នៅរាជធានីភ្នំពេញ។ ប៉ុន្តែក្រសួងបរិស្ថាន នៅព្រឹកថ្ងៃទី២៣ ខែមករា ឆ្នាំ២០២៥ បានបញ្ចេញរថយន្ដចល័ត ដើម្បីពិនិត្យគុណភាពខ្យល់។ ប៉ុន្មានម៉ោងក្រោយមក គឺនៅរសៀលថ្ងៃទី២៣មករា អ្នកនាំពាក្យក្រសួងបរិស្ថាន លោក ខ្វៃ អាទិត្យា បានអះអាងប្រាប់ក្រុមអ្នកកាសែត នៅតំបន់ត្រួតពិនិត្យគុណភាពខ្យល់ ម្តុំបឹងជើងឯកថា ការបំពុលខ្យល់ នៅក្នុងប្រទេសកម្ពុជា មិនទាន់កើនឡើងកម្រិតនៃការបង្កហានិភ័យធ្ងន់ធ្ងរដល់សុខភាពសាធារណៈនោះទេ។ ដូច្នេះអ្នកនាំពាក្យក្រសួងបរិស្ថាន បានប្រកាស អំពាវនាវ សូមប្រជាពលរដ្ឋ កុំមានការព្រួយបារម្ភ ចំពោះការចែកចាយព័ត៌មាន តាមបណ្ដាញសង្គម អំពីគុណភាពខ្យល់ នៅកម្ពុជា ថាមានជាតិពុល។