សកម្មជន​ចលនាមាតាធម្មជាតិ​ ៥នាក់ ត្រូវ​តុលាការសម្រេច​ឃុំខ្លួន​នៅ​ពន្ធនាគារ​ព្រៃស

កាលពីថ្ងៃទី២ ខែកក្កដា ឆ្នាំ២០២៤ យុវជន ៥នាក់ ស្ថិតក្នុងចលនាមាតាធម្មជាតិ ដែលធ្វើសកម្មភាពការពារបរិស្ថាន នៅកម្ពុជា ត្រូវបានតុលាការ សាលាដំបូងរាជធានីភ្នំពេញ សម្រេចឃុំខ្លួន នៅពន្ធនាគារព្រៃស។ ការចាប់ឃុំខ្លួនយុវជនស្រីប្រុសទាំង ៥នាក់នេះ បានធ្វើឡើង ភ្លាមៗ ក្រោយតុលាការ បានប្រកាសសាលក្រម ដោយសម្រេចផ្តន្ទាទោសពួកគេ ទាំង ៥នាក់ រួមទាំងមនុស្ស ៥នាក់ទៀត ចន្លោះពី ៦ឆ្នាំ ទៅ ៨ឆ្នាំ និងពិន័យជាប្រាក់ ១០លានរៀល ស្មើប្រមាណ ២៥០០ដុល្លារអាមេរិក ក្នុងម្នាក់ៗ ពីបទរួមគំនិតក្បត់ជាតិ និងប្រមាថព្រះមហាក្សត្រ។